1 Timoti 6 - Findel i DeeƁwe Ti Alis i Ron

¹ Shak yarai si fa hu dee i wurai ames ngye, ɓurti ka si kin som naya si se' asum i DeeƁwe hu kofiti amukan ya.

² Yarai ima hu dee i wurai ames si mii som koltifai, ka si komus ya kwa ɓurti sin a shunu i ɗiyai. Fo i mandi, ɗat yarai si mas ro ima ɓin ani, kukush ames ma wa bum ti shini som koltifai, ima si ɓwetus. A Timoti, kofa mii ɗamami ha lakus ti njeng.

Kofiti i Fyarat hu Sufat Mwawei

³ Na ɗeng yis kofti ɗama nin akat ima wa kiga' hu findel manderei i Deembai Yeso Kristi kwa.

⁴ Maɗufal mai mati ngye na hai, shang ɗama kwa. Ambe' ames mayus ukutyal, mute mai kyan uɓet, uɓeti u kin nadon, hu matkar, hu se', hu ambe'a' mafwashani si ɗufal hai.

⁵ Mii musut i ɗufali ngang si kinti tirim. Ambe'a' ames rafatus, si hati mwawei mas. Si ɗingi fota myanat ti DeeƁwe fo kyan ramwayat.

⁶ Shak ta andi, myanat ti DeeƁwe fo, hu murak i mulut haisus, a mbai ramwayat.

⁷ Ami ka yes ti na naya moti ya? Ɗama kwa fweng! Ami ka wa zani na naya moti ya? Ɗama kwa fweng!

⁸ Na kan ti cwa hu arom i ru'i, mai kek ndok kan.

⁹ Som ima si ɓweti ramwayat si fwar ta amba wi, halngyat mahyangi hu gwel i lo' mafwashi ka'us, a sin si wa dulsus ta rafat wi hu mot.

¹⁰ Ɓweti cef a yis mii sisyar i shak musut i mafwashi. Ayis kin shini si far ti njeng si wis kwa, unai welus ta fati mulut i mwawei, si dul haisus kikyawat na mulut hyang.

Taɓak i Pool Wa Kyel i Timoti

¹¹ A Timoti, ha a maɗufal i DeeƁwe. Titala ya na kyel i ɗamam mii, kina hai si far ti maɗesi, hu mute i myanat ti DeeƁwe fo, hu fati mulut, hu matɓwet, hu ka'ti agung, hu wa ti loo.

¹² Masa tital manderei i fati mulut i mwawei, ɓa ha cu mwai i mupwet i myan hu myan. A DeeƁwe laya ɓuri, myan ima ha findel si fati mulut ama hai kparara, ta wei i som hyang ima si halsa.

¹³ Ta mabel i DeeƁwe ima fa shak ɗamam mupwet, hu ta mabel i Kristi Yeso, ima findel kparara ta wei i Pontyus Pailet, i laksa ndai

¹⁴ fwanga anggut mai kaciwa' lei hu se', yes mwen tima Deembai amukan Yeso Kristi ma wa mupwak ya.

¹⁵ DeeƁwe ma wa kinti Kristi u pwak ya si myan hai kiga'. Yis a DeeƁwe, ma maɗesi hu Makaitat andek ɗwyat, Makai i kaya, Deembai i hu dee.

¹⁶ Ayis je mwat kwa, mati mute ta saa ti kweneng ima ɗeng hyarus nggas kwa. Maɗufal ɗyangus kwa, ɗeng ndok u ɗingus kwa. Mbaitat hu kaitat wa kyel ames myan hu myan. Aandi.

¹⁷ Laka som i ramwayat naya ti mwashi moti kwa, ka si ngye na hihai kwa, ka si kinɓwi si sufat, ima yaash kwa. Ɗat si kinɓwi si DeeƁwe hai, ima fai kan shak ɗamam gilik ɓa ka hal ɗat si ɓwi.

¹⁸ Lakayus si mas maɗesi, si te ti sufat i masti roha maɗesi, si te ii som fai gilik hu ɓweti bum ti ɗufal.

¹⁹ Ii na fisel moti si wa suɓut ti haisus ramwayat ima ma wa mute ii mahuhur manjengi i yes myan wei, ɓurti si wis cwai ti mwai i mupwet mwawei.

Findel i Dala

²⁰ A Timoti, fwanga aɗeng ima si kinai na ra. Ɓela haisa ya ta findelal i gbya' hu ambe'a' i ukutyal, ima si lai ii shangi, taa a fyarat.

²¹ Shini ɗufali si wyalus ta fati mulut wi, ɓurti musut i halngyat mai. Maɗesi i DeeƁwe u te akul hu hun shak.