2 Korintyawa 9 - Findel i DeeƁwe Ti Alis i Ron

¹ I ɗing aɗeng ima ɓa u kinun worongsui tasi abum ima si fa som i sapai kwa.

² Ɓurti i shang kukush amu ta fisel ti abum. I ma pati ajin i hai na kyel i som i Makidonya, yin nyai sus, tasi wilna hun na Akaya hu sinzam ɓa hu fa, unai gwel i fai amu hat ti mulwat i hyang ames ɓa si luk fit.

³ Unai i ma tuksu shunukan ɓa kan pati ajin aminin si hun hai nasi aɗeng mai tehus ii gbya', ɓa hu te cwak-cwak fota ngga' ima i laku nyai ɓa hu te ta.

⁴ Ɓurti na ɗeng ta Makidonya kolfai asuni ɗak wisu kaciwa' ti hu sinzam i, ni wa woti shusho i pati ajin ti hun hwak, hun hu wa woti shusho fwet.

⁵ Ɓurti andi, i ma ɗingi ɗat ɓa i fwal shunukan mii si tong muru, ɗak si dala sinzam ti mangga' i fai i ɗat si ɓwi ima hu laki. Unai ma wa mute ta andi fota fai i ɗat si ɓwi, ii ma si kinu a kpak kwa.

Fai ti Ɓweti i Mulut

⁶ Mbe' hun mai, shak maɗufal ima lai musut ndyong, ma wa karati ndyong, maɗufal ima lai musut hyang, ma wa karati hyang hwak.

⁷ Fahun aɗeng ima hu ti ta mulut ti andek-andek, kan te ɓees ahun fota si kinu a kpak kwa, ɓurti DeeƁwe maɓweti ma fai ti jakak.

⁸ DeeƁwe ndok ɓa u kin mal maɗesi shak yes kyel amu u hya u rangya, ɓurti saa ti shak ɗamam ta saa ti myan shak hun ti aɗeng ima ai hu dun, ɓa ro maɗesi amu shak u hya u rangya.

⁹ Fota ngga' ima si worong, “Yis cat mal ames ii ra wa kyel som jyel, mute manderei ames mana gbenjeng myan hu myan.”

¹⁰ A DeeƁwe ima fai mayang musut i laiyi hu folok ii cwa i cwai, ma wa fasu u kin hotat amu hya, u hum fasu karat i mute manderei hyang.

¹¹ Hu wa wis ti sufat fwet ta shak fiselali, ɓa hu te ii som i cat ti ra ii ra ta shak myan, ɗufal hyang si wa palang ti DeeƁwe myan ima ni ti'us mal amu.

¹² Yis ro maɗesi ima hu masi mai, ma tal ti a myatat i som sapa je kwa, ma yes ti a palang ima hya rangya hwak na kyel i DeeƁwe.

¹³ Ɓurti ro ima hu kof na hai yuti, ɗufal si wa ha' ti asum i DeeƁwe fit ɓurti hal ti findel amu ima kolfai ti fati mwawei si Muro Maɗesi i Kristi, hu fai i ɗat si ɓwi amu wa kyel ames hu shak ɗufali.

¹⁴ Unai saa ti fwal ɓursu, sin cwai ti ra ya ɓa si yes kyel amu, ɓurti mal maɗesi ima DeeƁwe fu hya rangya.

¹⁵ Palang wa kyel i DeeƁwe ɓurti mal ima ɓin njeng i laki.