1 Tasalonikawa 3 - Findel i DeeƁwe Ti Alis i Ron

¹ Ɓurti andi, myan ani ajin amen toikyel, ni ɗingi ɗat ɓa si hon nin ta Atens a hwenin ni.

² Ni ro Timoti yis ima mii nusikan, hu mwes i ro i DeeƁwe saa ti but ti Muro Maɗesi i Kristi, ɓa u ɓwengu, u fu njeng i fwaran saa ti fati mulut,

³ ɓa ka ɗeng amu hwiti mulut ya ɓurti shum kwa. Hun ti haisu hu shangi nyai aɗeng ima si lu' ti kan ɓuri nai.

⁴ Ti mwawei, myan ima kan tikul, ni laku ya hwer nyai, ka wa woti shum. Angga'i nai te ta andi, fota ngga' ima hu shangi ta.

⁵ Aɗeng ima kin te andi, myan ima i ɗingi i toikyel, i ro muro ɓa i hal ngga' i fati mulut amu ta. Myanat ka'un, i ni ka madang yes ta nin fiseli u dangu ya, ro aminin u tes i gbya'.

Taɓak i Timoti

⁶ Mwashi Timoti humkyel ta kyel amu, yes ti muro maɗesi si hai i fati mulut amu hu matɓwet amu. Lak nin ni, ngang hu ma mbe'i ti nin, hu ma gweli ɓa hu ɗing nin, fota ngga' ima ni gwel ɓa ni ɗingu ta hwak.

⁷ A shunun, na saa ti ndus aminin hu shum ima ni wo, ni wis njeng i fwaran ɓursu si mangga' i fati mulut amu hai.

⁸ Mwashi ni pwet, tun tya hu ma mangrai ti njeng saa ti Deembai wi.

⁹ Anggi musut i palangi ni wa masi wa kyel i DeeƁwe ndere, ɓurti u kof jakak ima ni mati ta mabel i DeeƁwe amukan ɓursu ya?

¹⁰ Fo' ta reni ni fwal ti ambas ɓa ni wis ɗingsu shishat hu shishat, ɓa ni dala hya ti aɗeng ima toikyel ta fati mulut amu.

¹¹ Ni fwal ti DeeƁwe amukan Dee ti haisus hu Deembai Yeso u ɓu nin fisel ya ɓa ni wis yes kyel amu.

¹² Ni fwal ti Deembai u kin ɓweti ɗiyai amu u cu wei ti ngye gilik si ɗiyai hai, hu si shak ɗufal wi fota ngga' ima aminin masi si hun hai.

¹³ Ni fwal ti DeeƁwe u fu njeng i mulwat ɓa hu te kaciwa' lyahan, hu te ti sapa ta mabel i DeeƁwe amukan, hu Dee myan ima Deembai Yeso ma wa muhumkyel akul hu shak som sapa ames.