2 Korintyawa 7 - Findel i DeeƁwe Ti Alis i Ron

¹ A myayun, tun tya ka mati kintiɓwi musuti mai, ka sapa hai sikan ya tasi shak ɗamam ima ma wa ruɓun ti lo' hu rin ya, mute ti sapa yit hya ta saa ti mute i myanati DeeƁwe fo.

Jakak i Pool

² Hwet hun nin shishat ya hu mat nin ta mulwat amu. Ni mas ɗeng ro mumeti hai kwa, ni rafat ɗeng ya kwa, ni mbwa ɗeng kwa.

³ I lak mai ɓa kan te fota i lefsu ɓur hai kwa. Ai tii laku nyai hu mati kyel musuti mai na mulwat ninti ima ka wa mupwet ahun ka mot tikul.

⁴ I mati njeng i fwaran si hun hai fwet, i ma nggwak ti ajin ti hun fwet. I wis njeng i mulut fwet, shak tirim ima ni woi, jakak amen mati anggwe' kwa.

⁵ Myan ima ni yes na ta' ti Makidonya, lo' aminin mai wis lafos kwa. Shak kyel ima ni hatat ta si ɓata buruk sinin, ta saikyel a ɓin, na wii a myanat.

⁶ DeeƁwe ima pyar som ima si ha' ɓwi ya, pwer nin ti yes i Titus.

⁷ A yes ames kek kwa, ati pweri ima hu pwerus. Lak nin ngga' ima hu kin shit fwet ɓa hu ɗingun, hu fwashash i kikyauwat i mulut amu, hu tirim ima huti ɓursun, aɗengi kinun i jakak fwet.

⁸ Na i kinu kikyauwat i mulut ti kaada asun tima ai, mwashi i mati tirim ti andi kwa. Ai i wis tirim, tun tya i ɗing kaada asuni ti kolu kikyauwat ti mulut, kikyauwati ii myan ndyong kek.

⁹ Mwashi i jakak, a ɓurti kikyauwat ti mulwat kwa, a ɓurti kikyauwat ti mulwat amu kinu hatat. A kikyauwat na mulut ima DeeƁwe ma ɓweti nai, ayis nai kin hu ɓwar ta nin fiseli ɓur sinin kwa.

¹⁰ Kikyauwat i mulut musut i DeeƁwe, yias ti hatat ima kwal bum hu ima tyai ti tirim kwa, kikyauwat i mulut musut i naya yias ti mot.

¹¹ Ɗing hun aɗeng ima DeeƁwe masi ta fisel ti kikyauwat i mulut na saa yuti, fota kukush, hu mulut andek i ɓweti kofti ra amu hara, hu mulut maɗesi, hu shok na fo, hu shak ta duni, hu nadon maɗesi, hu ɓweti mwawei. Ta shak ɓwayai hu kof hu mati mafwashi kwa.

¹² Myan ima i worong kaada andi, a ɓurti maɗufal ima mas mafwashi kwa, ahun a ɓurti maɗufal ima si masus mafwashi kwa. Fo i mandi, a ɓurti hu ɗing ngga' ima hu fa hihai asu ta yes kyel aminin fwet, ta wei i DeeƁwe.

¹³ Ti mai shak, ni wis njeng i fwaran. A njeng i fwaran aminin kek kwa, ni jakak fwet ɓurti musut i jakak ima Titus mati, ɓurti shak asui hu fa rin ames njeng.

¹⁴ I nggwak ajin ti hun ta wei ames, hu fan shusho kwa. Fota ngga' ima shak ɗamam ima ai ni laku a awei, andi hwak nggwak ti ajin aminin si hun hai ta kyel i Titus kof awei hwak.

¹⁵ Matɓwet ames yes kyel amu, ma ngye fwet myan ima mbe' ngga' ima shak asui hu hal findel ta, hu ngga' ima hu matus ta ti myanat hu aro i lo'.

¹⁶ I ma jakak ɓurti i wa mute ti njeng i fwaran ndere si hun hai.