2 Jwon 1 - Findel i DeeƁwe Ti Alis i Ron

¹ Ta kyel i wash mbai, Wa kyel i mbor tima DeeƁwe benut hu femet, ima i ɓwetus fwet ti mwawei. Ayin je kwa, shak som ima si shang mwawei si ɓwetut hwak,

² ɓurti mwawei tima ti mana mulwat kanti, ti wa cwai ti wei ti mute hu kan myan hu myan.

³ Maɗesi, hu gu'ti ashur, hu murak i mulut ta kyel i DeeƁwe Demukan, hu ta kyel i Yeso Kristi, Al i Dee, ma wa mute akul hu kan ta saa ti mwawei hu matɓwet.

⁴ I ti pipelat na mulut hyang, ti wis ti femu shini ima si ati si mwawei hai, fota ngga' ima Dee fakan ta findel ames wi.

⁵ A naa muɓan, i worong shush a anggut mamwai nin kwa, a mawili ima ai hun ti tasi bya', ka ɓwet ɗiyai.

⁶ Matɓwet ayis mii halti findel ames, findel ames a yis nai ka mas mute ta matɓwet wi, fota ngga' ima hu hali ta tasi bya'.

⁷ Som i dang hyang si rangya na naya, si nggwes i ɓwet nyai, Yeso Kristi yes ti lo' i maɗufal. Musut i maɗufal mai kof yis a madang, ma ha' ti wei ti Kristi.

⁸ Tehun ti shingat ɓurti kandok hu dun mal i ro ima hu masi, ɓa hu wis mal kyalak.

⁹ Shak maɗufal ima titalus, nggwes ti aɗeng ima Yeso Kristi kofti, mati DeeƁwe kwa. Shak maɗufal ima cu wei ti mute si aɗeng ima Kristi kofti, mati Dee hu Ali hwak.

¹⁰ Na ɗeng yes kyel amu, ɗak yis ti findel nin akat hu ima Kristi kofti, ka hu matus ta wur amu kwa fweng, ka hu shwaiyus kwa fweng.

¹¹ Shak maɗufal ima shwaiyus, si wa kar ti mafwashi ames tikul.

¹² I mati findelal hyang ɓa i worongushi, i ɓweti i worong na kaada kwa. I kintiɓwi ɓa i yes ku shen findel fo si fo, ɓurti ɓa jakak amukan u hya nggya-nggya.

¹³ Fe i tushush tima DeeƁwe benut, si too' shush.