1 Korintyawa 6 - Findel i DeeƁwe Ti Alis i Ron

Anggut i Puɓwar saa ti Som i Koltifai

¹ Na ɗeng ta saa yuti yis ti puɓwar hu ɗeng, ami kin u kol ta kyel i som koltifai kwa, u hat koli ya ta kyel i som ima wa' si koltifai ɓa si totus ɓur ya?

² Hu shangi nyai a som sapa si wa tot ti naya ɓur kwani? Na a hun hu wa tot ti som naya ɓur, hu ti piris i totti ɓur si ɗamam i dangres mii kwa haa?

³ Hu shangi nyai ka wa tot ti som lu' ɓur kwa haa? Na yis wa mute andi, a kpak ka shang tot ti puɓwar si ɗamam i dangres i naya mii.

⁴ Na hun ti puɓwar fota mii, ami kin hu wa ti ta kyel som ima si mii fo i ɗama kwa, som koltifai sin na ya?

⁵ I lak mai ɓa i fu shusho. Kof ndai hu mati ɗeng ma piris na saa yuti ima ɓa u tot puɓwar ima mana saa ti som koltifai kwa ndai haa?

⁶ Fo i mandi, ɗeng kwal nusus ta fo ɓur ti, mas mai ta wei i som ima si mii som koltifai kwa!

⁷ Kolti ɗiyai ta fo ɓur ti ima hu masi, kof to amu fweng. Ami u kin hu ka' mulut, na si masu mafwashi kwa ya? Ami u kin hu ka' mulut, na si muku kwa ya?

⁸ Fo i mandi, hun ti haisu hu muk shini, hu mas mafwashi, hu mas mai si shunu hai.

⁹ Hu shangi nyai som i gbaf si wa cwai ti kop i kaitat i DeeƁwe kwa haa? Ka si dangu kwa, som i arak i zuruk, hu som koltifai ti harkyel, hu som zuruk, hu fe se muryai, hu arya ima si raki ti arya,

¹⁰ hu asher, hu som yok, hu som filal ti likit, hu som se' ti ɗufal, hu som cwai ti kalɓat, si wa cwai ti kop i kaitat i DeeƁwe kwa.

¹¹ Angga' ima ai shini amu sin ta nai. Shak ta andi si sahu ya, si sapa hu ya ta mafwashi wi, si fu mute manderei saa ti asum i Deembai Yeso Kristi hu ta Rin Masapai i DeeƁwe amukan.

Arak i Zuruk

¹² “Si cat tun ɗamam ii ra shak,” a shak ɗamam ka cwai mwai ames kwa, “Si cat tun ɗamam ii ra shak,” i wa mute ii yere ta ra i ɗamam shak kwa.

¹³ “Cwa a ɓurti ɗar, ɗar a ɓurti cwa.” Shak ta andi DeeƁwe ma wa masti gbya' ti sin shak. Lo' a ɓurti arak i zuruk kwa, a ɓurti Deembai, Deembai a ɓurti lo'.

¹⁴ Ta fisel ti andok ames, DeeƁwe zan Deembai fit ta mot wi, ma wa zan sikan fit hwak.

¹⁵ Hu shangi nyai, lo' amu ma andek ta saa ti ɓwai i lo' i Kristi ti haisus kwani? Unai fwet hu zan andek ta saa ti ɓwai i lo' i Kristi hu fut ya hu i al ti se haa? Andi kwa fweng!

¹⁶ Hu shangi nyai, yis ima fut lo' hu i al ti se, si te ii lo' andek ndai haa? Ɓurti si ni, “Apili si wa mute ii lo' andek.”

¹⁷ Yis ima te andek hu Deembai, si te andek hu yis ndai saa ti rin.

¹⁸ Tital hun arak i zuruk fo. Shak anggum i mafwashi ima maɗufal masi, a na fai i lo', yis ima mas mafwashi i arak i zuruk, mas a lo' ames mafwashi.

¹⁹ Hu shangi nyai, lo' amu a wur i Rin Masapai, ima mata saa yuti, ima hu mat ta kyel i DeeƁwe kwani? Hun ii haisu kwa,

²⁰ si pwaku ti cef hyang. Ɓurti andi, fahun DeeƁwe ngye ti lo' amu.