1 Pita 5 - Findel i DeeƁwe Ti Alis i Ron

Wa Kyel Washash hu Fe Zalang

¹ Washash ima si na saa yuti, i ma taɓaksu fota wash, i mii shit i shum ima Kristi wo, i ma andek ta saa ti som wis ti cinjangat ima ma wa matkof.

² Tehun ii som ɗing ti tutwai i DeeƁwe fo, ima si ta ra yuti. Ka hu masi fota si kinu a kpang kwa, u te a ɓurti hu fa haisu ta ngga' ima DeeƁwe ɓwet ɓa hu masi ta. Kan hu te ii som i ɓweti cef kwa, tehun ii som ɓweti masti ro.

³ Ka hu kof som ima DeeƁwe fu mbaitat si sin hai ya kwa, tehun ii som kaani ta kyel tutwai.

⁴ Myan ima Mbai i Ɗing ti Tutwaiyi pwak ya, hu wa mat ti rurwan macinjangat ima rafaat kwa fweng.

⁵ Hun fe waya hwak, rak hun ti hihai amu ta mabel i mbayai. Shak asui, fahun hihai amu hu fwang ɗiyai ti ro, ɓurti, “DeeƁwe zan wei ti som i ngye na hai, fai maɗesi wa kyel som murak na hai.”

⁶ Rak hun ti hihai amu ta kon manjengi i DeeƁwe, ɓa yis u zanu fit myan ames.

⁷ Wak hun shak tirim amu ta si yis hai, ɓurti yis a ma talsu myatat.

⁸ Ka' hun haisu ya, hu te mweret. Ma zan ti wei ti hun Shatan, ma hatatan fota kukum yis ndurum far ti ɗeng ɓa u gwyak ya.

⁹ Ka hu fas fisel kwa. Tehun mangra gbwenjeng si fati mulut, ɓurti hu shangi nyai shunu shak na naya si woti shum musut andek.

¹⁰ Takfai tima hu wo shum i myan ndyong, DeeƁwe ma fati mal, ima laiyu ta cinjangat ames i myan hu myan, yis ti haisus ma wa muhum tu kyel, u kinu hu njeng, hu te gbwenjeng kaciwa' muni reket.

¹¹ Shak andok u wa kyel ames myan hu myan! Aandi.

Too' i Dala

¹² I worong foti kaada moti ti bum i Sila, ima i ɗingus a nusikan ma hya ti findel. I worongsui ɓa i fu njeng i fwaran hu laki nyai, mai a mal mwawei i DeeƁwe, tehun i hai gbwenjeng.

¹³ Sin som koltifai ima si ta Babila, ima DeeƁwe benu tikul, si tuksu too', al amen Mak hwak ma too'.

¹⁴ To' hun ɗiyai ti too' i matɓwet. Cala u te akul hu hun shak ima hu ta wii i Kristi.