1 Timoti 1 - Findel i DeeƁwe Ti Alis i Ron

Too'

¹ Kaada moti ii ta kyel i Pool mamuro i Yeso, ta fo i DeeƁwe Mabum amukan hu ta fo i Yeso Kristi ima a yis a ɓwi amukan,

² wa kyel i Timoti al amen i mwawei ta saa ti fati mulut. Mal maɗesi hu gu'ti ashur hu mute cala ta kyel i DeeƁwe Demukan hu Kristi Yeso Deembai amukan.

Taɓak Si Som Kofi i Fyarat Si Anggut Hai

³ I ɓweti ha tak mute ta Afisa, ta ngga' ima i fwala myan ima yin wa Makidonya, ɓurti ɓa ha dul shini ɗufali mwal ɓa si hon but ti kofiti i fyarat ima sima masi.

⁴ Lakayus ka si fa mulwat ames tasi hal ti findelal i tang ti tang hu ambe' i nzor ti asumam i washash i ɓele ima si ti anggwe' kwa. Musuti mai kwal uɓet hu shaal, u kin hu hon ka'ti findel i DeeƁwe mweret ima mii ta fisel ti fati muluti.

⁵ Laka findelal mii ɓa u kin ɗufal si te ti matɓwet, ima u lang ya ta mulut musapa, hu ambe' maɗesi hu fati mulut manderei.

⁶ Shini ɗufali ti si welus tasi koltifai ti ɗamam mii, si langus koltifai ti findelal i gbya'.

⁷ Ɗufali si ɓwet kofti anggut i Mosis co, ɗak sin haiyusti si shang aɗeng ima si laki kwa, Si shang haiyi shak ta ɗamam ima si lweshesh ii haiyi hwak kwa.

⁸ Ka shangi anggut mati ɗat na maɗufal masti ro ta fisel maɗesi.

⁹ Ka shangi hwak nyai, si mas anggut a ɓurti som munderei kwa, a ɓurti som ima si nggyalan ti anggut ya, hu ima si njeng na hihai, hu ima si mwen DeeƁwe fo kwa, hu ima si masti mafwashi, hu ima si ti sapa kwa, hu ima si koltifai kwa, hu ima si fwar hu dees hu nasus ya, hu ima si fwaran ti ɗufal.

¹⁰ Hu som arak i zuruk, hu arya ima si kwanan ti arya, hu arof ima si kwanan ti arof, hu som juwil ti ɗufal ya, hu som fyarat, hu som ka'ti fo i fyarat, hu shak aɗeng ima mazan ti wei si kofiti i mwawei.

¹¹ Kofiti mai ma si Muro Maɗesi macinjangat hai, ima DeeƁwe fan na ra.

Mal Maɗesi DeeƁwe wa Kyel Pool

¹² I palang Kristi Yeso Deembai amukan, ima fan njeng, ɗingi ɗatus ɓa i te ii ma hya ti findel, no'un si ro ames hai.

¹³ Shak ta ngga' ima ai yin yun ii ma se' ti DeeƁwe, ma fati ɗufal shum, DeeƁwe gu'un ashur ɓurti shak aɗeng ima i masi, i masi ta maɓing wi, hu kaciwa' fati mulut.

¹⁴ Si shuhun maɗesi i Deembai amukan hai gilik, akul hu fati mulut hu matɓwet ima si ta Kristi Yeso wi.

¹⁵ Findel mai a kyas i findel, ima ndok ɓa si mat fweng nyai, “Kristi Yeso yes na naya ɓa u bum som masti mafwashi,” ima ayin i ɓin masti mafwashi shak.

¹⁶ Shak ta andi, DeeƁwe gu'un ashur, si ni na kyel amen, ayin i ɓin mafwashi. Yeso Kristi kof ka'ti agung ames ima ma kaciwa' nggwe', ɓa i te ii ɗama i kaani wa kyel shak som ima si wa fati mwawei si yis hai yes wei, si wis mupwet i myan hu myan.

¹⁷ Shak ngye hu cinjangat wa kyel i DeeƁwe myan hu myan, yis a Makai i myan hu myan, yis ima si ɗyangus kwa, yis ima mwat kwa, a yis ahwes ɗwyat mii DeeƁwe! Aandi.

¹⁸ A Timoti, al amen, i fasa findel i manjengi mai kiga' hu findel i shit ima ai si lak hwer si ha hai, ɓa ha masti ɓin maɗesi fota maɓwol i Deembai,

¹⁹ ha ka'ti fati mulut mweret ti ambe' maɗesi. Shini ɗufali si kin fati mulut asus ti rafatut, ɓurti si nggwes i hal ti ambe' i mulwat ames.

²⁰ Ta saa yusti a hu Himeniyus hu Alekzanda, sin ima i fa ta ra i Shatan ɓa si wis dul ti mwal si hon findelal i se' ti DeeƁwe.