Afisa 1 - Findel i DeeƁwe Ti Alis i Ron

¹ Kaada moti ii ta kyel i Pool mamuro i Yeso Kristi ti ɓweti i DeeƁwe, wa kyel i som sapa ta Afisa, som i hyaita ta saa ti koltifai ti Yeso Kristi.

² Mal maɗesi hu cala wa kyel amu ta kyel i DeeƁwe Demukan hu Deembai Yeso Kristi.

Maɗesi ta Kristi wi

³ Shak palang wa kyel i DeeƁwe hu Dee i Deembai amukan Yeso Kristi, yis ima kin kan shak mute i disyo' i rin ta fit ima Kristi kol kan.

⁴ Yis ben kan ta saa yusti kaciwa' ti si lan naya, ɓa ka te ti sapa hu kaciwa' mafwashi ta mabel ames. Saa ti matɓwet,

⁵ DeeƁwe tuu no' kwit i mat sikan ta kyel i Yeso Kristi ta saa ti ɗat si ɓwi ames hu ɓweti ames,

⁶ ɓa ka palang cinjangat i mal maɗesi ames, ima fa kan mal ta kyel i Al andek ames ima ɓwetus.

⁷ Ka wis dumi ya ta wii i Yeso, ta fisel ti wash ames. Ka wis shwaiti mafwashi ya, ta fisel ti ramwayat i mal maɗesi i DeeƁwe,

⁸ ima shukan shak piris hu shangi hai.

⁹ DeeƁwe kof kan ɗamam ima si ta mufot wi, i ambe' ames ta fisel ti ɗat si ɓwi maɗesi ames, ima kin ta wii Kristi.

¹⁰ Ɓa ka kin ta saa ti ro wi, na myan si yes si hyata kiga' ɓa u yes ti shak ɗamam ta fit hu na naya ta kyel andek, ta manjing i Kristi.

¹¹ DeeƁwe ngang ma masti aɗeng ima maɓweti, a yis nai ben kan ii som cwai ti kop, si lu' tikan ta ngga' ima zan ta mulut wi, yis ima ma masti shak ɗamam ɓa si wa kiga' si ɓweti i ambe' ames hai.

¹² Yis mas mai ɓa kan ima ka mii bya' si fati mwawei si Kristi hai, ka te ii ɗama i jakak si cinjangat ames.

¹³ Hun hwak hu ta saa ti Kristi myan ima hu hal findel i mwawei, Muro Maɗesi i bum. Ngga' ima hu fa mwawei si Kristi hai, DeeƁwe kinu asum ii ames ayis nai fu Rin Masapai, ima fa kintiɓwi ti hwer.

¹⁴ Rin Masapai a yis mii mwai i kop amukan yes myan i dum ti som ima DeeƁwe hatatus ii ames, ɓurti mbaitat i cinjangat i asum ames.

Kofti Palang hu Fwal

¹⁵ Ɓurti mai hwak, tasi myan ima i hal mangga' i fati mulut amu ta kyel i Deembai Yeso hu matɓwet amu ɓurti shak som sapa,

¹⁶ i hon fati palang ɓursu kwa, yin mbe'i ti hun ta saa ti fwal amen.

¹⁷ I cu wei ti fwal nyai, DeeƁwe i Deembai amukan Yeso Kristi, Dee macinjangat, u fu Rin i piris hu i ɗingi ta rin wi, ɓa hu shangus ndere.

¹⁸ I ma fwal hwak ɓa shishat i mulwat amu si matɓuya, nan ɓa hu shang kintiɓwi ima yis laiyu ta, ramwayat i cinjangat i kop si som sapa,

¹⁹ ngye i mbaitat i andok ames lang kaani si fati mwawei hai. Andok mai ma fota ro na saa kanti, ti mbai njeng ames,

²⁰ ima masti ro ta wii Kristi myan ima luk fit ta mot wi, ɗak fas kyel i mute ta ra i ucwa ames ta fit.

²¹ Mwashi Kristi ɓin shak som kaitat hu som mbaitat hu som andok hu som kofti ajin, si asum ima ɓin shak asumam ima si fai, na naya moti kek kwa, shak ta waya tima ti yes.

²² DeeƁwe fa shak ɗamam ta mabel yusti, ɗak no'us si hai i makaitat i shak ɗamam ɓurti maɗesi i som koltifai,

²³ ima a lo' i Kristi. Kristi kin si hya ta nggya-nggya, yis ima hyaha shak ɗamam ta kikyal ti haisus.