2 Timoti 4 - Findel i DeeƁwe Ti Alis i Ron

¹ I laksa findel mai ti la mbai na mabel i DeeƁwe hu Kristi Yeso, ima ma wa totti ɓur si ɗufal ima si ti mupwet hu ima si mwat, myan ima pwak ya ti kaitat ames,

² lweshesha si mba ti findel i DeeƁwe hai. Tya ndere na myan si ɗat ahun si farat. Ti ka'ti agung, lakayus findel i ɗak ti, ha taɓak, ha fas njeng ha kofus ti, kofi manderei.

³ Myan si yes, ɗufal si wa muhum ɓweti hal ti kofiti mwawei kwa. Si wa far ti musut i kofiti ima si ɓweti, si wa suɓut ti haisus som kofiti hyang, ɓa si kofus aɗeng ima mwal ames mandwishsus ɓa si hali.

⁴ Si wa ndus ti mwal ames ya tasi mwawei hai, si humus ti ambe' si findelal i tang ti tang hai.

⁵ Shak ta andi, ha, hona ambe' ama ute ti sapai ta si shak ɗamam hai. Ka ha mwen shum fo ɓurti Deembai kwa. Masa ro i lak ti shini Muro Maɗesi, ha mas ro ima DeeƁwe fa ndere.

⁶ Amen, mupwet asun ti si shuya fota ɗama i ngyeshi mafyongi i fati mal wa kyel i DeeƁwe. Myan i mot amen ru.

⁷ I mas ɓin manderei, i mbit tital amen, i ka' fati mulut kpereng.

⁸ Mwashi si kinun mal i rurwan manderei ta. A Deembai ma tot ti ɓur manderei ma wa fasun mwen andi, ayin kyek kwa, a hu shak ɗufal ima si shwaiti shishat ɓurti mupwak ya ames.

Findel i Dala

⁹ Nya gbuk ha yes kyel amen kang.

¹⁰ Dimas titalun fo, ɓurti gwel i ɗamam i naya wis Tasalonika. Kresens wis Galatya, Titus hwak wis Dalmatya.

¹¹ A Luka je ma akul hu yin mwashi. Fara Mak hu yes akul, ɓurti mati bum na ro amen.

¹² I ro Tikikus ta Afisa.

¹³ Na ha te yes, ha matun fagin ti fwang ti se ta ra i Karpus, ta Trowas ha kolun. Kola yun kaadaha amen, ima ɓin shak, a fukwat i worong.

¹⁴ Alekzanda malan, masun si mafwashi si fwash hai, Deembai ma wa totsus ɓur si aɗeng ima masi.

¹⁵ Ha hwak kinus shit hai, ɓurti zan ti wei ti muro amukan ti ambas.

¹⁶ Ti bya', myan ima i findel i re' ti haisun ya, ɗeng yes von mas kwa, shak ɗufal si titalun fo. Ka DeeƁwe no' fo si sin hai kwa.

¹⁷ Shak ta andi, Deembai te akul hu yin fan njeng, ɓa na kyel amen muro mai u matbut ndere ɓa shak Ramam si hali. Bumun ta fo i kukum.

¹⁸ Deembai ma wa bumsun ya ta shak ɓwol mafwashi wi, ma wa kolsun ta kaitat ames i kyel fit cala. Shak cinjangat ute i DeeƁwe yes myan hu myan! Aandi.

Too' i Dala

¹⁹ To'a na Uprisila hu Akila ta, hu som wur i Onisiforus.

²⁰ Arastus ma ɗiri ta Korint, i hon Trofimus ta Miletus kaciwa' cala.

²¹ Nya gbuk ha yes ɗak fu ti ru. Yubulus ma too'sa, hu Fudens, hu Lainus, hu Ukilaudya, hu shak anggum i shunukani si too'.

²² Deembai u te akul hu rin ama. Mal maɗesi ames u te akul hu ha.