1 Korintyawa 1 - Findel i DeeƁwe Ti Alis i Ron

¹ Kaada moti ii ta kyel i Pool, mamuro i Yeso Kristi ima DeeƁwe laiyus ti ɓweti ames, hu nusikan Sostinus.

² I worong wa kyel i cot i DeeƁwe ta Korint ima si fa haisus ta saa ti Kristi Yeso, si laiyus ɓa si mas mute i sapa tikul hu shak ima si ta kikyal ima si lai ti asum i Deembai Yeso Kristi ii ames hu amukan.

³ Mal maɗesi hu mute cala wa kyel amu ta kyel i DeeƁwe Deemukan hu Deembai Yeso Kristi.

Palang

⁴ I palang ti DeeƁwe ngang ɓursu, ɓurti mal maɗesi ima fu saa ti Yeso Kristi.

⁵ Ta saa yusti hu wis ramwayat ta fiselal shak, saa ti findel amu hu shangi amu shak,

⁶ ɓurti mbati findel aminin si Kristi hai matwis na saa yuti.

⁷ Ɓurti andi, hu dun mal i rin nin kwa, myan ima hun gyok shwaiti matkof i Deembai Yeso Kristi ta.

⁸ Ma wa fasu njeng wa dala, ɓa hu te kaciwa' mafwashi tasi mwen ti Deembai amukan Yeso Kristi.

⁹ DeeƁwe ima laiyu ɓa hu fut hai hu Al ames Yeso Kristi Deembai amukan, yis a ma hyai.

Magwyakan Saa Ti Suɓut i Som Koltifai

¹⁰ A shunun, i ma fwalsu, saa ti asum i Deembai amukan Yeso Kristi, ima shak asui hu ɓwet ɗiyai, ɓa kan magwyakan tena saa yuti kwa, ɓa hu fut hai, hu mas mute ti mulut andek, ambe' amu andek.

¹¹ A shunun, shini ta wur i Ukoluwi si lakun nyai hu ma shaal hun ɓata a hun.

¹² Aɗeng ima i laki ayis nai, ɗeng amu ma nyai, “yin i koltifai ti Pool,” nin yis nyai, “yin i koltifai ti Apolos,” nin yis nyai, “yin i koltifai ti Kefas,” ɗeng hwak yis nyai, “yin i koltifai ti Kristi.”

¹³ Kristi matkar ani? Ai si nggwak a Pool ɓursu waak? Ahun si masu batisma ti asum i Pool waak?

¹⁴ I palang DeeƁwe ai i mas ɗeng amu batisma kwa, a Krispus hu Gayus je,

¹⁵ ɓurti andi, ɗeng ma wa nyai si masus batisma ti asum amen kwa.

¹⁶ (Hei, i mas wur a Tifanus batisma, takfai ti mai, i shang ɗeng ima i masus batisma kwa.)

¹⁷ Ɓurti Yeso rohun ɓa i mas batisma kwa, a but ti Muro Maɗesi, a ti findel i piris i maɗufal kwa, kan shanggam i Kristi tehus ii ɗama i gbya' kwa.

Kristi a Piris hu Andok i DeeƁwe

¹⁸ Muro i shanggam a halngyat ta kyel i som ima si wa kpaa, ɗak na kyel amukan ima ka wa wis ti bum, a andok i DeeƁwe.

¹⁹ Mata worong, “I wa ɓaasan ti piris i som shingat ya, i wa hatat ti shangi i som shangi ii ɗama i gbya'.”

²⁰ Mashingat mii leya? Ma matafen mii leya? Ma tas ti findel i waya moti mii leya? Ahun DeeƁwe hat ti piris i naya moti ii halngyat kwa waak?

²¹ Ta fisel ti piris i DeeƁwe, ɗufal i naya saa ti piris ames si shangus kwa. Fo i mandi, ti ɗat DeeƁwe tasi ɓwi bum ima si fa mwawei si yis hai ta fisel ti but ti Muro Maɗesi ima si ɗingi fota a halngyat.

²² Som Ju si far ti ɗamam i shok na fo, som Girik si far ti piris,

²³ shak ta andi, ni buti Kristi ima si nggwak, afung ti bukat ta kyel i som Ju, hu halngyat ta kyel i Ramam.

²⁴ Ɗak ta kyel i som ima DeeƁwe laiyus, shak Jus hu Girik, Kristi a andok i DeeƁwe hu piris i DeeƁwe.

²⁵ Ɓurti andi, halngyat i DeeƁwe shingat ɓin piris i maɗufal, to i DeeƁwe, njeng ɓin njeng i maɗufal.

²⁶ A shunun, mbe' hun ngga' ima ai hun ta myan ima si laiyu. A ndyong je ta saa yuti ai sin ti shingat musuti i maɗufal. A ndyong je ta saa yuti ai sin ti fo i findel, a ndyong je si mii fe i som ramwayat.

²⁷ Shak ta andi, DeeƁwe ben ɗamam ima ɗufal si ɗingi a halngyat, ɓa u fa som ima si ti piris i naya moti shusho. DeeƁwe ben ɗamam ima ɗufal si ɗingi to, ɓa u fa manjengi shusho.

²⁸ DeeƁwe ben ɗamam ima si mii fo i ɗama na naya moti kwa, hu ima si kom ya, hu ima si ti ro kwa, ɓa u gbya' ti ɗamam ima ɗufal si ɗingi fota si mii fo i ɗama na naya.

²⁹ DeeƁwe mas ɗamam mii ɓa ka fe ɗufal si pa ajin ta wei i DeeƁwe.

³⁰ DeeƁwe a yis kinu hu mata saa ti Kristi Yeso, yis ima mii piris amukan ta kyel DeeƁwe. Ii ta kyel ames ka wis mute manderei i DeeƁwe hu sapa hu dumi ya.

³¹ Ɓurti andi, fota ngga' ima si worong, “Na maɗufal yis wa pati ajin, ɗat u pa ajin si Deembai hai.”