1 Pita 4 - Findel i DeeƁwe Ti Alis i Ron

Mute ɓurti DeeƁwe

¹ Mwashi ima hu shangi nyai Kristi wo shum ta lo' ames, hun hwak sinzam hun haisu ɓa hu te fota yis. Shak maɗufal ima wo shum na lo' wi, hon masti mafwashani ndai.

² Nasi mwashi yes wei, maɗufal ma wa muhum masti mute mafwashi kwa, ma wa masti aɗeng ima DeeƁwe ma ɓweti.

³ Ai, ti hu ɓwash myan ima hun masti ɗamam ima som kuna si ben ɓa si masi. Mute i gbya', hu gwel, hu woti likit, hu masti ɗamam i zuruk, hu yok, hu koltifai ti harkyel ima si yus ii ɗama i zuruk.

⁴ Mwashi si mbe' mayus ii ɗama mamwai myan ima hu nggyu i ɗabyam akul hu sin ta saa ti mufwashi. Ayis kin si sya'ansu.

⁵ A kpak si lak shak ɗamam ima si masi ta mabel i DeeƁwe, ima ma wa tot ti ɓur si som ima si ti mupwet hu ima si mot.

⁶ A ɓurti mai si mba Muro Maɗesi wa kyel i som ima ti si mwatus mwashi. Ti si totus ɓur musut ti i ɗufal i lo', ɓa si te akul hu DeeƁwe ta saa ti rin.

⁷ Dala i shak ɗamam kat ndyong. Ɓurti andi, tehun mweret, ka' hun haisu ya ɓa hu wis fwal ti DeeƁwe.

⁸ Ima ɓin shak, ɓwet hun ɗiyai amu ndere, ɓurti matɓwet kyan shwaiti mafwashani ya hyang.

⁹ Mat hun ɗiyai ta wurai amu kaciwa' rumung.

¹⁰ DeeƁwe fa ɗufal mal akat-akat. Mas hun ti ro ndere ɓa hu bum ti ɗiyai

¹¹ Na ɗeng ames a ma mba ti findel, u cu wei ti mbai si Lyauwi hai fota a DeeƁwe ti haisus ma mbai ta fo yusti. Na ɗeng ames a ma ro, u masi ti njeng ima DeeƁwe fas. Mas huni ati ɓa si fa DeeƁwe ngye ɓurti Yeso Kristi. Ayis mati cinjangat hu andok yes myan hu myan. Aandi.

Woti Shum ɓurti Mute ii Makoltifai

¹² A shunun, ka hu shok na fwai ti shum munjengani ima hu mii hai, fota a ɗama mamwayi nin ima wisu kwa.

¹³ Fo i andi, jakak hun ɓurti hu wo shum akul hu Kristi, ɓa jakak amu u te gilik myan ima cinjangat ames pwak ya.

¹⁴ Na si se'u ɓurti asum i Kristi, disyo' mayu hai, ɓurti Rin hu cinjangat i DeeƁwe ma akul hu hun.

¹⁵ Na hun woti shum, ka hu wo ɓurti hun a som i for ti ɗufal kwa, ahun a asher, hu a som masti mafwashi, hu som puɓwar kwa.

¹⁶ Shak ta andi, na hun woti shum ɓurti hun a som koltifai ti Kristi, ka hu shusho kwa. Palang hun DeeƁwe ɓurti si laisu ti asum ames.

¹⁷ Ɓurti myan i tot ti ɓur ndok, a kpang si tongi ti ti som koltifai ti DeeƁwe. Na si tongi nasi kan hai, ami ma wa wisti som ima si nggwes i hal ti Muro Maɗesi i DeeƁwe ya?

¹⁸ Hu, “Na som munderei si wa pis a purut, ami ma wa wisti som ima wa' si mwen DeeƁwe fo hu som mufwashi ya?”

¹⁹ Ta dala, som ima si woti shum si ngga' ima DeeƁwe ma ɓweti ta, si fa haisus ta ra i DeeƁwe ma hya ti findel ima lanus, si cu wei ti masti maɗesi.