Afisa 2 - Findel i DeeƁwe Ti Alis i Ron

Ta Mot wa Mupwet

¹ Ai hun a funatat, ɓurti mulang ti ta amu hu mafwashani amu,

² ima ai hun mute ta myan ima hun koltifai ti fisel i naya moti, hu i makai i kaitat i se, rin ima maro mwashi tasi ɗufal ima si hal findel kwa.

³ Shak a sikani ai kan andi, kan koltifai ti gwel i lo' amukan, hu masti aɗeng ima yok i lo' kin kan masi, ɓurti mute i lo' mai, futut i DeeƁwe ɗorkan hai fota ngga' ima mata si anggum i ɗufali hai.

⁴ A ɓurti mbai matɓwet ames ima ma ɓwet sikan ti, DeeƁwe yis ma gu'ti ashur gilik,

⁵ hatat tikan ii mupweti hu Kristi myan ima kakan ii mumwatanani ta wii i mulang ti ta amukan wi. Ii ta fisel ti mal maɗesi hu wis bum.

⁶ DeeƁwe zan kan fit akul hu Kristi, kama mun akul hu yis ta fit ta wii Yeso Kristi.

⁷ DeeƁwe masi andi, ɓurti waya tima ti yes, u kof ramwayat i mal maɗesi ames ima mati anggwe' kwa, ima matkof ta saa ti maɗesi ames yes kyel amukan ta wii Kristi Yeso.

⁸ DeeƁwe bumu ta fisel ti mal maɗesi myan ima hu fa mwawei. Hu ndok hu nggwak ajin ɓurti mai kwa, a mal ta kyel i DeeƁwe.

⁹ A ta fisel ti ro kwa, ɓurti ka ɗeng ndok u pa ajin.

¹⁰ Kan hai sikan a DeeƁwe lu' tikan, lan kan ta wii Kristi Yeso wi, ɓa ka mas ro maɗesi ima DeeƁwe ai hwer tuu kin ɓa ka masi.

Andek ta Kristi wi

¹¹ Ɓurti mai, mbe' hun ngga' ima ai hun ima a Ramam tasi al, ima si laiyu ii “som i wa' mukwen” ta fo i som ima si lai haisus ii “som mukwen”. Mukwen ima si masi, si mas a lo'i ti ra i maɗufal.

¹² Mbe' hun ta myan ani si ɓelu ya ta Kristi wi, hu yu i Ramam ta kyel som i Isar'ila, hun a mwalmwat si dakwa ima DeeƁwe lak. Ai hu mas mute amu na naya kaciwa' kintiɓwi hu kaciwa' DeeƁwe.

¹³ Mwashi hu mana saa ti Kristi Yeso ima ai hun yu ti maleng, ɗak si her tu na nggas ta fisel ti wash i Kristi.

¹⁴ Kristi haisus a cala amukan, yis ima yes ti cala saa ti Ju hu Ramam, a yis bamkan ya, ka te andek ta fisel ti nggul ti bang i munggwya ya, ima kar ti kan. Kristi fa lo' ames

¹⁵ ɓa u jak anggut i Mosis ya ma findelal hu anggutat. Yis masi andi ɓa ta kyel ames u lu' ti gung mumwai ta gung apil mii wi. Ii na fisel moti yes ti mute cala na saa yusti.

¹⁶ Yis masi andi ɓa u ɗak tus sin shak apili ta kyel DeeƁwe, si te ii lo' andek, ta fisel ti mot tasi shanggam hai. A fisel tima zan munggwya ya aɗeng ima ai kar tus.

¹⁷ Yis yes mba hu Muro Maɗesi i cala, hun ima ai hun yu ti maleng ti DeeƁwe, hu cala wa kyel i Ju ima si mana nggas.

¹⁸ Ii ta kyel ames shak asikani gung apil mii, ka wis peng i yes kyel i Dee ta fisel ti Rin andek.

¹⁹ Ɓurti andi, hun hu muhum mute ii Ramam hu mwalmwat kwa. Hun a fe wufen akul hu som i DeeƁwe hu som wur ames,

²⁰ ima si ta' tasi mahuhur i fe muro hu som shit, Yeso Kristi ti haisus fota afung mbai mandyasi i nggwa i mahom.

²¹ A si yis hai ta'i shak ti shwai ta kyeli, ɗak ti luk fit ti te ii wur ima si sapa ya wa kyel i Deembai.

²² Hu a ɓwaiyi i ta' ima Kristi ta' ɓa u te i kyel ima Rin i DeeƁwe u te ta.