1 Timoti 3 - Findel i DeeƁwe Ti Alis i Ron

Mbayai i Ɗing ti Som DeeƁwe hu Tabwa'a

¹ Findel mai a kyas i findel, shak maɗufal ima maɓweti kinti mulut ɓa u te ii maɗing ti som DeeƁwe fo, maɓweti ro maɗesi ndai.

² Maɗing ti som DeeƁwe fo, a kpang u mas mute kaciwa' wis ti se' ta nggwai nin, u te ii mambor andek, hu ma hai muɗyayi, ma ka'ti lo' ames ya ta masti mafwashi wi, ima si fasus ngye, ma mati mwalmwat, ima shang kofiti ndere.

³ A ma woti likit kwa, a ma kofti ɗufal ɓwari kwa, ma mulut muɗyayi, a maɓin kwa, a ma ɓweti cef kwa.

⁴ A kpang maɗufali u shang wa ti wur ames ndere, ɓa fe ames si halus, si fas ngye hwak.

⁵ Na maɗufali shang ngga' ima u kol wur ames ta kwa, ma wa masi atini u kol ɗufal i DeeƁwe ya?

⁶ Ka te ii kalaju ta fati mulut wi kwa, ka ndok ngye na hai kolus ta musut i ɓur ima Shatan lang ta.

⁷ A kpang u te ii maɗufal ima si lak ti muro maɗesi si yis hai ta ɗufal wi, ɓurti ka ndok te ii ɗama i se', u fur ta ra i Shatan.

⁸ Tabwa'a hwak, a kpak si te ii som ima si ndok si fas ngye, si mwawei hai, kaciwa' turum ti likit, hu som far ti cef ta fisel ti fyarat kwa.

⁹ A kpang si ka' mwawei manggyongi ti fati mulut ti ambe' maɗesi.

¹⁰ A kpang si tong mbasus tawe, na si wisus ti mafwashi kwa, ɗak si honus si mas ro i tabwa'a.

¹¹ Angga'i nai hwak, arof ames si te ii arof ima si ndok si fas nggye, a som haar kwa, a som i hai muɗyayi, hu hya ti findel si shak ɗamam.

¹² A kpang tabwa' u te ii re ma mbor andek, a kpak u shang kolti wur asus hu fe ames ndere.

¹³ Sin ima si mas ro ndere si wis ti asum maɗesi fwet, hu njeng i fati mulut si Kristi Yeso hai.

¹⁴ I kintiɓwi nyai mwash i yes kyel ama, i ma worongsa findel mai ɓurti,

¹⁵ na i yes kang kwa, ha wa shang ti ngga' ima ɗat ɗufal si wa ti haisus ta fota som i DeeƁwe. Mai a suɓut i som koltifai ti DeeƁwe mapweti, ima a yis mii cembe hu mahuhur i mwawei.

¹⁶ A awei, kinggyongat i myanat ti DeeƁwe mati baang. Kristi yes na lo' wi, Rin koftus ama mwawei, som lu' i DeeƁwe si ɗingus, mangga' i Kristi mai si mbai wa kyel i ramam, si fa mwawei si yis hai na naya, DeeƁwe ha'us ya wa fit ta cinjangat wi.