1 Korintyawa 4 - Findel i DeeƁwe Ti Alis i Ron

Mamuro i Kristi

¹ Ɗat hu mbe' ti nin fota yarai i Kristi, ima si fas ro si ɗamam i DeeƁwe ima si ta mufot wi ta ra.

² Mwashi a kpak som ima si fas ro, si te ii som hyai.

³ A ɗama i dangres na kyel amen hu totun ɓur, ahun hu totun ɓur musuti i ɗingi i maɗufal. Yin i wa totti haisun ɓur kwa gbum.

⁴ I shang a ɗama mafwashi nin na hai yunti kwa, shak ta andi, ani ndok u kin i te ii manderei kwa. A Deembai ma wa totsun ɓur.

⁵ Ɓurti andi, ka hu lef ɗeng ɓur hai kaciwa' myan si mas kwa, shwai hun Deembai u yes tawe. Ma wa kofti ɗamam ima si ta mufot ta maɓing wii, nasi kweneng hai, u kof ambe' i mulwat i ɗufal ya. Ta myan ani ɗufal si wa mati palang kiga' ta kyel i DeeƁwe.

⁶ A shunun, mwashi si mangga' i ɗamam mii i hatat ti ya ii ɗama i kaani si yin hai hu Apolos ɓursu, ashang hu far shang ti ɗama na findel mai ima ma nyai, “Ka ha lang aɗeng ima mata worong wi ii hai kwa.” Ka hu ni ɗeng ɓin ɗeng kwa.

⁷ Awe kin ha ɓin anggumi ya? Ami ha mati ima si fa ii fai kwa ya? Na andi, ami kina ha nggwak ti ajin fota a mal si fa kwa ya?

⁸ Mwashi, ti hu wis shak aɗeng ima hu ɓweti! Ti hu ramwayatu! Hu mayu ii kaya hu ɓel nin ya! Naɗin ɓweti a wisi, na hu te ii kaya ka mas kaitat tikul!

⁹ Ɗingi amen, DeeƁwe kof anin ni mii Fe i Muro i dala shak, fota ɗufal ima si lefus ɓur i mot hai. Ni te ii aɗeng i ɗingi na naya shak, ta kyel i som lu' hu ɗufal hwak.

¹⁰ Nin a halyang ɓurti Kristi, hun huti shingat ta saa ti Kristi! Nin ni ti to, hun hu ti njeng! Si fu hun ngye, si gbaf nin ya!

¹¹ Yes myan mai ni ti hwem ta myafi, ni mati arom madyashi, si ndash nin si fwash hai, ni ti wur kwa.

¹² Ni mas ro ti ambas ti ra aminin. Myan ima si se' nin ni wis maɗesi, myan ima si kof nin ya, ni rwish ya.

¹³ Na si lak findel i haar hu i rafat ti asum ya, ni werusi loo. Ni te fota giring i naya, aɗeng i aso, yes kwai moti angga' ima ni mata nai.

¹⁴ I ma worong ti mai ɓa i fu a shusho kwa, ɓa i ti'u a ra, ɓurti hun a fe amen ima i ɓwetsus.

¹⁵ Na hun ti som i kofsu kweneng nggal hure saa ti Kristi, hu mati hu dee hyang kwa. Ɓurti a saa ti Kristi Yeso yin i te ii dee ta kyel amu ta fisel ti Muro Maɗesi.

¹⁶ Ɓurti andi, i ma fwalsu tehun fota yin.

¹⁷ A ɓurti mai i ma roti Timoti al amen saa ti Deembai ima i ɓwetus, ma hyai ta kyel i Deembai. Ma wa mbe' su fisel ti mupwet asun ta saa ti Kristi Yeso, ima wa kiga' hu kofiti ima i masi wa kyel suɓut i som koltifai ta kikyal shak.

¹⁸ Shini amu si zan hihai ta fit, fota i wa muhum yes kyel amu kwa.

¹⁹ Mwash i yes kyel amu, na Deembai ɓwet, i wa benei i ɗing aɗeng ima som zan ti hihai fit a mii sima laki, hu anggi andoki si mati ya.

²⁰ Ɓurti kaitat i DeeƁwe a mangga' i jam i fo kwa, a jam i andok.

²¹ Ami hu ɓin ɓweti ya? Ɓa i yes ti a cwereng, ahun a ti matɓwet hu rin muɗyayi ya?