1 Jwon 5 - Findel i DeeƁwe Ti Alis i Ron

Fati mwawei ta si Al i DeeƁwe

¹ Na maɗufal fa mwawei nyai, Yeso a Kristi, yis ii DeeƁwe, hu shak maɗufal ima ɓwet Dee, ɓwet Al ames hwak.

² Angga' ima ka shangi ka ɓwet fe i DeeƁwe ta mai, ɓurti ɓweti DeeƁwe hu hya ti findel ames.

³ Matɓwet i DeeƁwe mai, a yis mii hal ti findel ames. Findel ames mati shum kwa.

⁴ Ɓurti shak maɗufal ima si alus ta kyel i DeeƁwe cu uges ti naya. A uges ima kin ka ɓin njeng naya mai, kinti mulut amukan si Yeso hai.

⁵ Ayis we cu uges ti naya ya? A maɗufal ima fa mwawei nyai Yeso a Al i DeeƁwe.

Yeso Kristi a Al i DeeƁwe

⁶ Yeso Kristi a yis yes ta fisel i ham hu wash. Yes ii ta fisel i ham kyek kwa, i ta ham hu wash. A Rin lak, ɓurti a Rini mii mwawei.

⁷ A ɗamam ataat si lak nyai,

⁸ Rin, hu ham, hu wash, shak ataati si lak ɗama andek.

⁹ Ka mat laki i maɗufal, laki i DeeƁwe ɓin, ɓurti a laki i DeeƁwe, ima lak tasi Al ames hai.

¹⁰ Shak maɗufal ima fa mwawei tasi Al i DeeƁwe hai, mati findel mai ta mulut yusti. Maɗufal ima nggwes i fati mwawei si DeeƁwe hai, hat ti DeeƁwe a ma fyarat ndai, ɓurti nggwes i fati mwawei si findel ima DeeƁwe lak si Al ames hai.

¹¹ A findeli mai, DeeƁwe fa kan mupwet i myan hu myan, mupwet mai mata wi i Al ames.

¹² Maɗufal ima mati Al i DeeƁwe, mati mupwet. Maɗufal ima mati Al i DeeƁwe kwa, mati mupwet kwa.

Ambit i findel

¹³ I worongu ɗamami, hun ima hu fa mwawei tasi asum i Al i DeeƁwe, ɓurti ɓa ashang hu shangi nyai, hu ti mupwet i myan hu myan.

¹⁴ Rwish ima kati na kawa ta mabel i DeeƁwe a yis nai, na ka fwal ta ngga' ima ma ɓweti ta, haal kan.

¹⁵ Na ka shangi ma halan sikan, ka shangi kawa mati shak aɗeng ima ka fwal ta kyel ames.

¹⁶ Na ɗeng ɗing nusus yis masti mafwashi ima kol mot kwa, u fwal DeeƁwe, DeeƁwe ma wa fa sus mupwet. I lak ti a som ima mafwashi ames kol mot kwa. Mafwashi niin mana ima kwal mot. Ima nyai ɓa hu fwal DeeƁwe ɓurti musuti ani kwa.

¹⁷ Shak masti ɗam ima si ta fisel kwa, a mafwashi. Mafwashi niin mana ima kwal mot kwa.

¹⁸ Ka shangi nyai, shak fe i DeeƁwe si cwai wei ti masti mafwashi kwa. Al i DeeƁwe fwangus, ɓurti kan Shatan ndok u ngge'us.

¹⁹ Ka shangi kan a fe i DeeƁwe, shak naya ti mata ra i Shatan.

²⁰ Ka shangi hwak Al i DeeƁwe yes fa kan ɓwai ti shishat ya, ɓurti ɓa ka shangus yis ima mii mwawei. Ka fut hai hu Al ames Yeso Kristi, yis ima mii mwawei. Ayis mii DeeƁwe i mwawei hu mupwet i myan hu myan.

²¹ A femen, mas hun maleng ta kyel i harkyel.