Filipya 1 - Findel i DeeƁwe Ti Alis i Ron

¹ Kaada moti ii ta kyel Pool hu Timoti, yarai i Yeso Kristi. I ma worong wa kyel i shak som sapai saa ti Yeso Kristi ta Filipi, akul hu som ro hu tabwa'.

² Mal maɗesi hu mute cala wa kyel amu ta kyel i DeeƁwe Demukan, hu Deembai Yeso Kristi.

Kofti Palang hu Fwal

³ Shak myan ima i mbe'u, i palang DeeƁwe amen.

⁴ Myan ima yin fwal, i fwalani ti jakak ngang ɓursu,

⁵ ɓurti futi hai amu nasi Muro Maɗesi, tasi mwen i bya' yes mwashi.

⁶ I fa mwawei nyai, DeeƁwe fur ro maɗesi na saa yuti, ma wa koli tasi nggwe'i, wa mwen ti muhumkyel i Yeso Kristi.

⁷ A kiga' ɓa i hali ati na hai yuti ɓurti hu mana mulut amen. Na yin ta shitam wi, ahun na yin ɓweng ti sai, yin fwang ti Muro Maɗesi nyai, a awei, shak asui hu mat mal maɗesi i DeeƁwe akul hu yin.

⁸ DeeƁwe a shit amen, shang ngga' ima i ɓwetsu ta shak asui, ta ngga' ima Yeso Kristi masi ta.

⁹ Fwal amen mai, ɓa matɓwet amu u cu wei ti ngye, saa ti shangi hu piris,

¹⁰ ɓa hu shang ngga' ima hu ben aɗeng ima ɓin ɗat, ɓa hu te ti sapai kaciwa' mafwashi yes mwen tima Kristi ma wa muhumkyel.

¹¹ Yeso Kristi ma wa hyasu ti mute manderei, ima ma wa yes ti ngye hu ha' ti asum i DeeƁwe fit.

Muro Maɗesi Matɓuya ɓurti Shitam i Pool

¹² A shunun, mwashi i ma ɓweti hu shangi nyai, ɗamam ima si wisun, a sin si kin Muro Maɗesi matɓuya.

¹³ A ɓurti andi, shak som i ɗing ti kyel ya ta wur i makai hu shini hwak si shangi nyai, i mata shitam wi a ɓurti Kristi.

¹⁴ A ɓurti mute amen ta shitam wi, ɓwai mbai i shunukan ta saa ti Deembai, si wis njeng i fwaran i lak ti findel i DeeƁwe ti rwish ya kaciwa' myanat.

¹⁵ A ti mwawei shini si mba ti findel i Kristi tasi nadon hu shaal, shak ta andi, shini amesi ii ta mulut muɗesi.

¹⁶ I dalai si ɓwet Kristi, si shangi nyai, i ma nati ɓa i ɓweng Muro Maɗesi si yis hai.

¹⁷ I bya'i si mba ti findel i Kristi ti ambe' i ɓweti hai, si ti mwawei kwa, ɓa si hum tuksun puɓwar hai, myan ima yin ta shitam wi.

¹⁸ Ani mati tirim kwa? Na aɗeng ima kinus masti maiyi ii fyarat ahun ii mwawei, na sin mba ti findel i Kristi na fiselal mii, i wa jakak ɓurti mai. I wa cwai ti wei ti jakak hwak,

¹⁹ ɓurti i shangi nyai, a fwal amu hu bum ima yes ta kyel Rin i Yeso Kristi, aɗeng ima wisun ma wa hatat ii bum amen.

²⁰ I kinti shit hu ɓwi nyai, i wa woti shusho kwa fweng. Shak ta andi, i wa cwai ti wei ti rwish ta Kristi wi fota ngga' ima i mana ti, ɓa Kristi u wis ngye na lo' yunti, na yin ti mupwet ahun na i mot.

²¹ Na kyel amen, na i pwet, a ɓurti Kristi, na i mot, ɓin ɗat.

²² Na i mupwet na, kof i wa cwai ti wei ti ro maɗesi. I shangi ima ɓin kwa!

²³ I cuwirun na saa ti apili, i ɓweti ɓa i pak i te hu Kristi, ima a yis ɓinun ɗat fwet.

²⁴ A ɓursu, i ɗingi ɓin ɗat ɓa i cu wei ti mupwet.

²⁵ I te mangra si mai, i shangi nyai i wa mupwet ɓa i cu wei ti bumsu shak hu ngye, hu jakak si fati mulut amu hai,

²⁶ ɓurti myan ima i hum yes kyel amu, jakak amu saa ti Kristi Yeso u hya u rangya ɓursun.

²⁷ Shak aɗeng ima fur, mas hun mute ta fisel ima ɓa u yes ti ngye tasi Muro Maɗesi i Kristi. Na i yes i ɗingu ahun i yes kwa gbaak, i wa hali nyai hu ma andek ta saa ti Rin. I wa shangi nyai hu ka'ti agung hun makutuk fota maɗufal andek ɓurti mute i fati mulut tasi Muro Maɗesi hai.

²⁸ Kan hu mwen som i ha' ti wei ti hun fo kwa. A mai makofsus nyai, si wa kpa, hun hu wa wis ti bum ta kyel i DeeƁwe.

²⁹ Si fu mal mai ɓa hu fa a mwawei si Kristi hai kek kwa, ɓa hu wo a shum ɓursus hwak.

³⁰ Ɓurti hu ma makutuk fota ngga' ima ai hu ɗingun ta, mwashi hu hali nyai ima i hai.