Filipya 3 - Findel i DeeƁwe Ti Alis i Ron

Mute Manderei i Mwawei

¹ Ta dala, a shunun, jakak hun saa ti Deembai! A tirim na kyel amen kwa, ɓa i hum worong su musut i ɗama andek i hai, ma wa ɓweng ti fati mulut amu.

² Ɗing hun kyara mii mweret, ɗufal mii si masan ti mafwashi, a som i lyafan ti ɗufal.

³ A kan si mas kan mukwen mwawei, ka cwai ti afut ti andok ti Rin i DeeƁwe, ka fa njeng tasi maɗufal kwa, ka pati ajin ti aɗeng ima Yeso Kristi masi ɓur sikan.

⁴ Ayin i ti aɗeng ima kin i pati jin ti haisun. Na ɗeng hwak yis mbe'i nyai, mati aɗeng ima ɓa u pati ajin saa ti lo', i mati ima ɓin.

⁵ Si masun mukwen yin ti mukon myarfu', i som i Isar'ila, ii ta gung i Benjamen, maɗufal Ju gbum, tasi mangga' i anggut, yin a ma Farisiyawa,

⁶ fota ma nadon i mulut i koltifai, i burwakan ti som koltifai ti DeeƁwe, fota ma mute manderei ta ngga' ima anggut ma ɓweti ta, i mati afol kwa.

⁷ Shak aɗeng ima ai, ɓa i wo ham i hai, mwashi i ha' mii fo i ɗama kwa ɓurti Kristi.

⁸ A andi hwak, i ha' shak ɗamam si mii fo i ɗama kwa, kaani hu ngye i mbaitat i shang ti Yeso Kristi Deembai amen, ima a ɓursus i dun shak ɗamam. I zanus a ɗamam i gbya', ɓa i wis Kristi,

⁹ yin i te andek hu yis, ka si wisun ti mute manderei i haisun, ima yes ta saa ti anggut kwa. Fo i mandi, i mas mute manderei ta fisel ti fati mulut saa ti Kristi. DeeƁwe u kin kan ka mas mute manderei ta saa ti fati mulut.

¹⁰ I ɓweti i shang Kristi, hu andok i muluk fit ames, hu futi hai i woti shum ames, yin mute fota yis tasi mot ames hai,

¹¹ ɓa ashang yin i wis muluk fit ti apwet ta mot wi.

Tital i Cwaiti Uges

¹² Mwashi tii wis ɗamam mii shak kwa, tii te nggya-nggya kwa. Kristi Yeso zanun, ɓurti andi, i cu wei ti tital ɓa i cu uges i zan mal i titali.

¹³ A shunun, yin ti cu uges i kwa, i kinti shit si a ɗama andek. I nitima ti aɗeng ima lang ta, i kinti hai si ɗingti a aɗeng ima mata wei.

¹⁴ I ni gbuk ɓa i cu uges i titali, a mal ima DeeƁwe laiyun ti ta fit mai, ta saa ti Yeso Kristi.

¹⁵ Shak kan ima ka kaya ya na rin, ɗat ka ɓwet ɗamam mii. Na shini sin ti ambe' nin akat, DeeƁwe ma wa kofsu ti rasman.

¹⁶ Shak ta andi, ka cu ti wei nanati.

¹⁷ A shunun, mas hun musut i mute amen, far hun shangi ta kyel i shini ima si zan musut i mute ima fu.

¹⁸ Fota ngga' ima ai yin lakansu ngang, mwashi i ma muhum laksu ti filya, shini hyang si mute i ha' ti wei ti shanggam i Kristi.

¹⁹ Nggwe' ames a kpa, ɓwe ames a ɗar ames, cinjangat ames mata shusho ames wi, mulut ames mata si ɗamam i naya.

²⁰ Shak ta andi, ashwa mwawei asikan ti ta fit. Ɗak kan kama kinti shit shwaiti Mabum amukan, Deembai Yeso Kristi.

²¹ Ayis ma wa shen ti lo' ima kati mai ya, ɓa ute fota lo' ames ma macinjangat, yis masti ro ti andok ames, yis yes ti shak ɗamam ta mabel yusti.