3 Jwon 1 - Findel i DeeƁwe Ti Alis i Ron

¹ Ta kyel i wash mbai, Wa kyel i mwen Gayus ima i ɓwetus fwet, ɓweti i mwawei.

² A mwen, i fwal ti DeeƁwe ɓa ha wis cala hu shak mute ama u wa cala ndyalam, fota ngga' ima mupwet asa ti ti cala ta.

³ Shini shunukani si yes si lakun ngga' ima ha ka' mwawei ta, hu ngga' ima ha cwai ti wei ti ati si mwawei hai, aɗengi fan pipelat na mulut fwet.

⁴ Aɗeng ima ma wa ɓin ti fasun pipelat na mulut fwet, ɓa i hali nyai, femen si ati si mwawei hai.

⁵ A mwen, hati myanat ti DeeƁwe fo si shak ɗamam ima ha masti shunukani, shak ta ngga' ima si mii mwalmwat ta kyel amai.

⁶ Si lak som koltifai musut i matɓwet ama. Mawa mute i ɗama maɗesi, na ha ti'us ta fisel tima DeeƁwe ma ɓweti.

⁷ A ɓurti Asum mai si rangya, si nggwes i mat ti bum, ta kyel i som ima wa' a som koltifai.

⁸ Ɗat ɓa ka bum musut i ɗufal mii, ɓurti ɓa ka mas ro tikul ɓurti mwawei.

⁹ I worong wa kyel suɓut i som koltifai, yis Diyotrifas ima ɓyat ɓa u te ta wei ti ɗufal, haal findel kwa.

¹⁰ Na i yes, i wa lak ti shak ɗamam ima ma masi, musut i haar i ka'ti ɗamam ta ɗar ima ma laki na hai kanti. Mai ndokus kwa, yis ti haisus mat shunukan kwa fweng. Sha som ima si ɓweti ɓa si mat shunukani, nggas ya ta saa ti som koltifai wi.

¹¹ A mwen, kan ha ha' mute mafwashi mai kwa, ha'a mute maɗesi. Shak maɗufal ima mas maɗesi yes ii ta kyel i DeeƁwe. Shak maɗufal ima mas mafwashi, ɗing DeeƁwe kwa fweng.

¹² Demetiriyus mati asum maɗesi ta kyel i ɗufal shak, yit mwawei ti haisut hwak ti lak maɗesi si yis hai. Nin ti haisinin ni lak maɗesi si yis hai, ha shangi aɗeng ima ni lak a mwawei.

¹³ I ti findelal hyang ima ɓa i worong yes kyel ama, i ɓweti worongi ti kambil hu ham i worong kwa.

¹⁴ I kintiɓwi ɓa i ɗinga mukonan mii, ɓa ku shen findel fo si fo.

¹⁵ Murak i mulut ti te akul hu ha. Myaya ima ni tikul si too' sa. To'a myayus amukan ta shak ti asumam ames andek-andek.