Filimon 1 - Findel i DeeƁwe Ti Alis i Ron

Hai i findel ima mana kaada i Filimon

¹ Ta kyel i Pool, ima ma mano' ɓurti Yeso Kristi, hu ta kyel i nusikan Timoti. Wa kyel i Filimon, mwes amukan hu mwes i ro,

² hu som koltifai ima si shwayan ta wur ama. Hu tusikan Afiya, hu nusikan maɓwol i DeeƁwe, Akibus hwak.

³ Maɗesi hu murak i mulut ta kyel i DeeƁwe Demukan hu Deembai Yeso Kristi.

Palang hu fwal

⁴ Shak myan ima i mbe'a i palaang DeeƁwe ɓursa,

⁵ ɓurti i hal musut i fati mulut si Yeso Kristi hai, hu matɓwet si som sapai ima hati.

⁶ Fwal amen ayis nai, naɗin futi hai amu hu som koltifai u ngye. Na te andi, shangi amu hu shak maɗesi ima ka mati ta wii i Yeso Kristi u ngye hwak.

⁷ Musut i ɓweti ama a nusun, fan mbai jakak hu njeng i fwaran hwak. Ha fa som i sapai jop ti mulwat hwak.

Fwal ti Filimon ɓurti Onisimus

⁸ Ɓurti andi, i ti njeng i mulut, ɓa i laka aɗeng ima ɓa ha masi saa ti Kristi,

⁹ shak ta andi, i ma ɓwetsa, i ma fwal sa ɓa ha bumun. I mas mai ɓurti yin wash Pool, mwashi i ma mano' ɓurti Yeso Kristi.

¹⁰ Ɓurti andi, i ma yes ti fwal na kyel ama ɓurti Onisimus, ima mii al amen na saa ti Yeso Kristi. Myan ima yin ta mano' wi, i te ii dee ta kyel mes.

¹¹ Ai mukon mufai yis yus ii maɗufal i gbya' ta kyel ama, mwashi humkyel ii maɗufal i ɓweti yes kyel ama hu yin hwak.

¹² I ma tuksus muhumkyel na kyel ama mwashi, yis ti haisus, a mulut asun.

¹³ I ɓwet ɓa u tena kyel amen, ɓurti u masun bum ii fo ma, myan ima yin ta mano' wii ɓurti findel i DeeƁwe.

¹⁴ Ɓurti andi, a ɓweti amen ɓa i kina kanggang kwa, i ɓin ɓweti ɓa ha mas maɗesi tasi ɓweti ama. Na wa' ha ɓwet kwa, i wa masa ɗama kwa fweng.

¹⁵ Nan, hona i mukonan vaat, ɓurti ɓa ha hum matsus hu te tikul kaciwa' matkaar, nasi mwashi wa myan hu myan.

¹⁶ Mwashi ma muhum mute ii yere kyek kwa, ɓin njeng i mute ii yere. Mwashi ma mute ii nusa mandyasi ɓurti Yeso. Na kyel amen, a maɗufal i ngyeng, ma wa ɓin ti mute ii maɗufal mandyasi ta kyel ama, hu nusa ta wii i Deembai.

¹⁷ Ɓurti andi, na ha ha'un fota mya i ro, mata yus ra apil ta ngga' ima ha wa mat sun ta.

¹⁸ Na ai masa ɗama niin mafwashi, ahun mati wufer ama niin ɗak, tuka kinggati na hai yunti.

¹⁹ Yin Pool, i worongi ti ra amen nyai, i wa talsa. Te a kpang ɓa i mbe'ai nyai, hati haisa hwak a amen kwa?

²⁰ Ɓurti andi, a nusun, ima fwal sa ɓa ha masun maɗesi amai, ɓurti asum i Yeso, fota nusun ta wii Kristi ima fan jop ti mulut!

²¹ I fa mwawei nyai, ha wa masun aɗeng ima i lula, u ɓin andi hwak. Ayis nai kin i worongai.

²² I ɓweti ha ɗakun ti kyel i mukon, ɓurti i kintiɓwi DeeƁwe ma wa hal ti fwal amu shak, u kin i yes kyel amu.

²³ Epafaras, ima ni mana mano' wi tikul ɓurti asum i Yeso Kristi, ma too' su hwak.

²⁴ Som ima ni ro tikul hwak, Mak, hu Aristakus, hu Dimas hu Luka shak sima too' su.

²⁵ Maɗesi i Deembai Yeso Kristi u te tikul hu rin amu shak.