1 Korintyawa 5 - Findel i DeeƁwe Ti Alis i Ron

Re' Hun ma Arak i Zuruk Ani Ya

¹ I hal findel mafwashi i arak i zuruk na saa yuti, musut ima si masi ta Ramam wi kwa, si ni ɗeng hatat ti mbor ti dees ii masus.

² Hu mati nggwak ti ajin! Ami yu ya! Cu ɓa hu hya ti ɗar mukyawi, hu re' musut i maɗufal ima mas mai i aɗengi ya ta saa ti suɓut amu kwa waak?

³ I shangi i ma akul hu hun na lo' wi shishat hu shishat kwa, i ma akul hu hun ta saa ti rin. Tii lef ɓur tasi ma masti mai fota i mata saa yuti.

⁴ Myan ima hu suɓut ta saa ti asum i Deembai Yeso, i ma akul hu hun ta saa ti rin, andok i Deembai Yeso amukan mana,

⁵ fahun maɗufal mai ya ta ra i Shatan, ɓa u for lo' mafwashii ya, rin ames u wis bum mwen ti Deembai.

⁶ Pati ajin ima hu ti ɗat kwa. Hu shangi nyai foti hong ti nggaar han ya shak kwa haa?

⁷ Re' hun hong mawili ani ya, ashang hu te ii han mamwai kaciwa' hong, fota ngga' ima hu mata ti mwawei. Ɓurti ti si fa Kristi, marai i Got i Pissihai amukan, si masti kuna.

⁸ Ɓurti andi, ka mas gotti, kaciwa' hong mawili, hong i gbaf hu mafwashi, ka masi ti folok ma kaciwa' hong, folok masapai hu i mwawei.

⁹ I worongui ta kaada asun wii, nyai ka hu fut hai hu som i arak i zuruk kwa.

¹⁰ Aɗeng ima i lak mai, i laki si a som i naya hai kwa, ima sima arak i zuruk, ahun a som i yok, hu asher, hu som koltifai ti harkyel. Na andi a kpak hu hon naya moti.

¹¹ Mwashi, ima worongsui ɓa u te a kpang ka hu fut hai hu ɗeng ima ma lai ti haisus ii nusikan, ɗak mayus mute i ro i arak i zuruk, hu ma yok, hu makoltifai ti harkyel, hu ma se', hu ma fiil hu mambwa kwa. Musut i ɗufal mii ka hu cu cwa tikul kwa fweng.

¹² Ami a tirim amen ɓa i tot ɗeng ima mayus ta saikyel ɓur ya? I nyai ii ma si mii som koltifai hu wa totsus ɓur hoo?

¹³ DeeƁwe ma wa tot ti som ima si ta saikyel ɓur. “Re' hun maɗufal mafwashi ani ya ta saa yuti.”