1 Jwon 4 - Findel i DeeƁwe Ti Alis i Ron

Mbahun Rinan

¹ A myayun, ka hu fa mwawei si shak maɗufal ima ni mati rin i DeeƁwe kwa. Mbahun rini hu ɗingi a hon si mii ta kyel i DeeƁwe, ɓurti som i shit i fyarat si rangya na naya hyang.

² Angga' ima hu wa shang ti Rin i DeeƁwe ta mai. Shak rin ima ɓwet nyai Yeso Kristi yes na lo' i maɗufal wi mii ta kyel i DeeƁwe.

³ Shak maɗufal ima ɓwet nyai Yeso mii ta kyel DeeƁwe kwa, maɗufal mii ta kyel i DeeƁwe kwa. Mai mati rin i ha' ti wei ti Kristi ndai, ima ti hu hali ma yes, mwashi tuu ru, mana naya.

⁴ Hun femen, hu ii DeeƁwe hu cu uges si sin hai, ɓurti yis ima mata wii yuti ɓin njeng yis ima mana naya.

⁵ Si mii na naya, ayis nai si findel ti ambe' i naya, nayai ti hal sus.

⁶ Kan ii DeeƁwe, shak maɗufal ima shang DeeƁwe haal kan. Shak maɗufal ima shang DeeƁwe kwa haal kan kwa. Angga' ima ka shang Rin i mwawei hu rin i fyarat ta nai.

Matɓwet i DeeƁwe hu amukan

⁷ A myayun, ka ɓwet ɗiyai, ɓurti matɓwet yes ii ta kyel i DeeƁwe. Shak maɗufal ima ɓwet nusus yis a al i DeeƁwe, shang DeeƁwe.

⁸ Shak maɗufal ima mati matɓwet kwa shang DeeƁwe kwa, ɓurti DeeƁwe a matɓwet.

⁹ Angga' ima DeeƁwe kof matɓwet ames na saa kanti mai. Ro Al ames andek ɗwyat na naya ɓa ka wis mupwet ɓur sus.

¹⁰ Mai a matɓwet, akan ka ɓwet DeeƁwe kwa, a yis ɓwet kan, ro Al ames ɓa u te ii kuna, ɓurti mafwashani amukan.

¹¹ A myayun, na angga' ima DeeƁwe ɓwet kan ta mai, kan hwak a kpwang ka ɓwet ɗiyai.

¹² Awe na saa ti ɗufal ima ɗing DeeƁwe ti shishat ya? Na ka ɓwet ɗiyai, DeeƁwe mana wi kanti ndai, matɓwet ames ma nggya-nggya na wii kanti.

¹³ Ka shangi nyai ka ta wii yusti, yis hwak mana wii kan ti, ɓurti fakan Rin ames.

¹⁴ Ka ɗingi, ka lak nyai, Dee ro Al ames ɓa u te ii Mabum i naya.

¹⁵ Na maɗufal ɓu fo ni Yeso a Al i DeeƁwe, DeeƁwe mata wii i yusti, yis hwak mata wii i DeeƁwe.

¹⁶ Ɓurti andi ka shangi, ka kin mulut tasi matɓwet i DeeƁwe, ima mati ɓur sikan. DeeƁwe a matɓwet. Shak maɗufal ima ma mute ta matɓwet wi, ma mute ta wii i DeeƁwe, DeeƁwe ta wii yusti hwak.

¹⁷ Ana fisel moti matɓwet hya na wii kanti nggya-nggya. Ɓa ka njeng ya mwen ti ɓur, ɓurti na naya moti kama fota yis.

¹⁸ Myanat mata matɓwet wi kwa fweng. Matɓwet tima ti nggya-nggya ti hwai ti myanat ya, ɓurti ambe' i andash a yis kyan myanat. Kof ndai ma myanat mati matɓwet mu nggya-nggyai kwa.

¹⁹ Ka mati matɓwet ɓurti yis tong ɓwet sikan.

²⁰ Na ɗeng ni, “I ɓwet DeeƁwe,” ɗak ma ha' ti wei ti nusus, a ma fyarat. Shak maɗufal ima nggwes i ɓwet ti nusus ima ma ɗingsus, ma wa masi atini u ɓwet DeeƁwe ima wa' ɗingus ya?

²¹ Findel ima lakan mai, shak maɗufal ima ɓwet DeeƁwe, a kpang u ɓwet nusus hwak.