Filipya 4 - Findel i DeeƁwe Ti Alis i Ron

¹ Ɓurti andi, a shunun, hun ima i ɓwetsu, i cu ra ya fwet ɓa i ɗingu, hun a jakak hu rurwan amen, angga' ima ɗat ɓa hu te mangra ta saa ti Deembai nai, a myayun.

Njeng Saa ti DeeƁwe

² I fwal Uyuwodya hu Usintiki, ɓa si mas mute cala ti ɗiyai saa ti Deembai.

³ I ma fwalsa a nusun i ro, ɓa ha bum arof apil mii, ɓurti si mas ro manjengi akul hu yin ta kyel Muro Maɗesi, hu Kilemen hu anggum i shunun i ro ima asumam ames mata kaada i mupwet.

⁴ Jakak hun saa ti Deembai ngang, i ma muhum laki i hai nyai, jakak hun!

⁵ Tehun ti mulut muɗyayi ta mabel i ɗufal shak. Yes i Deembai kat anggasi.

⁶ Kan hu tirim ti ɗama kwa. Fo i mandi, tasi shak ɗamam, ta fisel ti fwal hu palang, lak hun DeeƁwe shak aɗeng ima hu ɓweti.

⁷ Unai DeeƁwe ma wa fasu cala ima ɗeng shangi kwa, ma wa fwang ti mulwat hu ambe' amu saa ti Yeso Kristi.

⁸ A shunun, na dala, aɗeng ima mii mwawei, aɗeng ima mii maɗesi, aɗeng ima mii mandere, aɗeng ima mati sapa, aɗeng ima mii ɓweti, na ɗama nin yis ndyas, ahun ii fati ngye, mas hun ambe' si ɗamam mii hai.

⁹ Shak aɗeng ima hu shangi, ahun ii ma hu mat, ahun ii ma hu hali na kyel amen, ahun ii ma hu ɗingi na wii yunti, mas hun ti ro. DeeƁwe ma fati cala, ma wa mute akul hu hun.

Palang Ɓurti Mal Ames

¹⁰ I jakak fwet na saa ti Deembai ima nasi dala hu hum mbe'i ti yin. Andi hu mati ambe' i masi, ɗak hu wis a kyel i kofi kwa.

¹¹ I ma lak ti mai a ɓurti ima ti jyel kwa, ɓurti i wis shangi nyai ɓa i ka' agung ti ngga' ima i wis haisun ta.

¹² I wis shangi si ngga' ima ɓa i te saa ti jyel, hu saa ti wisi. I wis shangi si mufot i ka'ti agung saa ti hwem, hu saa ti gwishil, saa ti ramwayat hu saa ti wet.

¹³ I ndok ɓa i mas shak ɗamam ta kyel yis ima fan njeng.

¹⁴ Shak ta andi, mati ɗat hu zan nin na saa ti shum amen.

¹⁵ A andi hwak hun som i Filipi hu shangi, tasi mwen ti bya' tya hu shang Muro Maɗesi, a hun je hu bumun ti cef. Myan ima i lang ya ta ta' ti Makidonya, suɓut i som koltifai shini si bumun ta kyel i fai hu mati kwa, a hun je.

¹⁶ A andi hwak myan ima yin ta Tasalonika, hu hum ti' sun abum myan ima yin ti ɗama kwa.

¹⁷ I ma kinti shit tasi a mal hai kwa, i ɓweti ɓa hu mat maɗesi ima yes ta fisel ti fai.

¹⁸ Fota mwashi, i mati aɗeng ima lang mwal ii hai. I mat shak mal gilik ima hu fan ti ɓweti i mulut ta kyel i Apafuroditus. A fai mufyongi, kuna tya DeeƁwe maat ti ɗat si ɓwi.

¹⁹ Unai DeeƁwe amen ma wa talsu shak myatat amu ti cinjangat i ramwayat ames saa ti Yeso Kristi.

²⁰ Wa kyel i DeeƁwe amukan hu Dee, ɓa u te ti cinjangat i myan hu myan. Aandi.

Too' i Dala

²¹ To' hun shak som i sapai saa ti Yeso Kristi. Shunukan ima si akul hu yin, si ti' ti too'.

²² Anggum i som i sapai si ti'su too', fota wur i Makai.

²³ Mal maɗesi i Deembai Yeso Kristi, u te akul hu rin amu. Aandi.