1 Pita 2 - Findel i DeeƁwe Ti Alis i Ron

¹ Ɓurti andi, shuhun shak ɗamam mafwashani ya, fota fyarat, hu mute i rere, hu nadon, hu shak findel i se'.

² Ɓwet hun findel i DeeƁwe, fota ngga' ima kalajwau sima myaf i woti fof ta, ɓa hu wo hu ngye saa ti bum,

³ mwashi ima ti hu hal ɗat i Deembai.

Afung Mapweti hu Ɗufal ima si Ben

⁴ Hu yes kyel i Kristi, afung mapweti ima ɗufal si nggwesti. Shak ta andi DeeƁwe benus fas mbaitat.

⁵ Hun hwak, huma ii afyai mupwetani ima si ta' ti wur i Rin Masapai, ɓa hu te ii som i kocok musapai, hun fati malal i ngyeshi i rin ima DeeƁwe maat ɓurti Yeso Kristi.

⁶ Worong ni, “Ɗing huni, i kin afung ta Zayon, afung ima ɓin ɗat u te ta nggwa i mahuhur, ima si ben. Maɗufal ima fa mulut si yis hai ma wa woti shusho kwa fweng.”

⁷ Mwashi hun ima hu fa mwawei, afung mai mati ɗat. Ta kyel i som ima wa' si fa mwawei, “Afung ima som i ta' si nggwesti a yis te ii nggwa i mahuhur.”

⁸ Hu, “Afung ima kyan ɗufal bukat hu afung ima kyanus mufur.” Si bukatan ɓurti si nggwes i hal ti muro, ima DeeƁwe sinzam ɓa si masusi.

⁹ Hun hu ma andi kwa, hun ɗufal ima DeeƁwe benu. Hun a som i kocokak i makai mbai, som musapa, ɗufal i DeeƁwe, ɓa hu kof palang wa kyel ames yis ima laiyu ta wii i maɓing yes kweneng i lum ti fo ya.

¹⁰ Ai hun a ɗufal kwa, mwashi hun a ɗufal i DeeƁwe. Ai hu mat gu'ti ashur kwa, mwashi hu mat gu'ti ashur.

¹¹ A myayun, i fwalsu fota som i far ti bum ti hai hu mwalmwat na naya, mas hun maleng ti aɗeng ima lo' amu maɓweti, ima ma ɓwol ti mupwet amu.

¹² Mas hun mute maɗesi ta saa ti Ramam. Unai shak ta sya'ansu nyai hu masi ndere kwai, si hatat ɗing ti maɗesi amu, si ha' asum i DeeƁwe fit, tasi mwen tima ma wa yes.

Fa ti Ɗufal Ngye

¹³ Fahun haisu ɓurti Deembai, wa kyel i shak som anggut, wa kyel i makai, ima mati andok shak,

¹⁴ hu gomnaha, ima yis tukus ɓa u ndash som ima si mas mafwashi hu u palang som ima si mas ɗamam ndere.

¹⁵ A ɓweti i DeeƁwe ɓa hu mas ɗamam ndere ɓa hu vo findelal i gbya' ya ta fwai i halyang i ɗufal.

¹⁶ Tehun fota ɗufal ima si catus i ra. Kan mute i cati ii ra amu kin hu mas mafwashi kwa. Tehun fota yarai i DeeƁwe.

¹⁷ Fahun shak ɗufal ngye. Ɓwet hun shunukan ima si fa mwawei, mwen hun DeeƁwe fo, fahun makai ngye.

¹⁸ A yarai, fahun haisu ta mabel i mawur amu ta fati ngyei shak. Mas hun aɗeng ima si laku, na si masu maɗesi i tal ti myatat, ahun na si kofsu ya gbaak.

¹⁹ Disyo' ma si maɗufal na ka' mulut myan ima sin kofsus ya, ɓurti mbe'i ti DeeƁwe.

²⁰ Anggi ngyei ha wa wisi na si sarama ɓurti masti mafwashi, ɗak ha ka'ti mulut ya? Na ha ka' mulut ti shum ima ha woi ɓurti masti maɗesi, DeeƁwe ma wa kinsa maɗesi.

²¹ A ɓurti mai DeeƁwe laiyu. Kristi wo shum ɓur sikan, kof kan fisel tima ɓa ka sa ta.

²² “Yis mas mafwashi kwa, fyarat nin matwis ta fo ames kwa.”

²³ Myan ima si sya'us, wer kwa, myan ima wo shum yis ni ma wa sheni kwa. Hon DeeƁwe ta ra, ima twat ɓur i mwawei.

²⁴ Yis ti haisus ha' mafwashani amukan ta lo' ames si shanggam hai, ɓa ka hon masti mafwashi, ka pwet ɓurti mute manderei. A ta fisel i afolal ames, hu wis cala.

²⁵ Ai hun yu fota tutwai ima si ɓaasus. Mwashi hu humkyel na kyel i Maɗingsu, Mafwang ti mupwet amu.