1 Korintyawa 7 - Findel i DeeƁwe Ti Alis i Ron

Kunggo

¹ Mwashi si ɗamam ima hu mas worong i hai, ɗat ɓa maɗufal u mas kunggo kwa.

² Ɓurti arak i zuruk ɓal, ɗat re u te hu mbor asus, mbor ti te hu re amet.

³ Re u hya ro i kunggo ames, andi hwak mbor ti hya amet wa kyel i re amet.

⁴ Lo' i mbor a amet kek kwa, ii re amet hwak. Andi hwak, lo' i rei a ames kek kwa, ii mbor asus hwak.

⁵ Ka andek sha mandeki kwa, na hu ɓeti tawe ɓurti myan ndyong ɓa hu fwal DeeƁwe, ɗak hu shwai ka Shatan mba hu, ɓurti hu ti ka'ti haisu ya kwa.

⁶ I lak ti mai fota taɓak, a aɗeng ima anggut lak nai kwa.

⁷ Naɗin ɓweti a wisi, na shak ɗufal si te fota yin. Ɗak ka mana akat-akat, DeeƁwe fa ɗeng mal ames akat, ɗeng mati mal mai, ɗeng yis ti ani.

⁸ Mwashi wa kyel ima wa' si mas kunggo hu ima arya ames si mwatus i nyai, ɗat si te kaciwa' kunggo, fota yin.

⁹ Shak ta andi, na sin wa ka'ti haisus ya kwa, si kunggo, ɓurti mbwesh si kunggo hu ima gwel u forus.

¹⁰ Wa kyel i som ima si kunggo, i fati anggut mai (ayin kwa, a Deembai). Ka mbor ti matkar hu re amet kwa.

¹¹ Na ti masi andi, a kpang ti te kaciwa' kunggo, na andi kwa, si ɗak ti mute ames ta hu re amet. Ka re for kunggo ya hu mbor asus kwa.

¹² Ta kyel i anggumi i lak ti mai (ayin, a Deembai kwa). Na nusikan nin yisti mbor tima ti fa mwawei kwa, ɗak yit ɓweti ɓa ti te akul hu yis, a kpang ka forut kunggo ya kwa.

¹³ Na mbor yit ti re ima fa mwawei kwa, ɗak yis ɓweti ɓa u te akul hu yit, a kpang ti for kunggo ya hu yis kwa.

¹⁴ Ɓurti andi, re ima wa' fa mwawei, tuu wis sapa ta kyel i mbor asus, hu mbor tima wa' ti fa mwawei, ti ti wis sapa ta kyel i re amet ma fati mwawei. Na andi kwa, fe amu si mute kaciwa' sapa, ta ngga' ima mata, si ti sapa.

¹⁵ Shak ta andi, na maɗufal ima wa' fa mwawei ma ɓweti u wis, u wis. Re ahun a mbor ma fati mwawei ma mano' si ɗamam ani hai kwa, DeeƁwe laikan ɓa ka mas mute i cala.

¹⁶ A mbor, a hun shi shangi nyai, ashang shi bum re amesh ya? A re, a hun ha shangi nyai, ashang ha bum mbor asa ya?

¹⁷ Shak ta andi, ka' hun haisu ta kyel ima Deembai kinu ta myan ima DeeƁwe laiyu. A anggut ima i fa shak suɓut i som koltifai mai.

¹⁸ Shak maɗufal ima DeeƁwe laiyus, ima ai si masus mukwen, ka mas mute i kaciwa' mukwen kwa. Maɗufal ima DeeƁwe laiyus ima ai si masu mukwen kwa, ka ni ɓa si masus mukwen kwa.

¹⁹ Mukwen, hu mute kaciwa' mukwen, si mii fo i ɗama kwa, a koltifai ti anggut i DeeƁwe a yis mii findeli.

²⁰ Shak ɗufal si mute si ngga' ima ai sin ta, myan ima DeeƁwe laiyus.

²¹ Ai ha a yere myan ima DeeƁwe laiya haa? Ka Teha hai ti tirim kwa. Na ha wa wis ti mute i cati i ra, masai.

²² Ɓurti yis ima ai yis ii yere myan ima Deembai laiyus, a yis Deembai catus i ra. Andi hwak, yis ima ai yis mute i cati i ra myan ima si laiyus, yis a yere i Kristi.

²³ Si pwaku ti cef fwet, ka hu te i yarai i ɗufal kwa.

²⁴ A shunun, tehun ta ngga' ima ai hun ta myan ima DeeƁwe laiyu.

²⁵ Mwashi mangga' i yamwan, a anggut nin ta kyel i Deembai kwa. I ma lefti ɓur ya fota maɗufal ima si kinsus ɓwi hai ta fisel ti gu'ti ashur i Deembai.

²⁶ I ma ɗingi ɓin ɗat maɗufal u te ta ngga' ima mata, ɓurti mwashi a myan i puɓwar.

²⁷ Ha kunggo haa? Ka ha far ɓa ha for kunggo ya kwa. Ha ma wa' kunggo haa? Ka ha far kunggo kwa.

²⁸ Shak ta andi, na hati kunggo, ha mas mafwashi kwa, na yamwan tima wa' ti shang re, ti kunggo ti mas mafwashi kwa. Sin ima si kunggo si ti tirim hyang na mupwet moti, i ɓweti fwangsu ya nasi mai.

²⁹ A shunun, aɗeng ima i laki, a yis nai myan toos. Na mwashi ta kyel i som ima si ti arof, si te fota si ti kunggo kwa,

³⁰ som ima sima shaat, si te fota sima shaat kwa, som ima si jakak, si te fota sima jakak kwa, ima sima pwak ti ɗama, si te fota si ti ɗama kwa,

³¹ ima si ro ti ɗamam i naya, ka si ha' ii fo i ɗama kwa. Ɓurti naya moti hu ɗamam amet si wa mumbit.

³² I ma ɓweti hu wis mute i cati i ra ta tirim wi. Maɗufal ima wa' kunggo, tirim ames a si mangga' i Deembai, ngga' ima u mas aɗeng ima u ɗat Deembai tasi ɓwi.

³³ Maɗufal makunggo mati tirim si ɗama i naya, ngga' ima u kin mbor asus ɗat si ɓwi,

³⁴ ambe' ames matkarus apil. Mbor tima ti kunggo kwa ahun a yamwan tima wa' ti shang re, tirim amet a mangga' i Deembai, ambe' amet a fati hai si Deembai saa ti lo' hu rin shak. Mbor ti kunggo tirim amet a mangga' i ɗam i naya, hu ngga' ima ɓa ti kin re amet ɗat si ɓwi.

³⁵ I ma lak ti mai a ɓurti maɗesi amu, a ɓurti ɓa i kinu munggi' ta la kwa, a ɓa hu te nderei, ɓa hu mas Deembai ro kaciwa' matkar ta ambe' wi.

³⁶ Na maɗufal woom yamwan asus, ɗak ti kol ta wilyal i kunggo yis gwel sut fwet, ɗat u kunggot. Na andi, mas mafwashi kwa.

³⁷ Shak ta andi, maɗufal ima zan ta mulut ames nyai, mati tirim kwa, mati ka'ti haisus ya, ma wa kunggo ti yamwani kwa, mai hwak masi ndere.

³⁸ Maɗufal ima kunggo yamwan tima woom masi ndere. Yis ima kunggo kwa ɓin masi ndere shak.

³⁹ Mbor ti ti munggi' i kunggo ta la yuti na re amet yis ti mupwet. Na rei motus, munggi' i kunggoi ɗuk ta la yuti ndai, ti ndok ti kunggo maɗufal ima ti ɗingi ɗatut, a kpang maɗufali u te ii makoltifai ti Deembai.

⁴⁰ Ɗingi amen, ti wa ɓin ti jakak na ti te kaciwa' kunggo. Ɗingi amen yin hwak i mati Rin i DeeƁwe.