2 Timoti 1 - Findel i DeeƁwe Ti Alis i Ron

¹ Kaada moti ii ta kyel Pool, mamuro i Kristi Yeso ti ɓweti i DeeƁwe, si tukus ɓa u mba kintiɓwi i mupwet ima ka mati ta Kristi Yeso wi,

² wa kyel i Timoti, al amen i mwawei ima i ɓwetsus. Mal maɗesi hu gu'ti ashur hu mute cala ta kyel i DeeƁwe Demukan hu Kristi Yeso Deembai amukan.

Palang hu Fati Njeng i Kwa nai

³ I palang DeeƁwe ima i masus ro ti mulut musapai, fota ngga' ima ai kaya amen si masi, myan ima yin mbe'i ti ha saa ti fwal ngang fo' ta reni.

⁴ I mbe' filya ama myan ima ku matkaar, i gwel ɓa i ɗinga, ɓa i hya ti jakak.

⁵ I mbe'i ti fati mulut si mwawei asa hai, ima ti bya' kaasa Uloyis hu nasa Uyunis si mati, i shangi mwashi mata saa yati hwak.

⁶ Ayis kin ima mbe' sai ɓa ha fivyor man i mal i DeeƁwe, ima mata saa ya ti ta fisel ti kinsa ra amen maɗesi hai.

⁷ Rin ima DeeƁwe fakan ii myanat kwa, a rin i andok, hu matɓwet, hu i ka'ti hai ya.

⁸ Ka ha shusho i mba ti findel si Deembai amukan kwa. Ka ha shusho si yin ima i na mano' wi ɓursus kwa. Ti njeng ima DeeƁwe fa, Teha mweret ɓa ha wo shum akul hu yin, ɓurti Muro Maɗesi mai.

⁹ A DeeƁwe bum kan, laikan ɓa ka mas mute i sapai, a ɓurti ɗama nin ima ka masi kwa, a ɓurti ambe' hu mal maɗesi ames. Mai mal maɗesii si fakan ta saa ti Kristi Yeso ɗak si lan naya.

¹⁰ A mwashi kof kan ɗamam mii shak rasman, ta fisel ti mupwak ya i Kristi Yeso Mabum amukan. Ayis nggyel andok i mot ya, ɗak yes ti kweneng i fisel ti mupwet tima ti kaciwa' mot ta fisel ti Muro Maɗesi.

¹¹ DeeƁwe kinun ii mamba ti findel, hu mamuro, hu makofiti i Muro Maɗesi mai.

¹² Ayis nai kin i ma woti shum na wur i shitam. Shak ta andi i shusho kwa, i shang maɗufal ima i fa mwawei si yis hai, i kintiɓwi nyai ma wa fwang ti aɗeng ima kinuni na ra, yes mwen muhumkyel ames.

¹³ Ka'a aɗeng ima ha hali na kyel amen ti ra apilal, ima a kofiti i mwawei, akul hu fati mulut, hu matɓwet ta Kristi Yeso wi.

¹⁴ Fwanga aɗeng ima si fa ndere ti abum i Rin Masapai, ima mana wii kanti.

¹⁵ Ha shangi nyai shak som wufen ti Asya si hatun ti fai, hu Fijelus hu Hamojenis hwak.

¹⁶ Fwal amen a yis nai, DeeƁwe u mas Onisiforus hu wur ames maɗesi, ɓurti fayansun njeng i fwaran, shusho ti mute amen na shitam wi kwa fweng.

¹⁷ Fo i mandi, myan ima yes Rom taksan yis farsun, ɗak wisun.

¹⁸ Maɗin Deembai u gu'us ashur mwen andi! Ha shangi ndere ngga' ima fwangun fwet ta Afisa.