1 Tasalonikawa 2 - Findel i DeeƁwe Ti Alis i Ron

Ro i Pool ta wii Tasalonika

¹ A shunun, hun hwak hu shangi yes aminin na saa yuti a gbya' kwa.

² Hun hu shang ngga' ima si kof nin ɓwar ta Filipi kaciwa' ti ni yes kyel amu hu ngga' ima ni wo shum ta kyeli. Shak ta andi, DeeƁwe amukan fanin njeng i fwaran ɓa ni mba hu Muro Maɗesi ames ti mulut andek, shak ta zan ti wei ima ni wisi.

³ Taɓak ima ni masui mai, i ma ɓa u kin ɗeng u bukat, ahun u te ti zuruk, ahun ni ma dang su kwa.

⁴ Ni ma findel fota som muro ima DeeƁwe shangi ti nin fanin ro i mba ti Muro Maɗesi. Ambe' aminin ɓa ni kin a ɗufal si jakak kwa, ɓa ni kin a DeeƁwe u jakak. Ayis je a maɗing ti ambe' i mulwat amukan.

⁵ Hu shangi findel aminin ii mimyat na fo kwa, i musut i mute i yok ima ni yu mufot ti kwa. A DeeƁwe mashang ti ɗamam mii shak.

⁶ Mangga' i far ti asum fota ɗufal, ni far na saa yuti, ahun ta kyel i ɗeng kwa fweng. Tasi mute i som muro i Kristi, naɗin ni te ii kol manggahi ta kyel amu,

⁷ ni rak ti hihai na saa yuti, fota ngga' ima naa ti ɗyangan ti fe muyayi fo mweret.

⁸ A ɓurti ni ɓwetsu fwet, a yis nai ɗat nin si ɓwi hai ɓa ni mba Muro Maɗesi i DeeƁwe mai, a mbai kyek je kwa, ta mute asinin hwak, ɓurti hu lang nin na mupwet fwet.

⁹ A shunun, mbe' hun shum hu ɓwar ima ni kof, ni cu wei ti ro fo' ta reni ɓurti ka ni kin andek amu kinggat hai takfai tima ni mba hu Muro Maɗesi i DeeƁwe.

¹⁰ A hun, hu mii shit, hu DeeƁwe hwak, i ngga' ima ni mas mute i sapa, hu mute manderei, hu mute kaciwa' mafwashi na saa yuti hun ima hu fa mwawei.

¹¹ Fota ngga' ima hu shangi ni taɓak ku shak fota ngga' ima dee taɓak fe ames ta,

¹² i njeng i fwaran, hu ka'ti agung, hu fwal ɓa hu mas mute amu maɗesi ta mabel i DeeƁwe, yis ima layu ta wii kaitat ames hu cinjangat ames.

¹³ Ngang ni cwai ti wei ti palang ti DeeƁwe ima hu fa mwawei si muro ima ni mba. Muro mai yes ta kyel ames, a ɗama ima maɗufal lang ti ya kwa. Hu mat tasi mute i muro i DeeƁwe, mwashi yis maro na saa yuti.

¹⁴ A shunun, a hun hu te ii ɗama i kaani wa kyel suɓut i som koltifai ti Kristi ima si ta ta' ti Judya. Hu woti shum ta kyel i ɗufal amu fota ngga' ima anggum i suɓut i som koltifai si wo ta, ta ra i som Ju.

¹⁵ A sin som Ju si for Dee Yeso, hu som i shit, a sin mwandeki si ngga nin. Si kin DeeƁwe hal ɗat si ɓwi kwa, si yus i anggo wa kyel ɗufal shak.

¹⁶ Sima sha sinin but ti Muro Maɗesi wa kyel Ramam ka si wis mupwet. A fisel tima ngang sima suɓut ti mafwashi u hya ta nai. Futut i DeeƁwe tu ɗorus hai.

Pool Gwel Ɗing ti Tasalonika

¹⁷ A shunun, myan ima si shanin yes kyel amu i al myan, mai shanin mbe'i ti hun kwa. Ni gwel ɓa ni ɗingu, ni kin hai hwak ɓa ni yes ka shwai shishat si shishat.

¹⁸ Ni ɓwet ɓa ni yes kyel amu ti mwawei. Yin Pool, i kin hai myan hu myan, Shatan shanin.

¹⁹ Ami mii kintiɓwi aminin, hu jakak aminin, hu aɗeng i nggwak ti ajin aminin ta mabel i Deembai Yeso mwen muhumkyel ames ya? I nyai a hun hoo?

²⁰ Mwawei ndai, a hun hu mii cinjangat hu jakak aminin.