2 Pita 1 - Findel i DeeƁwe Ti Alis i Ron

Too'

¹ Kaada moti ii ta kyel i Siman Pita, yere hu mamuro i Yeso Kristi, Wa kyel i som ima fati mwawei ames mii maɗesi fota amukan. Hu mat fati mwawei mai ii ta mute manderei i Yeso Kristi ima mii DeeƁwe hu Mabum amukan.

² DeeƁwe u cu wei ti fasu mal maɗesi hu cala hyang, ta fisel ti shang ti DeeƁwe hu Yeso Deembai amukan.

Lai i DeeƁwe hu Aben

³ DeeƁwe ti andok ames, fakan shak ɗamam ima ka ɓweti na mupwet, hu myanatsus fo. Ka mat shak ɗamam mii ii ta fisel ti shangsus, yis ima laikan ti cinjangat hu ɗat si ɓwi ames.

⁴ Ti mii ɗamami hwak, yis fakan kintiɓwi gilik ima si cinjak ya, ɓa tasi mii, hu wis futi hai tasi mute i DeeƁwe. A andi hwak hu titalu ta si mafwashi i naya ima lang ya ta gwel mufwashi wi.

⁵ Ɓurti mai aɗengi, ti' hun hai fwet, na hun ti fati mulut, hu te ti maɗesi, na hun ti maɗesi, hu te ti maɗesi, hu te ti shangi.

⁶ Hu hum kinti ka'ti hai ya, tasi shangi hai, hu rwish ya, tasi ka'ti hai ya, hu myanat ti DeeƁwe fo, tasi rwish hai.

⁷ Hu kin ɓweti ɗiyai, tasi myanat ti DeeƁwe fo. Tasi ɗamam mii, ɓwet hun ɗufal shak.

⁸ Na mute mii sin nggye na saa yuti gilik, shang ti Deembai Yeso Kristi ima hu ti, ma wa kini hu te ii som kukush, hu fa macwa maɗesi.

⁹ Na ɗeng dun musut i mute mai, ma ɗing ti kyel ndere kwa, a manzyau. Maɗufal mai nis tima nyai DeeƁwe sapasya ta mafwashani ames ima ai.

¹⁰ Ɓurti andi, a shunun, hum hun kinti hai fwet, ɓa u kof lai hu aben ima DeeƁwe masui. Na hu mas ɗamam mii, hu wa mufur kwa fweng.

¹¹ Mas ti ɗamam mii, si wa shwaisu ti jakak fwet, ta wur i kaitat i myan hu myan i Deembai Mabum amukan Yeso Kristi.

Worong i Findel i Shit

¹² Ɓurti andi, i mbya'an su ɗamam mii ngang, ii mati hu shangi. Hu ma mangrai si mahuhur i mwawei gbwenjeng ima hu mat.

¹³ A kiga' na yin ɗiri ti mupwet, i cu wei ti mbe' sui.

¹⁴ I shangi katun ndyong ɓa i win, fota ngga' ima Deembai Yeso Kristi amukan kofun ta rasman.

¹⁵ I wa kinti hai i mas shak aɗeng ima ɗat masi, ɓa takfai ti matkar amen hu hun, hu wa mbe' ti mii ɗamami ngang.

¹⁶ Ai, myan ima i laku ngga' ima Deembai Yeso Kristi demukan matkof ti andok ta, ni laku a jam i shingat mamwai, ii fyarat nin kwa. Wayou! A na shishat aminin ni ɗing cinjangat ames.

¹⁷ Myan ima yis mat ngye hu cinjangat ta kyel i DeeƁwe Dees, la ti yes sus fai ta kyel i Macinjangat Mbai, nyai, “Mai a Al amen, ima i ɓwetus, ima jakak ti yis fwet.”

¹⁸ Nin ti haisinin ni hal la tima ti yes ta fit, myan ima nin tikul ta si anggash masapai.

¹⁹ Ɓurti andi, ni mati njeng i mulut tasi findel i som shit. A kiga' hu kin shit i hai mweret, fota kweneng ima ka' ta maɓing wi, yes mwen ti ɓwai, hu ɓyar ti fo i mwen tima ti matkof ta mulwat amu.

²⁰ Tasi hai shak, a kpak hu shangi nyai findel i shit ima si worong, yes ii ta ambe' i mashit kwa.

²¹ Ɓurti andi, findel i shit mati sisyar ta ambe' i maɗufal kwa. A Rin Masapai kinus ɓa si lak aɗeng ima si mat ta kyel i DeeƁwe.