2 Pita 2 - Findel i DeeƁwe Ti Alis i Ron

Som Kofiti i Fyarat

¹ Ai, som shit i fyarat sin ta saa ti ɗufal i Isar'ila, fota ngga' ima som kofiti i fyarat si wa mute na saa yuti. Si wa mulangna i mufot ti kofiti i fyarat. Ma wa koli ta kyel ima si ɓwinggil Deembai ima dum mupwet asus ya. Musuti mai zwal mot abet.

² Ɗufal hyang si wa koltifai ti fisel ames i shusho, si kin si kom fisel ti mwawei ya.

³ Ti yok i cef ames mii som kofiti si wa nzaɓwetsu ya ti findelal i fyarat ima si la. Ai ti si lefus ɓur ya hwer, mufot ames ma shwaisus.

⁴ A awei, ai DeeƁwe hon som lu' myan ima si mas mafwashi kwa, tukus ta hum manggyongi i maɓing hwit, ɓa si shwai mwen toti ɓur.

⁵ A awei, ai DeeƁwe hon ɗufal i ɓele myan ima yes ti foon si hai som ima si ti myanat ti DeeƁwe fo kwa, bum a Nowa ima mba findel manderei, hu ɗufal pyoron je.

⁶ A awei, ai DeeƁwe nggwal ashwaha i Sodom hu Gomora ya, ta fisel ti ngyeshsus ya burut si hat afut. Hatus ii ɗama i kaani wa kyel som ima wa' si mwen DeeƁwe fo.

⁷ A awei, ai DeeƁwe bum Lot maɗufal manderei, ima tirim fwet ɓurti zuruk i som i Sodom ima si ɓyat hya ti anggut kwa.

⁸ Maɗufal mandere mai, kikyau na mulut fwet, ɓurti ɗamam ima ɗingi hu findelal mufwashani ima hali, myan ima yis ta saa yusti ngang.

⁹ Na shak ɗamam mii a awei, kof DeeƁwe shang ngga' ima ɓa u bum som myanatsus fo ta ambaha wi. A andi hwak, shang ngga' ima ɓa u vo som ima a munderei kwa, wa mwen ti toti ɓur, ɗak ndashus.

¹⁰ Mai a awei gbum si ɗufal ima si koltifai ti yok i naya, si nggwes i murak ti hihai ta mabel i kaitat. Somi, a som njeng na hihai hu mulwat mufwashani, si shusho i lak ti findelal i ale' si som i lu' mbayai hai kwa.

¹¹ Som lu'i, shak ta ngga' ima si ti njeng hu andok fwet, si lak ɗama mafwashi i se' si sin hai ta mabel i Deembai kwa.

¹² Shak ta andi, ɗufal mii si lak findelal i se' si shak aɗeng ima wa' si shangi. Si yus fota loha i ya, ima si ti ambe' kwa, si alus ɓa si ka'i si fwar ya. Si wa fwaran ti ɗufal mii ya hwak, fota ngga' ima si fwaran ti loha i ya ta.

¹³ Ngga' ima si kof shini ɗufali ya ta, si wa kofsus sin ya andi hwak. Si kin hai ta ɗawo wi, hu masti arak i zuruk sai ren. Mute ames a ɗama i shusho, hu mafwashi. Sin halti ɗat si ɓwi i dang ti kyel ta, myan ima sin cwai sin woi tikul.

¹⁴ Ngang ambe' ames hya ti zuruk, si lafwas ti masti mafwashi kwa. Si dangan ti som ima si ti njeng ta fati mulut kwa. Si ɓin shingat si yok hai. Musut ames a fe ima si le'.

¹⁵ Si hon fisel ti mwawei ya, si sa fisel mubuhi ti Balam al i Beyor, yis ima ɓwet si talus ro mufwashi asus.

¹⁶ Njaki ima wa' findyal, shak ta andi lakus ɓin, ɓurti mafwashi ames. Njakii findelus ti la ti maɗufal ɓa u sha mashit wangan.

¹⁷ Ɗufal mii si yus fota kwaa tima ti shokut, hu ɓwar ima se ɓaas ti ya. DeeƁwe ɗakus ti kyel i mute ta wii i maɓing makyawi wi.

¹⁸ Ɗufal mii, ti jolok hu findelal i gbya', sin lai ti gwel i lo'. Sin kinti hai ɓa si dul ima si pis a purut ta mute i masti mafwashi.

¹⁹ Si fas findel i kintiɓwi i mute i haisus, sin ti haisus si yus ii yarai i masti ɗamam i zuruk. Ɓurti maɗufal a yere si shak aɗeng ima ha'us hai ya.

²⁰ Na ɗufal si pwet ta rafat i naya ta fisel ti shang ti Deembai amukan hu Mabum Yeso Kristi, ɗak si humus sanggal ta zuruk wi, dalai ma wa rafat si fwash u ɓin i bya'i.

²¹ Ɓin ɗat si ni musut i mii ɗufali, mbwesh ka si shang fisel munderei kwa, sin hu ima si shangi ɗak si hatat ti mas si anggut masapai ima si fas.

²² Kaani mai a mwawei tasi aɗeng ima si lak ta hai yusti nyai, “Kyara hum Tasi ataf ames hai,” hu “Nggish tima si saat lo' ya, ti humut kyel ta amyar wi.”