1 Korintyawa 9 - Findel i DeeƁwe Ti Alis i Ron

Andok i Al i Muro

¹ Yin i ma mute i cat ti ii ra kwa haa? Yin a al i muro kwa waak? Ahun i ɗing Yeso Deembai amukan kwa waak? A ɓurti hun a karat i ro amen hu ta saa ti Deembai kwa waak?

² Na shini si zanun a al i muro kwa, a awei ndai yin a al i muro na kyel amu! Ɓurti andi, ta wei i Deembai a hun hu mii bong ima kof nyai, yin i mute ii al i muro.

³ A ɓweng ti sai amen mai si som ima si totsun ɓur.

⁴ Ahun ni ti andok i cwai ta woiyi kwa waak?

⁵ Ahun ni ndok ni zan mbor mu fati mwawei ti kolfai a sinin ni, fota ngga' ima shini som muroi hu shunus i Deembai hu Kefas si masani ta kwa waak?

⁶ Ahun ayin hu Barnabas je, ima a kpang ni mas ro ni cu ti haisinin ya?

⁷ Maɓwol tyai ro u cu ti haisus haa? Awe han ahan u cu macwai kwa ya? Awe ma wa ɗing ti randong ɗak nggwes i woti fofi ya?

⁸ I lak ti mai ii ta ambe' i maɗufal kek haa? Ahun Anggut lak andi kwa waak?

⁹ Ɓurti si worong ta Anggut i Mosis nyai, “Ka ha no' fo i randong ya myan ima yis sussuk ti macwa kwa.” A randong je DeeƁwe ma tirim i hai haa?

¹⁰ A awei, lak mai a ɓur sikan, ahun andi kwa waak? Hei, si worong mai a ɓur sikan, ɓurti myan ima ma ahan han, ma sussuk ti macwa yis sussuki, si wa kintiɓwi i wis ti fo ames ta karati.

¹¹ Na ni lai musut i rin na mulwat amu, ma wa mute i mbai ɗama ni karat macwa amu i lo' kwa haa?

¹² Na shini si ti andok i wis ti mai na kyel amu, unai ɗat nin ni wis mahyangi kwa haa? Shak ta andi, ni mas ro ti andok mai kwa fweng. Fo i mandi, ni ka' mulut si ɗamam hai shak ɓa ni ɗingi ka ɗama fwang ro i Muro Maɗesi i Kristi ya kwa.

¹³ Hu shangi nyai, sin ima si ro ta Wur i DeeƁwe ii ta kyeli si wa wis ti cwa ames kwani? Ima si ro ta kyel i kuna si wis ames ta kyeli kwa waak?

¹⁴ Angga'i nai hwak, Deembai lak ni som ima si but ti Muro Maɗesi, si wa wis ti cwa ames ta kyeli.

¹⁵ Shak ta andi, i mas ro ti andok nin na saa ti mii kwa. I worong ti mai ti kintiɓwi nyai, ka hu mas ɗamam mii ɓursun kwa. Mbwesh i mot, sin hu ima si shan nggwak ti ajin si aɗeng mai hai.

¹⁶ Shak ta andi, myan ima i mba Muro Maɗesi, i wa nggwak ti ajin kwa, ɓurti a kpak i mas roi. Mwe asuni na i mba Muro Maɗesi mai kwa!

¹⁷ Na i mba Muro Maɗesi ti ɓweti amen, si wa fasun sai i muro. Na i mba ti ɓweti amen kwa, i ma masti a aɗeng ima si fan na ra fota yere ndai.

¹⁸ Ami asai i muro amen ya? Sai i muro amen a yis nai, yin mba ti Muro Maɗesi mal, i mas ro ti shak andok amen saa ti mba ti Muro Maɗesi mai kwa.

¹⁹ Yin a yere i ɗeng kwa, shak ta andi, i hat ti haisun ii yere i shak, ɓa i dul ɗufal hyang.

²⁰ Wa kyel i Ju, i te fota maɗufal i Ju, ɓa i dul som Ju. Wa kyel i som ima si ta ra i anggut, i te fota maɗufal ima mata ra i anggut (yin ti haisun i mata ra i anggut kwa), ɓa i dul som ima si ta ra i anggut.

²¹ Wa kyel i som ima si mati anggut kwa, i te fota maɗufal ima mati anggut kwa, (yin ti haisun i ti mute i cat ti i ra ta anggut i DeeƁwe kwa, i mana ra i anggut i Kristi), ɓa i dul som ima wa' si mati anggut.

²² Wa kyel som ima si to, i te ii matoi, ɓa i dul ima si to. Yin i te ii ɗamam shak yes kyel i ɗufal shak ɓa ta fiselal shak i bum shini.

²³ I mas mai shak a ɓurti Muro Maɗesi, ɓa i wis amen ɓwai i maɗesi ta saa.

²⁴ Ahun hu shangi nyai shak som i ngingyesh i tital si titalan, a maɗufal andek je wyas mal kwa ya? Tital hun ta fisel tima ɓa hu wis mal.

²⁵ Shak maɗufal ima mas ukan i ngingyeshash, fai hai ndere ɓa u mba masi tawe. Si masani ɓa si wis rurwan ima yash kwa, kan kama masi ɓa ka wis rurwan ima ii myan hu myan.

²⁶ Ɓurti andi, yin i tital fota maɗufal ima ma tital i gbya' kwa, i ɓyan fota maɗufal ima ma ndash ti se gbya' kwa.

²⁷ Wayou, i ndash lo' amen, i kin u te ii yere amen ɓa takfai tima i mba Muro Maɗesi wa kyel shini, yin ti haisun, si shahun mat ti mali kwa.