1 Pita 1 - Findel i DeeƁwe Ti Alis i Ron

Too'

¹ Kaada moti ii ta kyel i Pita mamuro i Yeso Kristi, Wa kyel i ɗufal i DeeƁwe ima benus, ima si mute tak mwalmwat na naya, si ɓaas wa ɓwayai i ta' ti Pontus, hu Galatya, hu Kafadokya, hu Asya, hu Bitinya.

² DeeƁwe Demukan shangu, benu ti ɓele, Rin ames sapa hu ya. Ta fisel ti cicaki i wash i Yeso Kristi, hu hal ti findel ames. DeeƁwe u cu wei ti fasu mal i maɗesi hu cala hyang.

Kintiɓwi Mapweti

³ Shak palang wa kyel i DeeƁwe hu Dees i Deembai amukan Yeso Kristi! Ɓurti mbai gu'ti ashur ames, DeeƁwe hum al sikan. Ka wis kintiɓwi mapweti, ta fisel tima DeeƁwe zan Yeso fit ta mot wi.

⁴ Ka mat kop gilik, kop ima rwat kwa, aɗeng ima rafat kwa, ahun u shen kwa, ima si kinui ta fit.

⁵ Ta si fisel ti fati mulut, DeeƁwe ma wa fwangsu ti rijing i andok ames. DeeƁwe cu wei ti masi ati yes myan ima hu mat mai bumi, ima si sinzam ɓa si ɓorya mwen ti dala ɓa shak hu ɗingi.

⁶ A kpang hu wo shum hu kikyawat na mulut ti musut i ambaha mai hyang, i myan ndyong mwashi. Shak ta andi, jakak hun fwet ti aɗeng ima DeeƁwe masui.

⁷ Ambaha mii si wa kofti mwawei i fati mulut amu. Ma wa mute fota ngga' ima si sapa ugbwirik ya ti man, fati mulut amu ɓin ugbwirik. Ugbwirik ti rafaat, na fati mulut amu te mangra ti njeng saa ti ambaha mii, ma wa kolsu palang hyang hu cinjangat hu ngye, mwen tima Yeso Kristi humkyel.

⁸ Ai hu ɗingus kwa, shak ta andi hu ɓwetus. Mwashi hu ɗingus kwa, shak ta andi hu fa mulwat si yis hai, ɗak hu hya ti jakak hu cinjangat ima lang mwal i hai.

⁹ Huma mat ti hya i fati mulut amu si yis hai, ma wa mute ii bum i mupwet amu.

¹⁰ Som shit ima ai si findel si mal ima mayu wa yes hai, si kin shit mweret ɓa si shang mai bumi.

¹¹ Si far ɓa si shang myan hu ngga' ima Rin i Kristi mata wii ames, ma kofti myan ima si lak findel i shum i Kristi hu cinjangat mbai ima ma wa koltifai.

¹² Unai si shangi nyai, ro mai ii haisus kwa, a amu. Mwashi, si mba Muro Maɗesi mai ti andok i Rin Masapai ima si tuk ta fit. Aɗengi mii calai kwa, som lu' sin ɓweti kinti shit mweret si ɗamam mii.

Tehun ti Sapa

¹³ Ɓurti andi, tehun mweret hu mas ro, ka' hun haisu ya. Kin hun ɓwi shak si mal maɗesi ima si wa fasu myan ima Yeso Kristi pwak ya.

¹⁴ Fota fe ima si hal findel, kan si wisu ti ɗama mafwashi ima ai hun ti myan ima hun ta maɓing wi kwa

¹⁵ Mwashi, tehun ti sapa si shak ɗamam ima hu masi, fota ngga' ima yis ima laiyu a masapa,

¹⁶ ɓurti si worong nyai, “Tehun ti sapa, ɓurti Yin a masapai.”

¹⁷ Na hun laiyan ti Dee ima twat ɓur si aɗeng ima maɗufal ma masi kaciwa' ɓweti hai, mas hun mute amu na naya tak mwalmwat, hun myanat ti DeeƁwe fo.

¹⁸ Hu shangi nyai DeeƁwe dumu ya ɓa u bumu ta mute i gbya' i kop ima hu cu i washash amu. Dumi ya ima masi mai rafaat kwa, fota ngga' ima ugbwirik munzyuwi hu mujuwi si rafaat ta.

¹⁹ A ti wash masapai i Kristi, al tutwi ima mati afol hu ima lya kwa fweng.

²⁰ DeeƁwe benus ii fisel ti dumi ya kaciwa' ti si lan naya, a ɓursu si pwaktus ya na myan i dala.

²¹ Ɓurti Kristi, hu fa DeeƁwe mulut, ima zanus fit ta mot wi fas cinjangat, ɓa fati mulut hu kintiɓwi amu si te mangra si DeeƁwe hai.

²² Mwashi, ngga' ima hu sapa haisu ya ta, ta fisel ti hal ti mwawei ɓa hu kol matɓwet mu mangrai wa kyel i shunu, ɓwet hun ɗiyai ndere ta mulwat wi.

²³ DeeƁwe hum al su ta fisel ti findel mapweti i myan hu myan. Mai aɗengi yes ii ta musut ima rafat kwa, ii ta musut mapweti.

²⁴ Fota ngga' ima Kaada lak ni, “Shak ɗufal si yus fota shala', shak cinjangat ames mayus fota mabuf ta ya. Shala' i shwaakus, mabufi u wis ya.

²⁵ Findel i Deembai te mangra gbwenjeng yes myan hu myan.” Findel mai a Muro Maɗesi ima si mba hui.