1 Korintyawa 3 - Findel i DeeƁwe Ti Alis i Ron

Tasi Matkaran i Som i Koltifai

¹ A shunun, i wa findel su fota som ima si ti Rin kwa, a fota som i naya, kalajwau ta saa ti Kristi.

² I fu fof, a cwa manjengi kwa, ɓurti hu ɗiri. Andi hwak mwashi ti hu ndok kwa.

³ Hu mayu ɗiri na lo' wi. Nadon mafwashi hu shaal si mana saa yuti, hu masti ɗamam fota som i naya kwa ndai haa? Hu masi fota som lo' kek kwa haa?

⁴ Ɓurti na ɗeng ni, “i koltifai ti Pool,” nin ni, “i koltifai ti Apolos,” hu mii som lo' ndai kwa haa?

⁵ Awe a Apolos ya? Awe a Pool ya? Sin a som ro kek wa, ima ɓursus hu fa mwawei. A Deembai karus ro ames ti andek-andek ɓa si masi.

⁶ I lai musut, Apolos shu ham i hai, DeeƁwe kin ngye.

⁷ Ɓurti andi, maɗufal ima lai musut hu ima shu ham i hai, sima fo i ɗama kwa, a DeeƁwe je mii fo i ɗama, ɓurti kin cwai ngye.

⁸ Maɗufal ima lai hu ima shu ham i hai, si mati ambe' andek, si wa mat ti talal i ro ti andek-andek ta ngga' ima si mas roi ta.

⁹ Kan a myayus i ro i DeeƁwe. Hun a yang hu ta' i DeeƁwe.

¹⁰ Ta fisel ti mal maɗesi ima DeeƁwe fan, i vwat mahuhur fota maɗufal ima shang ta' ti ta', a ɗeng akat ma ta' ti ta' i hai. Shak ma ta' ti ta'i u kami loo si ngga' ima ma ta' ti ta'i ta.

¹¹ Ɗeng ma wa vwat ti mahuhur nin akat hu ima tisi vwat kwa, ima a Yeso Kristi.

¹² Maɗufal ma wa ta' ti ta' si mahuhur mai hai ti ugbwirik mujuwi, hu ugbwirik mupeli, hu kaper i cef, hu yitat, hu shala', hu ahoor.

¹³ Ro ames ma wa matkof ta ngga' ima mata, ɓurti Mwen ti yes ti wa mulang ti ya nasi kweneng hai. A ti man si wa kofti ro i ɗufal, a man ma wa mba ti ɗat i ro ima maɗufal masi.

¹⁴ Na ta' i maɗufali cu man kwa, maɗufali u mat talal i ro ames.

¹⁵ Na roi ngyeshus, wo shum i mal ndai, shak ta andi, ma wa mupwet, fota maɗufal ima pwet ta saa ti man wii.

¹⁶ Hu shangi nyai hun ti haisu a Wur i DeeƁwe hu Rin i DeeƁwe ma mute ta wii yuti kwa waak?

¹⁷ Na ɗeng rafat Wur i DeeƁwe ya, DeeƁwe ma wa rafat sus ya hwak, ɓurti Wur i DeeƁwe mati sapai, a hun a Wur ani.

¹⁸ Ka hu dang haisu ta kwa. Na ɗeng amu maɗingi mati shingat ta fisel ti mute i waya moti, ɗat u te ii “haling,” ɓa u te ii mashingat.

¹⁹ Ɓurti piris i naya moti a halngyat ta kyel i DeeƁwe. Fota ngga' ima si worong ta, “Ka' som shingat tasi nderet ames”

²⁰ si hum worongi hwak nyai, “Deembai shangi nyai ambe' i som shingat a gbya'.”

²¹ Ta dala, ɗeng ndok ɓa u nggwak ajin ti maɗufal kwa! Shak ɗamam a amu,

²² ɓwet a Pool, ahun a Apolos, ahun a Kefas, ahun a naya, ahun a mupwet, ahun a mot, ahun a mute ti mwashi, ahun a ti yes wei ɗak, shak a amu,

²³ hun ii Kristi, Kristi ii DeeƁwe.