1 Timoti 4 - Findel i DeeƁwe Ti Alis i Ron

Taɓak ti Timoti

¹ Rin lak ya na lai ɓwi nyai, na mukonan i dala, shini si wa honti fati mulut ya, si kolfai ti rinan i dang hu kofiti i rin mafwashi.

² Musut i kofiti mai yes ii ta kyel som fyarat i rere, ima ambe' ames motus fota si ngyesh ya ti shitam ima si ɗo ta man wi.

³ Si sha ɗufal kunggo hu laksus ka si cu shini musut i cwai kwa. A DeeƁwe masi andi, ɓa som koltifai ima si shang mwawei, si mat ti palang.

⁴ Ɓurti shak aɗeng ima DeeƁwe masus si ti ɗat, ka munggwya ti ɗama nin kwa, na ka mat ti palang,

⁵ ɓurtya si sapa ya ti fwal hu findel i DeeƁwe.

⁶ Na ha kof shuna ti ɗamam mii, ha wa mute ii maro maɗesi i Kristi Yeso, ima ha ngye ta saa ti mwawei i fati mulut hu kofiti maɗesi ima ha kolfai.

⁷ Ka ɗama futa hu findelal i tang ti tang i myanat ti DeeƁwe fo, hu findelal i gbya' kwa. Fo i mandi, Faha haisa tasi far ti myanat ti DeeƁwe fo.

⁸ Fati lo' mai shum mati ɗat ndyong, shak ta andi far ti myanat i DeeƁwe ɓin ɗat ta shak ɗamam, hya kintiɓwi si shak mute naya ti mwashi, hu ti yes wei.

⁹ Findel mai a kyas i findel ima ɗat mati ra apil-apil,

¹⁰ a yis nai kin ni ma ro ti kukush ta ngyesh ti angguri. Ni kinɓwi aminin si DeeƁwe mapweti, ima yis a Mabum i ɗufal shak, ɓin kinti shit si som ima si fa mwawei.

¹¹ Laka ti njeng ha kof si mii ɗamami hai.

¹² Ka ha hon ɗeng u koma mute i zalang ama ya kwa, tya ii ɗama i kaani ta kyel som koltifai, saa ti findel, hu mute ama, hu matɓwet, hu fati mulut, hu mute i sapai.

¹³ Faha hai si mbe' ti findel i DeeƁwe kparara ɓa ɗufal si hali, ha mba ti findel i DeeƁwe, ha kofiti hwak, ɗak i yes.

¹⁴ DeeƁwe fa mal i shang ti kofiti, ta fisel i findel i som shit myan ima tabwa'a' si kina ra maɗesi ames hai. Ka ha hon masti ro ti mal mai kwa.

¹⁵ Masa ɗamam mii ti shak njeng ama, Faha haisa shak si ro mai hai, ɓa shak ɗufal si ɗing cwai ti wei ama.

¹⁶ Ɗinga mute asa hu kofiti ndere. Lweshesha si mii ɗamami hai, ɓurti na ha masi andi, ha wa bum ti haisa hu som ima si halsa hwak.