Galatya 1 - Findel i DeeƁwe Ti Alis i Ron

Too' i Pool

¹ Kaada moti ii na kyel i Pool, mamuro i Yeso. Lai amen yes i ta kyel i ɗufal hu maɗufal kwa. Lai amen yes i ta kyel i Kristi hu DeeƁwe Demukan ima luktus fit ta mot wi.

² Shak shunun ima sima akul hu yin, sin hwak sima too' ti shak suɓut i som koltifai ta Galatya.

³ I fwal i maɗing DeeƁwe Demukan hu Deembai Yeso Kristi u fu mal i mute cala ta murak i muluti.

⁴ Yis Yeso fa mupwet ames ɓurti mafwashani amukan, ɓa u bum kan na waya mufwashi ti kwai moti, ta ngga' ima DeeƁwe Demukan ma ɓweti u te ta nai.

⁵ Shak ha' ti asum i DeeƁwe fit u te ames myan hu myan! Andi.

Muro Maɗesi Andek Je

⁶ Tyon hai i ɗama i shok na fo hyang, ti ɗing ti ngga' ima hu yu hatat kang ta kyel i DeeƁwe, yis ima laiyu yes kyel ames, a mal ta kyel i Kristi. Hu mayu koltifai ti fisel nin ti mati yut i dang fota Muro Maɗesi.

⁷ A Muro Maɗesi nin kwa fweng. I lak mai ɓurti shini somi si ring ti ambe' amu ya, sin kinti hai shen ti mwawei i Muro Maɗesi i Kristi ya.

⁸ Ɓwet a nin a hon a malu' i DeeƁwe nin ta fit, ima ma laksu Muro Maɗesi nin a akat ima ti ni mba hui, ɓa ale' u vos i myan hu myan!

⁹ Fota ngga' ima ti ni lak ta, i ma muhum laksu, na ɗeng ma mba su findel nin akat sin hu ima ti hu mat, ɓa ale' u vos myan hu myan.

¹⁰ I ma fari ɓa ɗufal si ɓwetun, a hon a DeeƁwe ya? Ahun i ma ti' ti hai ɓa i kin ɗufal si hal ɗat si ɓwi ti yin ya? Na i ma ti' ti hai ɓa i kin ɗufal si hal a ɗat si ɓwi amen, i wa mute ii yere i Kristi kwa ndai.

DeeƁwe Lai Pool

¹¹ I ɓweti hu shangi, a shunun, Muro Maɗesi ima i mba hui mai, a ɗama ima maɗufal lang ti ya kwa.

¹² I mat ii ta kyel i maɗufal nin kwa, a ɗeng kofun ti kwa. Findel amen yes mangra ta kyel i Yeso Kristi myan ima pwakun hai.

¹³ Hu hal mute asun ta fisel tima ai, fisel ti koltifai i Ju, hu ngga' ima ti ambas, ai i kof ɗufal i DeeƁwe ya, i kin hai ɓa i fwarus ya.

¹⁴ Ai, yin cwai ti wei ta koltifai i Ju, i ɓin Ju hyang i waya amen, ai yin ti nadon ti ambas i ɓweng ti mute musuti i koltifai i hu deen i hwer.

¹⁵ Tasi ɓele kaciwa' mati si al lun, DeeƁwe benun, laiyun ta fisel muɗesi ti mal asus. Ti ɗatus ta si ɓwi,

¹⁶ ɓa u kofun Al ames, ɓurti i mba Muro Maɗesi ames wa kyel Ramam. Ta si myani i wa i far taɓak ta kyel i ɗeng kwa,

¹⁷ ai, i wa Yerushalima ɓa i ɗing Som Muro i Yeso ima si tong mute i som muro ɓa i far taɓak ta kyel ames kwa. Fo abet i win Arabya, ta takfai ɗak i humkyel ta Damashkus.

¹⁸ Takfai ti wilyal ataat i wa Yerushalima ɓa i her Pita nggas, ni te tikul i mukonan hure mulang hara.

¹⁹ I wis ɗing ti ɗeng ta saa ti Som Muro i Yesoi kwa, a Jemis nusus i Deembai je.

²⁰ I ma laksu mwawei na mabel i DeeƁwe nyai, aɗeng ima i worongsui mai a fyaratat kwa.

²¹ Takfai ti andi, i wa ta' ti Sirya hu Silishya.

²² Som i koltifai ta Judya si shangun kwa si myani.

²³ Si halan ti findel nyai, “Maɗufal ima ai yis kof sikan ɓwari mwashi ma mba ti findel i fati mulut, i ma ai yis kinti hai fori ya.”

²⁴ Si ha' asum i DeeƁwe fit ɓur sun.