Afisa 6 - Findel i DeeƁwe Ti Alis i Ron

Fe hu hu Dee

¹ Hun fe, ɓurti Deembai hal hun findel i hu dee, mai a kiga'.

² “Faha dya hu nasa ngye” a yis mii anggut i bya' akul hu kintiɓwi

³ “ɓa ɗamam si wa hai ndere ha yashna na naya.”

⁴ Hun hu dee, ka hu mas aɗeng ima u kin fe amu futut kwa, fo i mandi kof hu yus ti fisel, hu taɓakus ta fisel ti Deembai.

Yere hu Dee Mawur

⁵ Yarai, rak hun ti hihai ta mabel i hu dyo i naya ta fati ngyei hu ka'ti lo' ya, hu mulut ti mwawei, fota ngga' ima hu hal ti Kristi ta.

⁶ Ka hu rak ti hihai ɓurti ɗingi i shishat, ɓa hu wis wash mapeli myan ima shishat ames sin yu hai kek kwa, hu te fota yarai i Kristi, hun masti aɗeng ima DeeƁwe maɓweti ti mulut andek.

⁷ Mas hun ro amu ti shak mulut, fota huma masti a Deembai ro, a ɗufal kwa.

⁸ Shang huni nyai shak maɗesi ima maɗufal masi, na yis a yere ahun a al i wur gbak, Deembai ma wa fasus sai i muro ames.

⁹ Hun hu dee, kol hun yarai amu na fisel moti hwak. Ka hu fas myanat kwa, shang huni nyai, hun hu yarai amui shak asui hu mati Deembai amu andek ta fit, mati ɓweti hai kwa.

Ɗamam i Ɓwol i DeeƁwe

¹⁰ Findel i dala a yis nai, njeng hun saa ti Deembai hu andok mbai ames.

¹¹ Ru' hun shak ɗam i ɓwol ima DeeƁwe fa ɓa hu te mangra ti njeng hu zan wei si shak shingat i Shatan hai.

¹² Ɓin amukan a hu ɗufal ima si ti lo' hu wash kwa, a hu rinan mufwashi ima si ta fit, hu ima si ti kaitat, hu andok, hu ima kaitat i maɓing i waya moti mata ra yusti.

¹³ Ɓurti andi, ru' hun shak ɗam i ɓwol ima DeeƁwe fu, ɓa hu te mangra na mwen mufwashi andi ti yes, takfai tima hu mbit ɗamam mii shak, si wis su mangrai.

¹⁴ Tehun mweret, mwawei ti te i mano' i manggiring, ti bong i fata' i mute manderei,

¹⁵ hu sisai amu kiga' si mulang ti muro maɗesi i mute cala.

¹⁶ Takfai ti mai shak, zan hun rijing i fati mulut, ima hu wa fwang ti shak nvyaha i man i Shatan.

¹⁷ Zan hun gemhai i bum hu awal i Rin, ima a findel i DeeƁwe.

¹⁸ Fwal hun saa ti Rin ta shak myan ti shak musut i fwal hu lulal. Ti mii ta ambe' wi, tehun mweret ngang cuhun wei ti fwal ɓurti shak som sapai.

¹⁹ Fwal hun ɓursun, ɓa myan ima i ɓu fo amen ya, DeeƁwe u fan findelal ima i lak kaciwa' myanat ɓa ɗufal si shang kinggyongat i Muro Maɗesi,

²⁰ ima i mii mamuro na wii shitam wi. Fwal hun ɓa i mba findeli kaciwa' myanat, ta ngga' ima ɗat ɓa i lak ta.

Too' i Dala

²¹ Tikikus, nusun hu mahyaita yere i Deembai, ma wa laksu ɗamam shak, ɓa hun hwak ashang hu shang ngga' ima ita hu mute ima i mata wii.

²² I ma rosus na kyel amu ɓurti ɓa hu shang ngga' ima ni ta, ɓa hu wis njeng i fwaran.

²³ Cala ta kyel i shunukan, hu matɓwet akul hu fati mulut ta kyel i DeeƁwe Dee hu Deembai Yeso Kristi.

²⁴ Mal Maɗesi wa kyel i shak ima si ɓwet Deembai amukan Yeso Kristi ti matɓwet ima mbyat kwa.