1 Pita 3 - Findel i DeeƁwe Ti Alis i Ron

Arof hu Arya

¹ A arof, hun hwak rak hun ti hihai amu ta mabel i arya amu. Na ɗeng ta saa ti aryai fa mwawei si findel i DeeƁwe hai kwa, nan ɓurti murak na hihai amu, DeeƁwe ma wa yes tus kaciwa' si findelus,

² ɓurti si ɗing mute i sapa hu munung amu.

³ Ka ɗat amu tehus ii na saikyel kek kwa, fota hu lat ti hai, hu shwaiti awar i ugbwirik munzyuwani, hu arom i cef.

⁴ Foi andi, hon hun ɓa u te ii ta wii i mulwat amu, ɗat ima shyan kwa, hu mulut muɗyayi, tima ti ti ɗat fwet ta kyel i DeeƁwe.

⁵ Angga' ima ai arof ima si ti sapa ima si kinɓwi ta kyel i DeeƁwe, si kin haisus si ɗat ya. Si rak ti hihai wa kyel arya ames,

⁶ fota munung i Usara, ti hal findel i Ibirai, ti laiyus ii deembai amet. Hun hwak a fe amet, na hu mas mute manderei, kaciwa' fati myanat fisel.

⁷ A arya, andi hwak tehun nggas ti arof amu, hu jarrus ti fasus ngye, fota cam tima ti ti njeng kwa, ɓurti hu wa cwai ti kop i mal i mupwet akul. Mas huni andi kan ɗama nin shahu fwal ti DeeƁwe.

Shum ɓurti Mas ti Ɗama Ndere

⁸ Na dala, shak asui, fut hun haisu ya, ɗing hun shum i ɗiyai, ɓwet hun ɗiyai fota shunus i ɗiyai, kof hun gu'ti ashur hu murak na hai.

⁹ Ka hu wer mafwashi ti mafwashi kwa, ka hu wer se' ti se' kwa, wer hun ti kinti maɗesi. A ɓurti mai, DeeƁwe laiyu ɓa hu mat maɗesi.

¹⁰ Si worong nyai, “Maɗufal ima ɓwet mupwet ames hu ima ma ɓweti ɓa u yash na naya, a kpak u hon findel mafwashi, u hon lak ti fyarat.

¹¹ A kpak u hatat ta masti mafwashi, u mas maɗesi, a kpak u far mute i cala ti shak mulut ames.

¹² Deembai ma ɗing ti som munderei, Ma halan ti fwal ames shak. DeeƁwe haat ti mas wa kyel i som i masti mafwashi.”

¹³ Awe ma wa nggosu, na hu kin hai ɓa hu mas maɗesi ya?

¹⁴ Ahun na kol ta kyel ima ɓa hu wo shum ɓurti masti ɗama manderei, hu wa wis ti maɗesi ndai. “Ka hu mwen aɗeng ima si myanat i fo kwa, ka hu tirim kwa.”

¹⁵ Ta mulwat amu, kin hun Kristi ii Deembai. Ngang tehun mweret, ɓa hu mat shak lulal ima ɗufal si wa masui si aɗeng ima kin hu mati kintiɓwi. Mas huni loo hun fati ngye,

¹⁶ ti ambe' mandyasi, ɓa som ima si se'u, ɓurti mute maɗesi amu ta Kristi wi si wo shusho.

¹⁷ Ɓin ɗat, na a ɓweti i DeeƁwe, naɗin hu wo shum ɓurti masti manderei, hu ima hu wo shum ɓurti masti mafwashi.

¹⁸ Kristi wo shum sa andek ɗwyat ɓurti mafwashani i shak, manderei ɓurti ima si ndere kwa, ɓa u kolus ta kyel i DeeƁwe. Si forus ya na lai ɓwi, Rin humtus kyel ti mupwet.

¹⁹ Ti mbaitat i Rin mai wa mba findel i uges ta kyel i rinan ima sita mano' wi.

²⁰ Ai si njeng na hihai tasi ɓele myan ima DeeƁwe shwaiyus ti ka'ti agung wet, si mukonan ima Nowa yis ta' ti kwang i ham mbai. A ɗufal myarfu' je si pwet ta hami wi.

²¹ Hami a ɗama i kaani i batisma ima buma mwashi. Yis batisma mai sapa ha ya ta makyawi wi kwa, si mat hei wa kyel i DeeƁwe ti ambe' mandyasi. Fisel ti bum moti ti yes a ɓurti muluk fit ta mot wi i Yeso Kristi.

²² Mwashi Kristi mata fit, ta ra i ucwa i DeeƁwe akul hu som lu', mbaitat hu andok si mata mabel ames.