2 Korintyawa 2 - Findel i DeeƁwe Ti Alis i Ron

¹ Ayis nai i kin na ambe' amen nyai, i wa yes too' nin i kinsui fo hwak kwa.

² Ɓurti na i kinu kikyawat i mulut, awe ma wa kinsun pipelat i mulut ya? Ka nyai a hun ima i kinu kikyauwat na muluti hoo?

³ I worong fota ngga' ima i masi, ɓa myan ima i yes, ka i wis ti tirim ti som ima ɓa si kinun i jakak. I kintiɓwi si hun hai shak nyai, hu wa jakak akul hu yin shak.

⁴ Ayis nai i worongsui saa ti shum hu kikyawat i mulut hyang ta filyai ɓa i kinu a kikyawat i mulut kwa, fo i mandi, ɓa hu shang a musut i kinggyongat i matɓwet amen yes kyel amu.

Shwaiti Ma Mafwashi ya

⁵ Na ɗeng mas ɗama i kikyauwat na mulut, ayin masuni kwa, ta nin ɓwaiyi, mas a shak asui ndai, ima laki ɓa i kinu a shit hai kwa.

⁶ Andash ima wo na fisel moti ta kyel i ɓwai mbai amu, ndokus andi.

⁷ Mwashi ɗat hu shuhus si ya, hu jaarus hwak, kan cu wei ti kikyauwat i mulut fwaran ames u mwatus fweng.

⁸ Ɓurti andi ima fwalsu, hum hun kofsus matɓwet amu.

⁹ A aɗeng ima kin i worongui nai, ɓa i ɗingi na hu wa mute mangra si amba hu hal ti ɗamam shak.

¹⁰ Na hu shu ɗengi ya, i shuhus si ya hwak. Hu aɗeng ima ti i shuya, na ɗama i shwaiya yis na, tii shuya ta shishat i Kristi ɓursu,

¹¹ kan Shatan wis fisel i shingat sikan hai, ɓurti kan ti ka shang ambe' ames ya.

Tabwa' i Ro i Dakwa Mumwai

¹² Mwashi, myan ima i wa Trowas ɓa i mba muro maɗesi i Kristi, hu a Deembai ɓu hu fisel mai ya,

¹³ i mati murak i mulut kwa hwak, ɓurti i wis nusun Titus ta kyeli kwa. Unai i lakus matkar, ɗak i win Makidonya.

¹⁴ Palang wa kyel i DeeƁwe ima ngang ma zul sikan nzong i cwai ti uges ta fisel ti Kristi, hu ima na kyel aminin ma but ti findel ames ta shak kikyal, fota mbar mafyongi i shangi ames.

¹⁵ Ta kyel i DeeƁwe, kan kama fota mbar mafyongi i Kristi ta saa ima si bum hu ima si yus kpa.

¹⁶ Ta kyel i som ima si yus kpa, kan a muɗu i mot, ta kyel i som ima si wis bum, a muɗu mafyongi i mupwet. Awe ma kiga' ɓa u ha' musut i kinggat ani ya?

¹⁷ Nin mii ni ma fota anggum i ɗufali kwa, nin ni ma juwil ti findel i DeeƁwe ya ɓurti mawet kwa, fo i mandi, ta saa ti Kristi ni findel ta wei i DeeƁwe ti mulut andek, fota ɗufal ima DeeƁwe rohus.