Afisa 5 - Findel i DeeƁwe Ti Alis i Ron

¹ Mas hun mute i kaani ti DeeƁwe, mute i fe ima si ɓwetus fwet.

² Mas hun mute i matɓwet, ta ngga' ima Kristi ɓwet kanta, fa haisus ɓur sikan, fai mafyongi, kuna wa kyel i DeeƁwe.

³ Ka si doru ta ro ti fe se hu musut i ro ti zuruk, hu yok na saa yuti kwa, ɓurti mai maɗengi ɗat si ɗor ta hai i som sapa kwa fweng.

⁴ Ka hu te ii som findel i zuruk, hu i halyang kwa, si ɗat si hun hai kwa fweng. Foi mandi ngang hun palang ti DeeƁwe.

⁵ Shang hun mai nyai, ma masti ro ti se, hu ma ro ti zuruk hu yok, mayus andek hu makoltifai ti harkyel, si mati ɓwayi nin ta kaitat i Kristi hu DeeƁwe kwa fweng.

⁶ Ka ɗeng dangu ti findelal i gbya' kwa, a ɓurti musut i ɗamam mii si dwal futut i DeeƁwe si som ima si hal findel kwa.

⁷ Ɓurti andi, ka hu fut hai hu sin kwa.

⁸ Ai hun ta maɓing wi, mwashi hu mata kweneng wi saa ti Deembai. Mas hun mute i fe i kweneng,

⁹ ɓurti kweneng a yis al shak mute maɗesi, hu mute manderei, hu findel i mwawei.

¹⁰ Hu ɗingi nyai hu kof aɗeng ima ɗat ta mabel i Deembai.

¹¹ Mas hun maleng ti ro i gbya' musuti i maɓing, foi mandi hu kof ya na saikyel.

¹² A ɗama i shusho hu lak aɗeng ima som njeng na hihai si masi ta wii mufot wi.

¹³ Shak aɗeng ima si kof ya nasi kweneng wi, ɗufal si ɗyang mwawei i aɗengi.

¹⁴ Ayis nai kin si ni, “Ɓusho ha, ha ima hama ɗarak! Luka fit ta mot wi, Kristi u cinjangya ta wii ya ti.”

¹⁵ Kam huni loo, si ngga' ima hu mute ta. Ka mas mute fota halyang kwa, hu mas mute i som shingat.

¹⁶ Mas hun ro ti shak myan ima hu wisi, ɓurti mukonani si ɗat kwa.

¹⁷ Ɓurti andi, ka hu halngyat kwa, shang hun aɗeng ima Deembai ma ɓweti.

¹⁸ Ka hu fiil ti likit ima kyan maɗufal u te mute i hal ti ɗat si ɓwi i kaciwa' shusho. Foi mandi hya hun ti Rin.

¹⁹ Ngyere' hun ɗiyaiyi ti nakwai, hu adorai, hu adorai i ta' ti rin. Lak hun adoraiyi ta mulwat amu wa kyel i Deembai,

²⁰ hun palang ngang wa kyel i DeeƁwe Dee ɓurti shak ɗamam, saa ti asum i Deembai amukan Yeso Kristi.

²¹ Fahun hihai si ɗiyai wi saa ti fati ngye ɓurti Kristi.

Arof hu Arya

²² Arof, fahun hihai amu ta kyel arya amu fota hu masi wa kyel i Deembai.

²³ Ɓurti re a hai i mbor fota ngga' ima Kristi a hai i suɓut i som koltifai, ima a lo' ames, ima a yis a Mabum.

²⁴ Fota ngga' ima suɓut i som koltifai si fa hai ta kyel Kristi, andi hwak arof a kpak si fa hai ta kyel i arya ames ta ɗamam ima si masi shak.

²⁵ A arya, ɓwet hun arof amu, fota ngga' ima Kristi ɓwet suɓut i som koltifai ames ta, fa mupwet asus ɓursut,

²⁶ Yis sapa suɓut i som koltifai ya ti mbaitat i findel ames, sapasya ti sassus ya ti ham.

²⁷ Kristi mas mai ɓa u te ti suɓut i som koltifai ima si ti cinjangat, kaciwa' le, hu ɗama nin i zuruk kwa, si te ti sapa, kaciwa' mafwashi.

²⁸ Na fisel mwandeki hwak, a kpak arya si ɓwet arof ames fota ngga' ima si ɓwet lo' ames ta. Maɗufal ima ɓwet mborsus ɓwet haisus.

²⁹ Awe tyai u nggwes ti lo' ames ya? Ka nyai maɗufal ma wa far ti cwa u cu ɓa u ɗing ti lo' ames fo ndere hoo? Angga' ima Kristi ma ɗing ti suɓut i som koltifai ames ta nai.

³⁰ Kan, a lo' ames.

³¹ “Ɓurti mai, maɗufal ma wa honti dees hu nasus, u malis si mborsus hai, sin apil mii si te ii lo' andek.”

³² Mai aɗengi mati kinggyongat fwet, ima findel si hai i Kristi hu suɓut i som koltifai.

³³ Shak ta andi, a kpak konggi amui u ɓwet mborsus fota ngga' ima ɓwet haisus ta, andi hwak mbori a kpak ti fa re amet ngye.