Afisa 3 - Findel i DeeƁwe Ti Alis i Ron

Pool ma But ti Findel wa Kyel i Ramam

¹ Ɓurti mai, yin Pool, i te i al i shitam ɓurti Yeso Kristi ɓa u tehu hun Ramam hai i ɗama i fa su njeng.

² I fa mwawei hu hal mangga' ima DeeƁwe, sa ti mal maɗesi ames, fan mal i ro mai ɓurti masu bum,

³ DeeƁwe kofun aɗeng ima mata mufot wi, kinun i shangi fota ngga' ima i worong vaat.

⁴ Na hu mbe' mii ɗamami, ɗak a yis nai hu shang ti fai i ɗamam munggyongi ta wii i Kristi,

⁵ ima DeeƁwe nggwes i kofti ɗufal i waya shini si shangi fota ngga' ima mwashi kof ya wa kyel i fe muro hu som shit ima si ti sapa ta fisel ti Rin.

⁶ Ɗamam munggyongi mii ii ta fisel ti Muro Maɗesi ima Ramam si cwai ti kop akul hu Isar'ila, si te ii lo' andek, hu som cwai tikul saa ti findel i kintiɓwi ta wii i Yeso Kristi.

⁷ I te ii yere i Muro Maɗesi mai ti fisel ti mal maɗesi i DeeƁwe ima fan ta fisel ti ro i andok ames.

⁸ Ayin, a mavaati ta saa ti shak ɗufal i DeeƁwe, fan mal maɗesi mai, ɓa i but findeli wa kyel i Ramam ramwayat i Kristi ima ɓin njeng i mbai,

⁹ DeeƁwe ima lan shak ɗamam benun ɓa i bum ɗufal si shang ɗamam manggyongi, ima ti ɓele fot ti ya ta wii yusti.

¹⁰ Ɓweti ames a yis nai, tasi suɓut i som koltifai, DeeƁwe ma wa kofti piris akat-akat wa kyel som kaitat hu ima si ti andok ta fit.

¹¹ DeeƁwe mas mai, ta ambe' ames ima mati tasi bya', hya rosus tasi Yeso Kristi Deembai amukan.

¹² Ta wii yusti hu ta fisel ti fati mulut tasi yis hai, ka wis njeng i mulang ta mabel i DeeƁwe ti mute i cati i ra hu mulut andek.

¹³ I ma fwalsu, ka hu zan ɓwi ya ɓurti shum ima i wo ɓursu kwa, a shum mai a yis mii cinjangat amu.

Fwal Ɓurti Som i Afisa

¹⁴ A ɓurti aɗeng mai kin i shu i mafwaran ta mabel i Dee,

¹⁵ ii ta kyel ames konggi gungi ta fit hu na naya ti wis asum amet.

¹⁶ I fwal nyai, ta saa ti ramwayat i cinjangat ames ma wa fasu njeng ti andok ta Rin ames ta wii i mulwat amu,

¹⁷ ɓa Kristi u te ta mulwat amu ta fisel ti fati mulut. I ma fwal hwak nyai, ɓa hu shu sisyar hu njeng si matɓwet hai,

¹⁸ hu wis andok akul hu shak som sapa, hu shang mal magiliki i matɓwet Kristi, ngga' ima baang amet, hu sisyat amet, hu kinggyongat amet mata.

¹⁹ Hun hwak hu shang matɓwet i Kristi, ima ɓin njeng i shangi, ɓa hu hya ti shak musut i mute ti DeeƁwe.

²⁰ Cinjangat u te i DeeƁwe amukan, ta fisel ti andok ames na saa kanti, maro yis masti ɗamam ɓin ti shak aɗeng ima ka fwal, hu aɗeng ima ka mas ambe' ames.

²¹ Mbaitat u ames na wii som koltifai hu wii i Yeso Kristi, wa shak waya, yes myan hu myan! Aandi.