2 Timoti 2 - Findel i DeeƁwe Ti Alis i Ron

¹ A al amen Timoti, njenga ta mal maɗesi ima mata Kristi Yeso wi.

² Aɗeng ima ha hali na kyel amen ta wei i ɗufal hyang, Faha som i hya ti findel, ima sin hwak si kofti shini.

³ Rwisha si woti shum akul hu yin fota maɓwol maɗesi i Kristi Yeso.

⁴ Maɓwol kyan haisus tasi ɗamam i naya kwa, ɓurti maɓweti ɓa u tal mbai maɓwol ames myatat u pipel ti mulut.

⁵ Ma fota ɗama andek, na ɗeng ma wa ngingyesh i ukan fota i tital, maat mal i rurwan i uges kwa, na mbit tital ta hya ti anggut i titali tawe.

⁶ Ma ahan ima mas ro fwet ɗat yis u tong cwai ti mwai i macwai.

⁷ Masa ambe' tasi aɗeng ima i laki, ɓurti Deembai ma wa fasa piris i shak ɗamam mii.

⁸ Mbe'a Yeso Kristi, hu muluk fit ames ta fiyai, ima mii ta gung i Devid. A Muro Maɗesi ima i mbai mai.

⁹ A ɓurti Muro Maɗesi mai kin i woti shum, ru ta kyel ima i na shitam wi fota asher. Shak ta andi, Findel i DeeƁwe mata shitam wi kwa.

¹⁰ Ɓurti andi, i ka' agung ti shak ɗamam ɓurti som ima DeeƁwe benus, ɓa sin hwak si wis bum ima mata Kristi Yeso wi, akul hu cinjangat i myan hu myan.

¹¹ Findel mai a kyas i findel, Na ka mot akul hu yis, ka wa mupwet akul hu yis.

¹² Na ka ka' agung, ka wa masti kaitat akul hu yis. Na ka ɓwinggilus, yis hwak ma wa ɓwinggil sikan.

¹³ Na ka nggwekan i hya ti findel, yis ma wa cwai ti wei ti mute i mahyai, ɓurti yis ma wa ɓwinggil ti haisus kwa.

Maro ima DeeƁwe Ɓwetus

¹⁴ Cu ha wei ti mbe'sus ɗamam mii. Ti'a yus ra ta mabel i DeeƁwe, ka si mas uɓet tasi findelal hai kwa, ɓurti mati ɗat kwa, ma rafat ti som ima si hali ya.

¹⁵ Kina hai masti ro fwet, ɓa ha wis matɓwet ta mabel i DeeƁwe, maro ima ma wa shusho si ro ames hai kwa, ha kofiti si findel i mwawei hai kiga'.

¹⁶ Masa maleng ti findelal i gbya', hu i halngyat, ɓurti musuti mii ta dala si kyan ɗufal si mas maleng ti DeeƁwe.

¹⁷ Kofiti ames cu man ya fota kavyong. Ta saa yusti, a Himeniyus hu Filetus,

¹⁸ a ɗufal ima ti si welus ta fisel ti mwawei. Si ni, ɗufal ti si luk fit ta fiyai, si rikit fati mulut i shini ya.

¹⁹ Shak ta andi, mahuhur manjengi i DeeƁwe te mangra ndyas, si mas worong mai i hai si lis ti ya, “Deembai shang maɗufal ima mii ames,” hu “Shak maɗufal ima lak ni yis ii Deembai, a kpak u mas maleng ta mafwashi wi.”

²⁰ Ta wii wur mbai si tyai ti a ɗamam i ugbwirik mujuwani hu mupelani je kwa, si tyai ti i yitat, hu i ta', shini a ɓurti ro maɗesi, shini a ɓurti ro kek.

²¹ Shak maɗufal ima sapa haisus ya ta ɗamam i zuruk mufwashani, ma wa mute ii ɗama maɗesi ɓurti ro maɗesi. Mupwet asa ti wa mute ti sapai, ha wa mute kiga' ɓa Dee u mas ro ti ha tasi shak ro maɗesi hai.

²² Masa maleng tasi gwel mafwashi i fe waya, ha far mute manderei, hu fati mulut, hu matɓwet hu cala, akul hu ɗufal ima si lai ti Deembai ti mulut musapai.

²³ I hum laki hwak, masa maleng tasi findelal i halngyat, hu i uɓet i maɓing i hai ima kwal ɓin.

²⁴ Yere i Deembai ɗat u te ii ma shaal kwa, fo i mandi, ɗat u te ii ma masti maɗesi si ɗufal hai shak, u shang kofiti, hu ma ka'ti agung.

²⁵ Som ima si zan ti wei ti mwawei, a kpak u findel ti la muɗyayi u taɓakus, ashang DeeƁwe u hatat ti mulwat i ɗufali, ɓa si shang mwawei.

²⁶ Ɗak si humkyel ta ambe' ames wi, si pis zarai i Shatan, ima harus mute i yarai ɓa si mas aɗeng ima yis maɓweti.