2 Korintyawa 3 - Findel i DeeƁwe Ti Alis i Ron

¹ Ni wa mulang pati ajin ti hai a sinin hwak haa? Ahun ni ma ɓweti kaada ti wis ti asum fota shini ɗufali wa kyel amu waak? Ahun ii ta kyel amu waak?

² Hun haisu a kaada ima si worong na mulwat aminin, ɗufal shak si shangi, si mbe'i.

³ Hu kof nyai hun a kaada ta kyel i Kristi, a matkof i ro aminin, ima si worong ti a kambil kwa, a ti Rin i DeeƁwe mapweti, a tasi caɓalang kwa, a tasi caɓalang i mulwat i ɗufal.

⁴ Musut i kintiɓwi mai a amukan ta fisel ti Kristi ta wei i DeeƁwe.

⁵ Ni ma nyai, njeng aminin a ka'ti gamshik i ɗama nin ɓurti hai asinin kwa, njeng i gamshik aminin yes ii ta kyel i DeeƁwe.

⁶ Ayis fanin njeng fota tabwa'a' i dakwa mamwai, ii dakwa mawili kwa, ii Rin, ɓurti dakwa mawili ti yes ti mot, ɗak Rin fai mupwet.

Mbaitat i Cinjangat i Dakwa Mamwai

⁷ Mwashi, na anggut i Mosis ima yes ti mot si worong si afung hai, angguti yes ti cinjangat, a yis nai kin som i Isar'ila si cu wei ti shok ti Mosis fo kwa, ɓurti cinjangat i shishat ames ama waya,

⁸ hu ɗingi anggut i Rin ma wa ɓin ti mute ti cinjangat kwa waak?

⁹ Na anggut mawili ma kofti mafwashi yes ti cinjangat, ngye i mbaitat i cinjangat i anggut mamwai ima yes ti mute manderei ma wa mute atini ya!

¹⁰ Ti mwawei, cinjangat i bya' a cinjangat kwa fweng, na ka kaani ti ngye i mbaitat i cinjangat ima hya rangya mai.

¹¹ Na aɗeng ima ama waya yes ti cinjangat, ngye i mbaitat i cinjangat ima waiya kwa, ma wa mute atini ya!

¹² Ɓurti andi, musut i kintiɓwi mai, ka mati a rwish manjengi.

¹³ Ka ma fota Mosis kwa, ima vo shishat ames ya ti godo ɓa u fwang Isar'ila ya ta ɗingi myan ima cinjangati yis waya.

¹⁴ Si njengus na hihai, yes mwen moti godo mai mayus ta kpwereng myan ima si mbe' ta saa ti dakwa mawili. Ai si zan ya kwa, a Kristi je ma wa zan ti godoi ya.

¹⁵ Myan ima si mbe' anggut i Mosis, ambe' ames mavos ti godo.

¹⁶ Na ɗeng hatat ta kyel i Deembai, si ha' godoi ya ndai.

¹⁷ Deembai a Rin, kyel ima Rin i Deembai mata, cati ii ra mata.

¹⁸ Unai kan ima si zan kan godoi ya na shishat, cinjangat i Deembai ma muka' na wii kanti shak, si shen kan ka te fota yis ti ngye i mbaitat i cinjangat ima yes ta kyel i Deembai, ima ayis a Rin.