2 Pita 3 - Findel i DeeƁwe Ti Alis i Ron

Mwen ti Deembai

¹ A myayun, a kaada mupil asun moti yes kyel amu. I worong shak apili ɓa i mbe'ui, i ro mulwat amu hu mas ambe' manderei.

² I ɓweti hu mbe' findelal ima ai som shit musapai si lak, hu anggut i Deembai Mabum ima lak ta fwai i fe muro ames.

³ Ta bya' shak, a kpak hu shangi nyai si mukonan i dala, som i gbaf si wa yes sin gbaf, sin koltifai ti yok mafwashi ames.

⁴ Si wa nyai, “Ka ni ahun Yeso fa kintiɓwi nyai, ma wa muhumkyel hoo? Unai mii leya? Ta myan ima si mas naya, washash amukan si cu wei ti mwatan, shak ta andi ɗamam si mushen kwa.”

⁵ Si masi ngyang, fota si nitima ii ta findel i DeeƁwe si mas fit, ɗak si mas fisha ta ham wi, pwak ya ta ham wi.

⁶ A ti ɗamam mii ai si rafat ti naya ya, myan ima ham yes vo naya ya.

⁷ A ti findel mandeki, fit hu fisha ti mwashi, ti wa cwai ti man. Si vohut wa mwen ti tot ti ɓur, hu som ima si ti myanat ti DeeƁwe fo kwa, u rafatus ya.

⁸ Ɓurti andi a shunun, kan hu nitima ti ɗama andek mai kwa. Ta kyel i DeeƁwe mwen andek tima fota wilyal nggal, wilyal nggal hwak sima fota mwen andek.

⁹ Deembai mas aɗeng ima fa kintiɓwi i hai loo kwa, fota ngga' ima shini si shang loo ta.

¹⁰ Mwen ti Deembai ti wa yes fota yes i asher. Si wa kawa ti la mbai, fit mayus wa mufot ɗyarwal. Si wa ngyesh ti ɗamam ya shak ti man, fisha hu shak ɗamam, si wa mungyesh burut.

¹¹ A awei shak ɗamam si wa muni ndarak na fisel moti. Hu ɓweti hu te anggi musut i ɗufali ya? Ɗat hu mas mute i sapa, hu i myanat ti DeeƁwe fo,

¹² myan ima hun kinti shit si mwen ti DeeƁwe, hun kini ɓa u yes kaang. Mwen andi, fit ti wa ɗangyesh burut ti man, ɗamam shak si wa ɗahwet.

¹³ DeeƁwe fakan kintiɓwi tasi fit hu fisha mumwai, a wur munderei, ima kama kinti shit ɓa ka ɗingi.

¹⁴ A myayun, huma kinti shit si ɗamam mii hai. Ni hun gbuk hu te ti sapa, kaciwa' mafwashi, hu te cala akul hu yis.

¹⁵ Kin hun mai ta mulut nyai, Deembai ka' agung ta myani, ɓa ɗufal si wis abum. Nusikan Pool worong ɗamam mii, ti piris ima DeeƁwe fas.

¹⁶ Worong a musut i findel andek, ta kaadaha ames shak. Kaadaha ames si mati shini ɗamam munjengani ima si ti shum i shangi. Ɗufal ima si ti shangi kwa, hu ima si njeng si mwawei hai kwa, si rikit ti findel ima Pool worong ya. Angga' ima si masi ti anggum i Worong i DeeƁwe nai, sin dul ti haisus mot hai.

¹⁷ A myayun, hu shang mii ɗamami shak. Fwang hun haisu mweret ka ndok hu furu fota ngga' ima som nggyel ti anggut ya si masi. Ɓweti amen ka hu furu ta si mute munderei asu kwa.

¹⁸ Foi mandi, ngye hun ta mal maɗesi hu shang ti Deembai amukan Mabum Yeso Kristi. Cinjangat wa kyel ames na mwashi yes myan hu myan! Aandi.