1 Jwon 2 - Findel i DeeƁwe Ti Alis i Ron

Yeso Kristi a mabum amukan

¹ A femen muyayi, i worong su mai a ɓurti kan hu mas mafwashi. Shak ta andi na ɗeng mas mafwashi, ka mati ɗeng ta wei i DeeƁwe Demukan ɓur sikan a Yeso Kristi, maɗufal manderei.

² Ayis mii maɗufal ima fa haisus ii kuna ɓurti mafwashani amukan, a ɓurti kan kek kwa, a ɓurti mafwashani i shak ɗufal i naya.

³ Angga' ima kof ka shangus ta nai, na ka mas aɗeng ima lak.

⁴ Maɗufal ima ni, “I shang DeeƁwe,” ɗak nggwes i maas ti aɗeng ima DeeƁwe lak a mafyarat, mwawei ti ta wii yusti kwa fweng.

⁵ Shak maɗufal ima mas aɗeng ima DeeƁwe lak, matɓwet i DeeƁwe hya ta wii yusti nggya-nggya ndai. Angga' ima ka shangi nyai ka ta wii yusti nai.

⁶ Shak maɗufal ima ni ma mute ta wii i DeeƁwe a kpang u mas musut i mute ima Yeso masi.

Anggut mamwai

⁷ A myayun, ima worong su a anggut mamwai kwa, a ma willi ima ai hunti tasi bya'. Anggut mai a findel ima ti hu hali.

⁸ Shak ta andi ima worong su anggut mamwai. Mwawei si ɗingut tasi Kristi si hun hai hwak, ɓurti maɓing ma fati fisel, kweneng i mwawei makof.

⁹ Na maɗufal ni mata kweneng wi ɗak nggwes ti nusus mayus ɗiri ta maɓing wi.

¹⁰ Maɗufal ima ɓwet nusus ma mute ta kweneng wi, mati ɗama nin ima u kinus bukat kwa.

¹¹ Shak maɗufal ima nggwes ti nusus mata maɓing wi. Shang kyel ima ma wa ta kwa, ɓurti ɗa'at ta maɓing wi. Maɓingi nzyauwus shishat ya.

¹² I worongui, a femen, ɓurti DeeƁwe shuhu mafwashani ya, saa ti asum i Yeso.

¹³ I worongui, a hu dee ɓurti hu shangus yis ima mii tasi bya'. I worongui, a fe zalang, ɓurti hu cu uges tasi sukwa ani. I worongui, a femen, ɓurti hu shang Demukan DeeƁwe.

¹⁴ I worongui, a hu dee, ɓurti hu shangus yis ima mii tasi bya'. I worongui, a fe zalang ɓurti hu ti njeng, findel i DeeƁwe ma mute ta wii i mulwat amu, hu cu uges tasi sukwa ani.

Ka hu ɓwet naya hu ɗamam amet kwa

¹⁵ Ka hu ɓwet naya hu ɗamam ima si na wii amet kwa. Shak maɗufal ima ɓwet naya, matɓwet i Demukan mata wii yusti kwa.

¹⁶ Shak ɗamam mii si yes ii na naya, gwyelti masti ɗamam ima lo' ma ɓweti, hu yok i shishat ames, hu pati ajin si ɗamam ima mati hu ima masi. Shak mii si yes ii ta kyel i Demukan kwa, si yes ii na naya.

¹⁷ Naya hu gwel asut shak si mulang ta, maɗufal ima mas aɗeng ima DeeƁwe na ɓweti mati mupwet i myan hu myan.

Taɓak tasi ma ha' ti wei ti Kristi

¹⁸ A femen, a myan i dala mii. Hu hali nyai ma ha' ti wei ti Kristi ma yes, mwashi ati som i ha' ti wei ti Kristi hyang tisi yes. Angga' ima ka wa shangi a myan i dala mii nai.

¹⁹ Som i ha' ti wei ti Kristi mii si rangya ii na saa kan ti, ɓurti sin amukan kwa. Naɗin sin amukan naɗin ka ma tikul, wa ames kof ɗeng ta saa yusti amukan kwa.

²⁰ Rin Masapai sapa hu ya, ɓurti andi shak asui hu shang mwawei.

²¹ I worongui a ɓurti hu dun shang ti mwawei kwa, a ɓurti hu shang mwawei, hu shangi fyarat laang ya ta kyel i mwawei kwa.

²² Awe mii ma fyarat ya? A maɗufal ima ɓwinggil nyai Yeso a Kristi. Musut i maɗufal mai a ma ha' ti wei ri Kristi. Maɗufal mai ɓwinggil Dee hu Ali.

²³ Shak maɗufal ima ɓwingil Ali, ɓwingil Deehi hwak.

²⁴ Cuhun wei ti mute mangra si aɗeng ima hu hali tasi bya'. Na hu te mangra tasi mwawei moti, hun hwak hu wa mute ta wii i Ali hu Deehi.

²⁵ A findel i kintiɓwi mai fakan mupwet i myan hu myan.

²⁶ I worong su mii ɗamami ɓurti som ima si kinti hai ɓa si ringu na fisel.

²⁷ Hu mat Rin Masapai, ma mute ta wii yuti, hu ɓweti ɗeng ɓa u kofu ɗama kwa. Ɓurti Rin Masapai ma wa kofsu ti ɗamami shak, shak aɗeng ima kofu ani a kyas i mwawei, ii fyarat kwa. Ɓur ti andi tehun ta wi yusti fota ngga' ima kofu ta.

Fe i DeeƁwe

²⁸ Mwashi, a femen, cuhun wei ti mute na wi i Kristi, ɓurti myan ima pwak ya kawa mute mangrai reket kaciwa' shusho ta mabel yusti.

²⁹ Na hu shangi nyai Yeso Kristi a maɗufal manderei, hu shangi nyai shak maɗufal ima mas aɗeng ima mandere yis a al i DeeƁwe.