1 Korintyawa 2 - Findel i DeeƁwe Ti Alis i Ron

¹ A shunun, myan ima i tong yes kyel amu ɓa i mba hu findel i DeeƁwe, i yes ti a mbayai i findelal mumyai hu i piris nin kwa.

² Ɓurti myan ima i yes na saa yuti, i zan na mulut yunti, i wa shang ti ɗama nin kwa, a Yeso Kristi je ima ayisyi gbum si nggwakus.

³ I yes kyel amu ti to hu myanat hu aro na lo' fwet.

⁴ Muro amen hu mba ti Muro amen si mati shingat hu findelal i jar ti kyel kwa, a matkof i andok i Rin i DeeƁwe,

⁵ ɓa fati mulut amu u te si a piris i maɗufal kwa, a si andok i DeeƁwe.

Piris ta kyel i Rin

⁶ Shak ta andi, ni findel i piris saa ti som koltifai ima si kaya ya, a piris i waya moti ahun a kaitat i waya moti kwa, ɓurti simayus mumbit.

⁷ Wayou, ni ma findel si a piris i DeeƁwe tima ti yut ta mufot wi, piris tima ai ti fotut, ima nyai, piris i DeeƁwe ima ai yis ti ta mulut ɓurti cinjangat amukan ɗak si lan naya.

⁸ Saa ti som kaitat i mwashi mii, ɗeng shang piris moti kwa, ɓurti na ɗing si shangut, na si nggwak Deembai Macinjangat kwa.

⁹ Shak ta andi, fota ngga' ima si worong ta, “Shit nin ti ɗingi kwa, mwal nin ti hali kwa, mulut nin ti mat kwa, aɗeng ima DeeƁwe sinzam ɓurti ima si ɓwetus,”

¹⁰ shak ta andi DeeƁwe kof kan ti ta fisel i Rin ames. Rin far shak ɗamam, shak ta ɗamam manggyongi i DeeƁwei.

¹¹ Ɓurti andi, awe na saa ti ɗufal shang ambe' i maɗufal ya, a rin ima mata wii maɗufal kwa waak? A andi hwak ɗeng shang ambe' i DeeƁwe kwa, a Rin i DeeƁwe je.

¹² Ka mat rin i naya kwa, a Rin ima mii ta kyel i DeeƁwe, ɓa ka shang mal ima DeeƁwe fakan gilik.

¹³ Aɗeng ima ni laki mai, a ti findel ima si kof kan ti ta fisel ti piris i maɗufal kwa, a findel i kofi i Rin, nin lak ti mwawei i Rin ta saa ti i Rin.

¹⁴ Maɗufal ima mati Rin kwa, maat ɗama ima yes ta kyel i Rin i DeeƁwe kwa, ɓurti a halngyat ta kyel ames, ma wa shangsus kwa, ɓurti a Rin fai shangi.

¹⁵ Maɗufal ima mati Rin twat puɓwar si ɗamam hai shak, yis ti haisus maɗufal ma wa totsus ɓur kwa.

¹⁶ “Awe shang ambe' i Deembai ima ɓa u taɓakus ya?” A kan, ka mati ambe' i Kristi.