1 Jwon 3 - Findel i DeeƁwe Ti Alis i Ron

¹ Ɗing hun musut i ɓweti ima Demukan mati na hai kan ti! Yis laikan ii femes, angga' ima kamata nai! Aɗeng ima kin naya ti shang kan kwa, a ɓurti ti shangus kwa.

² A myayun, mwashi kan a fe i DeeƁwe. Ti si kof kan ti ngga' ima ka wa mute kwa tawe. Ka shangi nyai myan ima pwak ya ka wa mute fota yis, ɓurti ka wa ɗing sus fota ngga' ima mata.

³ Shak maɗufal ima mati kintiɓwi mai ta hai yusti sapa haisus ya, fota ngga' ima Yeso mati sapai ta.

⁴ Na maɗufal mas mafwashi nggyel anggut ya. Angga' ima mata nai, mafwashi a nggyel ti anggut ya.

⁵ Hu shangi nyai Yeso yes a ɓurti ɓa u ha' kan mafwashani amukan ya. Ta wii yusti mati mafwashi kwa.

⁶ Shak maɗufal ima ma mute ta wii yusti, cwai wei ti masti mafwashi kwa. Maɗufal ima cu wei ti masti mafwashi kof ɗing DeeƁwe kwa, shangus kwa.

⁷ A femen, ka hu hon ɗeng u dangu hu welu kwa. Maɗufal ima mas aɗeng ima mii maɗesi a manderei, fota ngga' ima yis Kristi a manderei.

⁸ Maɗufal ima mas mafwashi a yis mii maɗufal i shatan, ɓurti shatan mas mafwashi ta si bya'. A aɗeng ima kin Al i DeeƁwe yes ɓa u nggwal ro i shatan ya nai.

⁹ Shak fe i DeeƁwe si cwai wei ti masti mafwashi kwa, ɓurti mute fota DeeƁwe mata wii yusti. Si wa muhum cwai ti wei ti masti mafwashi kwa, ɓurti sin a fe i DeeƁwe.

¹⁰ Ngga' ima ka shang fe i DeeƁwe mai hu ngga' ima ka shang fei shatan ta mai. Shak maɗufal ima mas ɗamam kiga' kwa, hu ima ɓwet nusus kwa yis a al i DeeƁwe kwa.

Ɓweti ɗiyai

¹¹ A findel ima hu hali ta si bya' mai nyai, ka ɓwet ɗiyai.

¹² Ka hu te fota Ken kwa. Ai yis yus ii maɗufal i shatan, ima for nusus Habila ya. Ami kin forus ya? Ɓurti ro ames ai yis yus ii mafwashi, i nusus yis ii maɗesi.

¹³ A shunun, na naya ti nggwetu, kan tyo hai ii ɗama i shok na fo kwa.

¹⁴ Ka shangi nyai ti ka lang mot ii hai, ka lang ta mupwet wi, ɓurti ka ɓwet shunukan. Shak maɗufal ima mayus kaciwa' matɓwet mayus ta kyel i mot.

¹⁵ Na maɗufal nggwes ti nusus, yis a ma for ti ɗufal. Hu shangi nyai shak ma for ti ɗufal mati mupwet i myan hu myan ta wi yusti kwa.

¹⁶ Angga' ima ka shang matɓwet ta mai, Yeso Kristi fa mupwet ames ɓur sikan. Kan hwak ka fa mupwet amukan ɓurti shunukan.

¹⁷ Na ɗeng mati ɗama i ra, fota ramwayat, ɗak ɗing nusus yis jyel ɗak nggwes i masus bum, atini matɓwet i DeeƁwe u te ta wii yusti ya?

¹⁸ A femen, kan ka ɓwet ɗiyai ti findel hu mimyat na fo kyek kwa, ka ɓwet ɗiyai ti maasi hu kofti mwawei.

¹⁹ Angga' ima ka wa shangi nyai ka mii ɗufal i masti mwawei mai, ɓa ka rwish ya ta mabel i DeeƁwe kaciwa' muro na lo'.

²⁰ Na myan ima mulwat amukan mbyar kani nyai, ka mati mafwashi, DeeƁwe ɓin njeng i mulwat amukan, shang ɗamam shak.

²¹ A myayun, na mulwat amukan si mbyar kani kwa, ka ti njeng i mute ta mabel i DeeƁwe ndai.

²² Ka mat shak aɗeng ima ka lul ta kyel ames, ɓurti ka hal findel ames, ka mas aɗeng ima ɗatus ta si ɓwi hai.

²³ Findel ima lak mai, ɓa ka fa mulwat amukan si Al ames, Yeso Kristi hai, hu ka ɓwet ɗiyai fota ngga' ima lakan ta.

²⁴ Ɗufal ima si hal findel ames si mata wii yusti, yis mata wii ames i sin hwak. Angga' ima ka shangi mana wii kanti mai, ka shangi ii ta Rin ima fakan.