Filipya 2 - Findel i DeeƁwe Ti Alis i Ron

Ha' ti Mute i Kristi

¹ Kristi fu njeng i fwaran, matɓwet ames fu arak i mulut, Rin i DeeƁwe futu ya, hu ma mbe'i ti ɗiyai.

² Ɓurti andi i fwalsu, kin hun jakak amen u hya ti mute amu andek, matɓwet andek, rin andek hu ambe' andek.

³ Kan hu mas ɗama i ɓweti hai kwa, ka hu nggwak ajin kwa, rak hun ti hai, hun zani nyai shini si ɓinu.

⁴ Kan ha mu' ti tirim i haisa je kwa, mu'a ti i shini hwak.

⁵ Ambe' amu u te fota i Yeso Kristi

⁶ Kristi a DeeƁwe ti haisus, zan haisus kiga' hu DeeƁwe ii ɗama i ka'i gbwenjeng kwa.

⁷ Shak ta andi, zan haisus ii fo i ɗama kwa, zan mute i yere gbum, si alus fota maɗufal.

⁸ Yes ti matɗing i maɗufal, rak ti haisus, gu'ti hai wa mot, ima kolus mot tasi shanggam hai.

⁹ Ɓurti andi, DeeƁwe fas ngye, ha'us fit ta kyel mbai, ɗak fas asum ima ɓin shak asumam,

¹⁰ a tasi asum i Yeso, shak fwaran si wa muni mwa', ta fit hu na fisha hu na wii i fisha,

¹¹ hu shak alisas si wa laki ya kparara nyai, Yeso Kristi a Deembai, ɓa cinjangat u wa kyel i DeeƁwe Dee.

A Ka' Fota Ɓyar

¹² Ɓurti andi, a shunun, hu halansun ngang myan ima yin na kyel amu. Mwashi ima i ma akul hu hun kwa, mas huni u ɓin andi. Cuhun wei ti masti ro ima kof nyai a DeeƁwe bumu, ti myanat hu aro na lo'.

¹³ Ɓurti a DeeƁwe ima mas ro ta wii yuti ɓa hu kol mulut hu mas ro ta ngga' ima maɓweti ta.

¹⁴ Mas hun ɗamam shak kaciwa' rumung hu lulal i uɓet,

¹⁵ ɓa hu te ti sapai kan si shumu kwa, hu te fota fe i DeeƁwe kaciwa' leli ya na saa ti dang i waya, hun ɗaka' fota ɓyar ima mata fit.

¹⁶ Tehun gbenjeng tasi findel i mupwet, ɓa mwen ima Kristi humkyel i wa pati ajin nyai i masti tital i gbya' kwa, ro amen wa kpaa kwa.

¹⁷ Fati mulut amu si Deembai hai hu ro amu, ma fota kuna ɓursus, si wa shwaiti wash amen ya tasi kuna amu. Na fur andi, i wa pipelat na mulut, hu jakak akul hu hun shak,

¹⁸ hun hwak hu pipel na mulut, hun jakak akul hu yin.

Timoti hu Apafuroditus

¹⁹ I ma kintiɓwi tasi Deembai Yeso nyai, mwash i ro Timoti yes kyel amu, ɓa u humunkyel ti findel ima ɓa i wis njeng i fwaran si hun hai.

²⁰ I mati ɗeng ima mu' ti cala amu fota yis kwa.

²¹ Shak anggumi si mu' ti a haisus je, si mu' ti Yeso Kristi kwa.

²² Hu shang ngga' ima Timoti kof haisus ta, ni mas ro i Muro Maɗesi tikul fota dee hu al.

²³ I kintiɓwi ɓa mwash i rohus wa kyel amu na i ɗing aɗeng ima ma wa wisun nati.

²⁴ I fa mwawei si Deembai hai nyai, yin ti haisun mwash i yes kyel amu.

²⁵ I ɗingi ɗat ɓa i ti' nusun Apafuroditus u humkyel ta kyel amu, yis a nusun i ro maɓwol, ima ni ɓwol tikul, mamuro amu ima hu tukus ɓa u ɗing cala amen.

²⁶ I tuksus yes kyel amu, ɓurti gwel ɓa u ɗingu shak, tirim ɓurti hu hali nyai mati cala kwa.

²⁷ Awei, myana yis ti cala kwa, fota ma wa mot. Shak ta andi, DeeƁwe ɗing shum asussi, a ames kek kwa, ta ameni hwak, ɓa u fwangun ya ta kikyauwat na mulut.

²⁸ Ɓurti andi, i ɓin gweli ɓa i tukus, myan ima hu hum ɗingsus hu pipel na mulwat, yin i wa muhum tirim kwa.

²⁹ Shwai hun yus ti jakak saa ti Deembai, hu fa maɗufal fota yis ngye.

³⁰ Kat ndyong ɓa u mot ɓurti ro i Kristi, fa mupwet ames ɓa u masun bum ima hun hu ndok hu masuni kwa.