1 Timoti 5 - Findel i DeeƁwe Ti Alis i Ron

Ɓweti Shini Ɗufali

¹ Ka ha lak mbai maɗufal ima kaya ɓin ti ambas kwa, kofayus ti fota yis a dya. Ha findel zalang fota shuna,

² arof ima si kaya fota hu nasa, arof ima si mii afwar fota shuna murwafi, ti ambe' masapa ma nggya-nggyai.

³ Ɗinga arof ima arya ames si mwatus fo ndere, na sin ti tirim i mwawei.

⁴ Na mbor tima re amet motus yit ti fe ahun a washash, ɗat ti bya' si kof mute ti myanat ti DeeƁwe fo, si ɗing wur ames fo, si wer hu deesi ti muhersus fo. Masi ati ɗat DeeƁwe si ɓwi hai.

⁵ Mbor tima re amet motus, ti ti ɗeng ima u bumut kwa ti mwawei, ti kinti mulut amet si a DeeƁwe hai shak, ti cu wei ti fwalsus fo' ta reni, yit fwal ti DeeƁwe ɓa u bumut.

⁶ Mbor tima re amet motus ɗak yit yut mute i naya amet kyek, ti ti motut yit ɗiri ti mupwet.

⁷ Faha som koltifai taɓak mii, ka ndok si ɓu fisel tima ɓa si se'us.

⁸ Shak maɗufal ima wa' ɗing gung ames fo, fota wur ames fweng, ɓwingil fati mulut ames ya, ɓin maɗufal ima wa' fa mwawei gbaf.

⁹ Mbor tima re amet motus, tima ɓa si mbe'ut ta saa ti arof ima ɓa si bumus, a kpang ti kol wilyal hure taan, hu tima ti matlis si re amet tawe.

¹⁰ Ti te a mbor tima ɗufal si shangut ti masti maɗesi. Ti kol femet ndere, mu mat ti mwalmwat, mu fati hai si masti som sapai ro, yit bum ti ɗufal ima si ti tirim, mu kinti hai si masti shak musut i ɗamam maɗesi.

¹¹ Ka ha kin arof ima si ɗiri ii afwar, ima arya ames si mwatus ta saa ti ambe'i kwa. Ɓurti gwel i marei mayus wa woti hai ya tasi fati mulut si Kristi hai, si wa ɓwet ti masti kunggo.

¹² A ti andi si wa dul ti haisus ɓur hai, ɓurti si nggyel aɗeng ima ai si zan ta mulut ti bya' ya.

¹³ Shak ta andi hwak, si ɓwet for ti myan ames ya gbya' sin nggaari ti wurai i ɗufal. A findelal i gbya' kyek si masi kwa, sin ti haar sin muɗu ta muɗori, sin lak ti findelal ima ɗat laki kwa.

¹⁴ I ɓin ɓweti arof ima si ɗiri ii afwar, ima arya ames si mwatus si mas kunggo, si al fe, si kol wurai ames ndere, ɓurti ka ndok si fa mazan ti wei fisel, si lak findelal mufwashani sikan hai.

¹⁵ Shini arofi ɓurti mai aɗengi, ti si hatatus si yus koltifai ti Shatan.

¹⁶ Na mbor mu koltifai nin yit ti arof ima arya ames si mwatus, ɗat ti ɗingus fo, ka ti kin kinggati tasi suɓut i som koltifai kwa. A ti andi suɓut i som koltifai si wa wis ti kyel i ɗing ti arof ima arya ames si mwatus fo, ima si ti tirim i mwawei.

¹⁷ Tabwa'a' ima si mas ro maɗesi ɗat si talus gilik, ii ma si ɓin masti ro fwet, fota mba ti findel i DeeƁwe hu kofiti.

¹⁸ Worong i DeeƁwe ni, “Ka hu no' fo i randong ya, myan ima hun ti ndash ti cijar kwa,” hu “Maro, ɗat si talus myatat ames.”

¹⁹ Ka ha mat se' ima si laki tasi tabwa' hai kwa, na yes ii ta fo i ɗufal apil ahun a ataat tawe.

²⁰ Som ima si cu wei ti masti mafwashi, mbyarayusi ya ta saa ti ɗufal wi, ɓa shini si mwen.

²¹ I fwalsa na mabel i DeeƁwe, hu Kristi Yeso, hu som lu' ima DeeƁwe benus, ɓa ha mas ro ti findelal mii kaciwa' ɓweti hai. Ɓweta ɗufal shak kiga'.

²² Ka ha ɓal ɓweti kinti ra i maɗesi kang ta hai ɗeng kwa, ka ha kin hai ta mafwashi i shini kwa. Fwanga haisa ya ti sapa.

²³ Hona woti ham kek, wo ha ham i manggɓu' macani ndyong ɓurti mwatan i ɗar ama, hu mwatan ima ngang ma kofsa ya fwet.

²⁴ Mafwashani i shini ka ɗingi ya rasman, si rus ta wei i puɓwar, mafwashi i shini kwaf ii na takfai ames.

²⁵ Andi hwak, roha maɗesani mii ka ɗingi rasman, ima simayus ta mufot wi si wa matkof.