1 Tasalonikawa 4 - Findel i DeeƁwe Ti Alis i Ron

Mute i Kinti DeeƁwe Ɗat Si Ɓwi

¹ A shunun, na dala shak, i massu taɓak si ngga' i mute i kinti DeeƁwe ɗat si ɓwi ta, fota ngga' ima hu ma mute ta. Mwashi ni fwalsu, ni kinsu ta saa ti Deembai Yeso, ɓa hu cu wei ti masi andi i hai i hai.

² Hun hu shang musut i taɓak ima ni fu ta fisel ti mbaitat i Deembai Yeso.

³ A ɓweti i DeeƁwe, ɓa hu wis sapa, hu tital arak i zuruk fo.

⁴ Konggi maɗufali na saa yuti u shang ngga' ima u kol lo' ames ta, saa ti sapa hu ngye wi,

⁵ kaciwa' kolti shit mafwashi fota i ramam, ima si shang DeeƁwe kwa.

⁶ Ka ɗeng mas nusus mbwa hai saa ti ɗamam mii kwa. DeeƁwe a ma weri si shak ɗamam mii hai, fota ngga' ima ni laku ta ti bya' hu ngga' ima ni taɓaku ta hwak.

⁷ DeeƁwe laikan ɓa ka mas mute i zuruk kwa, i mupwet musapa.

⁸ Ɓurti andi, maɗufal ima nggwes ti taɓak mai, nggwes ti a maɗufal kwa a DeeƁwe, ima fa hu Rin Masapai ames.

⁹ Mwashi si mangga' i ɓweti ɗiyai, a kpak ni worongui kwa, ɓurti hun ti haisu DeeƁwe kofu ti mute i ɓwet ti ɗiyai.

¹⁰ Mwawei ndai, hu kof matɓwet amu wa kyel shunu ta ta' ti Makidonya shak. Shak ta andi, a shunun ni taɓaksu, hum hun kofti ɓweti hyang i hai i hai.

¹¹ Kin hun hai i mute cala, hun fati ambe' si mute amu hai, hu roha i ra amu, fota ngga' ima ni laku ta.

¹² Ii na fisel moti hu wa mute ti ngye ta mabel i ɗufal ima a som koltifai kwa, ɓa ka hu ɓweng sai si ɗeng hai kwa.

Yes i Deembai

¹³ A shunun, ni ɓweti hu te ta maɓing wi si mangga' i ɗufal ima si rak ucwa wi kwa, ahun hu shat shaat fota anggum i ɗufali, ima wa' si ti kintiɓwi kwa.

¹⁴ Ka fa mwawei nyai Yeso mot lukfit hwak, angga' ima ka fa mwawei ta nai nyai DeeƁwe ma yes ti ɗufal ima si rak ucwa wi saa ti Yeso, ma wa muhumtus kyel akul hu yis.

¹⁵ Fota ngga' ima findel i Deembai lak ta, ni laku nyai, kan ima ka ɗiri ti mupwet, ima si hon kan na yes mwen ti muhumkyel i Deembai, mwaweiyi ndai, ka wa mutong ɗufal ima si rak ucwa wi kwa.

¹⁶ Deembai ti haisus ma wa muɗor ta fit ti la munjengi ti la ti makai i som lu' akul hu la ti ngyef ti DeeƁwe yit lai, ima si mot saa ti Kristi wi, si wa mutong mulukfit.

¹⁷ Takfai ti andi, ɗak kan ima ka ɗiri ti mupwet si hon sikan na kwa, si wa vyam sikan ya akul hu sin wa wii ri' ɓa ka shwai hu Deembai ta se wi. Angga' ima ka wa mute akul hu Deembai ta nai myan hu myan.

¹⁸ Ɓurti andi, fahun ɗiyai njeng i fwaran ti findelal mii.