1 Timoti 2 - Findel i DeeƁwe Ti Alis i Ron

Taɓak Si Cwaiti DeeƁwe Afut

¹ Ti bya', i ɓweti i fu njeng i fwaran nyai cuhun wei ti fari, hun fwali ɓurti shini, hun palang ti DeeƁwe ɓurti ɗufal shak.

² Cuhun wei ti masi andi, ɓurti kaya hu shak som ima si mute si mbayai i kunggwal hai, ɓa ka te cala ta arak i mulwat ti, hu mute musut ti myanat ti DeeƁwe fo, hu mute ti masapa.

³ Mai a maɗesi, aɗengi ɗat DeeƁwe Mabum amukan ta fwet,

⁴ yis ima ma ɓweti ɓa ɗufal shak si wis mupwet, si kol ta shang ti mwawei.

⁵ DeeƁwe a andek je, mamuro ima ma mangra ta mabel i DeeƁwe hu ɗufal a andek je, a yis mii maɗufal Kristi Yeso.

⁶ Ayis fa haisus ɓa u dum ɗufal ya shak. A muro ima DeeƁwe fa naya mai si myan hai kiga'.

⁷ A ɓurti mai si kinun, i te ii ma mba ti findel i DeeƁwe, hu mute ii mamuro, makofiti wa kyel i Ramam, muro i fati mulut ti mwawei. A awei i laki, a fyarat kwa.

⁸ I ɓweti shak arya ti kikyali si har ra masapai ta fit saa ti fwal ti DeeƁwe, kaciwa' futut hu shaal.

⁹ Na musut ti fisel moti hwak, i ɓweti arof si mas malem kiga', si shu arom hwak ta fisel tima u kin bukat kwa, ka si ɓal fati njeng tasi lat ti hai i malem kwa, hu sok ti arom i ugbwirik mujuwi, ahun ii afyai munzyuwi kwa, ahun arom ima si ɓal cef kwa

¹⁰ a ti masti ro maɗesi ima wa kiga' hu arof ima si kof si cwai ti DeeƁwe afut.

¹¹ Ɗat mbor ti far shangi loo, ti rak ti hai hwak.

¹² I fa mbor fisel ɓa ti te ii mukofi ti kwa, ahun ti te ti kaitat ta si hai marei kwa, a kpang ti te cakat,

¹³ ɓurti a Damu si tong lu'sus ti bya', ɗak Uhawa.

¹⁴ Ai si dang a Damu kwa, a mbori si dangut ti mas mafwashi.

¹⁵ Arof si wa wis ti mupwet ta fisel ti al, na si cu wei ti fati mulut, hu matɓwet, hu mute ti sapai, hu ka'ti hai ya.