Afisa 4 - Findel i DeeƁwe Ti Alis i Ron

Mute Andek i Lo' i Yeso

¹ Yin ima i ta mano' ta shitam wi ɓurti Deembai, i ma fwalsu ɓa hu mas mute ima wa kiga' hu lai ima hu mat.

² Ngang tehun ti murak na hai, hu ka' hihai hu ka'ti agung ti ɗiyai saa ti matɓwet wi.

³ Ni hun gbuk hu fwang mute andek tima Rin fu moti, ta fisel ti mute cala tima ti kinu mute andek.

⁴ A lo' andek kuɓa, Rin andek, fota ngga' ima si laiyu ta saa ti kintiɓwi myan ima si laiyu ta,

⁵ Deembai andek, fati mulut andek, batisma andek,

⁶ DeeƁwe andek hu Dee i shak, ima mii shak, ta fisel ti shak, hu ta wii i shak.

⁷ Shak ta andi, si fakan mal maɗesi ti andek-andek ta ngga' ima Kristi mba ta kiga'.

⁸ Fota ngga' ima Worong ni, “Myan ima ɗu ta fit wa dul ra i mbot i som ima sita mano' wi fa ɗufal mal akat-akat.”

⁹ Ami mii “ɗu ta fit” ya? Ma nyai ti bya' ɗor ta wii fisha tawe!

¹⁰ Yis ima ɗor ayisyi ɗuya wa fit lang shak fit i hai, ɓa u hya shak naya ya.

¹¹ Ayis fa shini ɓa si te ii som muro, shini ii som shit, shini ii som but ti Muro Maɗesi, shini ii som fwangi hu som kofiti,

¹² ɓa si sinzam ɗufal i DeeƁwe ɓurti ro, ɓa ima si mi lo' i Kristi si ngye.

¹³ Mai ma wa cwai ti wei hal ka yes ka te ɗama andek saa ti fati mulut hu mute andek saa ti shang ti Al i DeeƁwe. Ɗak ka ngye, ka kol hyaita kiga' i mute i Kristi.

¹⁴ Si mas mai ɓa kan ka humkyel ta mute i fe kwa, ahun ka te fota som ima si ɗa'at buu sin dangsus, sin muksus ti fyarat i konggi musut i kofiti, sin ro ti shingat hu bwitin i ɗufal saa ti fiselal i dang.

¹⁵ Foi mandi, kan lak ti mwawei saa ti matɓwet wi, ka wa ngye saa ti shak ɗamam ka te fota Kristi, yis ima mii haiyi.

¹⁶ Ta si yis ɗi, shak ɓwayai i lo' si shwai si ka' ɗiyai ta fisel ti ro i konggi sisyari, sin ngye, konggi ɓwai i lo'i yis ngye kiga', yis mata' si mute saa ti matɓwet.

Mute Mumwai Saa ti Kristi

¹⁷ Mwashi, i ma laksu mai gbak-gbak saa ti asum i Deembai, nyai a kpang hu hon mute i halngyat hu ambe' mafwashi ima Ramam si massi.

¹⁸ Mulwat asus ti hya ti maɓing. Si kaartus ti mupwet ima DeeƁwe ma fai, halngyat mata wii yusti ɓurti njeng na hihai ames.

¹⁹ U mai si ti shusho kwa fweng. Si fa hihai ames ta zuruk wi, hu gwel i masti shak ɗamam i zuruk.

²⁰ Hun, angga' ima hu shang Kristi ta nai kwa.

²¹ A kpang hu hal ɗamam si yis hai, si kof si yis hai ta fisel ti mwawei tima ti ta wii i Yeso wi.

²² Si kofu ti, si ngga' ima ai hun masti mute amu ta, ɓa hu mbwet mute mawili amu ya, ima rafatus ɓurti ɓwet ti ɗamam i dang,

²³ ɓa si hatatu ii mumwayani saa ti mute hu ambe' i mulwat amu,

²⁴ ɓa hu ru' mupwet mumwai tima DeeƁwe lu' u ti, musut asus saa ti mute manderei hu i sapa.

²⁵ Ɓurti andi, a kpak konggi amui u mbwet fyarat ya ka lak ɗiyai mwawei ya, ɓurti shak a sikani, a lo' andek.

²⁶ “Saa ti futut ama, ka ha mas mafwashi kwa.” Ka hu hon futut u cu wei hal ndak i ɓwe kwa.

²⁷ Ka hu fa Shatan kyel ta kwa fweng.

²⁸ Maɗufal ima ma shyaran ti shir, ka hum kwa fweng, a kpak u mas ro ti ra ames, u mas ɗama ima u bum ti shini ta, ima si fari wet.

²⁹ Ka findel mafwashi i zuruk nin lang ya ta fo yuti kwa, a findel i bum u lang ya ɓurti ta' ti ɗiyai si hai i tirim ima luk fit, ima nan u bum som ima si hali.

³⁰ Hun hwak kam huni lo, ka hu kin Rin Masapai i DeeƁwe u kikyau ti mulut kwa. Ayis mii mahalal ima DeeƁwe fakan ma wa matkof mwen ti dumi ya nyai hun ames.

³¹ Shuhun shak mute maɓwoli ya hu mulut mu oi ya, hu futut, hu ɓin, hu cwai ti sisai, hu shak musut i ka'ti ɗiyai ta mulut akat-akat.

³² Mas hun ɗiyai maɗesi, hu ɗing shum i ɗiyai, hun shwaiti ɗiyai ya, fota ngga' ima ta wii Kristi, DeeƁwe shuhui ya.